NYAKUNGƐNGƐ KI 'CUʔƆ, A YEWE 'KI FUGU NƐ PE NI
(32.1–34.35)
Isirayɛliyé pe 'nɛ̀piɛyɛlilɛ faan nɛ ni sungu
32
1 Bà siɛnnɛ pe kɛ́nì ki nyaa Misa nɛ mɔgi nyagurugo naamɛ gè, a pe 'pìye pínɛ nɛ̀ sɛ́nì Arawɔn màʔa wè nɛ́ jo: «Yɛ̀ muɔ wè ! Ma kulocɛliɛ wáà kpíʔilea ŋàa wi béri tári weli yiʔɛ mɛ́ gè ! Nɛ́ ki cɛ́n Misa ŋáà wè, wire ŋáà wi 'weli yige Ezipiti kùlo nī lè, weli sì ki cɛ́n gàa ki 'wi taa wèʔ.»2 A Arawɔn sí ki juu pe mɛ́ nɛ́ jo: «Ye- yeli ngbótogolo kɔ̀n gèle, tiɛ wuʔulo gèle, gàli gīɛlɛ yeli cɛlilɛ nɛ̄ bèle, nɛ́ yeli pórilo ní bèle, nɛ́ yeli jaala ní bèle. Yeri báan nɛ́ ti ní m'mɛ́.»
3 A siɛnnɛ pe mìɛni 'pe ngbótogolo kɔ̀n gèle, tiɛ wuʔulo gèle, nɛ̀ sɛ́nì ti kɛn Arawɔn mɛ́ wè. 4 A Arawɔn 'ti suɔ, nɛ̀ ti nyɛgɛ nɛ́ nɛ̀piɛyɛlilɛ láà faan nɛ́ ti ní.
A siɛnnɛ pe 'fali nɛ̀ jo: «Isirayɛliyé kulocɛliɛ n'ŋɛ, ŋàa wi 'weli yige Ezipiti kùlo nī lèb !»
5 Bà Arawɔn 'kire nyaa gè, a wi 'gbùʔɔrɔdiʔɛ káà faan nɛ̀piɛyɛlilɛ yiʔɛ mɛ́ gè, nɛ́ fali nɛ̀ ki juu nɛ́ jo: «Mbànʔa yē cɛngbuʔɔ weli mɛ́, we- fundaanra kpíʔile Yewe mɛ́ wèc.»
6 Ki kpìɛnduu gè, sínbiniwuuro nī dè, a siɛnnɛ pe 'yɛ̀ nɛ̀ kɛ́ gbùʔɔrɔdiʔɛ mɛ́ gè nɛ́ kakuɔrɔ kaasuʔuro ní dè; kire kàduʔumɛ gè a pe 'pɛn nɛ́ yanyige suro ní dè nɛ̀ pɛ́nì yajuuro kpúu dè. A pe 'tɛ́ni nɛ̀ lìi nɛ́ sunmɔ gbuɔ, nɛ́ yɛ̀ nɛ pùrɔ́ baad.
7 A Yewe sí ki juu Misa mɛ́ nɛ́ jo: «Koli mari tíri fáari ! Nɛ́ ki cɛ́n muɔ siɛnnɛ bèle, pe nyɛ́nì kapiigbuʔɔ kpíʔile, siɛnnɛ bálì muɔ 'yige Ezipiti kùlo nī lè. 8 Pe nyɛ́nì koligo wáa gè fáari gàa wuʔu mi yé juu nɛ̀ gbɛ̀ngɛ pe mɛ́ gè. Pe nyɛ́nì tiɛ nyɛgɛ wè nɛ̀ nɛ̀piɛyɛlilɛ faan nɛ̀ tuu nɛ̀ cúbulo, nɛ ni sungu, á pe 'ki juu nɛ́ jo: ‹Isirayɛliyé kulocɛliɛ n'ŋɛ, ŋàa wi 'weli yige Ezipiti kùlo nī lè !› »
9 A Yewe ń'nɛ̀ ki juu Misa mɛ́ wè nɛ́ jo: «Mi nyɛ́nì siɛnnɛ bálì wéli bèle, a mi 'ki nyaa siɛnnɛ bálì pe yē cíimɛ siɛnnɛ. 10 Píra ŋáà nī wè, -mi yaʔa mi- ki kpíʔile ! Mi funyɛrigbuʔɔ ki bé pe mìɛni sórigo, bà m'bé pe kpúu bè yige náʔa gè. Muɔ wè, m'bé ní muɔ kpíʔile siɛnniʔɛmɛ fɔ́li.»
11 A Misa sí wi Yewe Kulocɛliɛ fiɛn wè nɛ́ jo: «Gáa nɛ̄, Yewe, muɔ fungo ki 'yɛ̀ kpuʔɔ muɔ siɛnnɛ kúrugu bèle, bàli muɔ 'yige Ezipiti kùlo nī lè nɛ́ muɔ fànʔa ní gè nɛ́ muɔ ŋɔri kɔli ní gèe ? 12 A muɔ 'kire kpíʔile mmɛ gè o, Ezipiti siɛnnɛ pe bé jo: ‹Funbinʔɛ nɛ̄ Yewe nyɛ́nì pe yige Ezipiti kùlo nī lè. Wi 'puu nɛ caa bè sa pe kpúu nyaguruyo tiɛyɛ nī yè wī bè pe cɛrigɛ yige dàala nɛ̄ lè.› -Muɔ fungo nyígi gè pe kúrugu; ma muɔ sɔ̀ngirɔ yiʔɛ dè muɔ siɛnnɛ kɔli mɛ́ gè. Kiì yɛli muɔ pe wuʔɔ mmɛ gèʔ. 13 Sɔ̀ngi ma taa nɛ́ Birayima ní wè, nɛ́ Siaga ní wè, nɛ́ Isirayɛli ní, peli bálì bīɛlɛ muɔ baakuɔlɔ bèle; peli mɛ́ muɔ yé kàli nɛ̀ jo muɔ bé pe siimɛ niʔɛ bè bɛ̀ ŋɔgɔlɔ tíɛlɛ gàli gīɛlɛ nyìʔɛnɛ nī lè. Muɔ yé ki juu pe mɛ́ nɛ́ jo muɔ bé kùlo náà ni mìɛni kɛn lè pe pìile mɛ́ bèle, nàa wuʔu muɔ yé juu gè; pe bé ni taa kɔrigɔ lɛ̀lɛ ó lɛ̀lɛf.»
14 A Yewe 'wi sɔ̀ngirɔ yiʔɛ dè; wiì fɔ̀li nɛ̀ wuʔɔgɔ taʔa wi siɛnnɛ nɛ̄ bèle nɛ̀ yɛli nɛ́ dàa ní wi yé juu dèʔ.
15 A Misa 'koli nɛ̀ tìgi nyagurugo nɛ̄ gè nɛ́ nyakungɛngɛ siɛnrɛ kàdɛnitɛnyɛ siin ní yè wi kiyɛ nī yè. Yasɛbɛrɛ ti 'puu kàdɛnitɛnyɛ yi yiɛyɛ siin nɛ̄ yè, tàa kàduʔu mɛ́, tàa yiʔɛ mɛ́. 16 Kàdɛnitɛnyɛ yi yé puu Kulocɛliɛ wire tíimɛ wekpiʔiliye; yasɛbɛrɛ tire yé puu Kulocɛliɛ wire tíimɛ wi yé ti sɛbɛ kàdɛnitɛnyɛ nɛ̄ yè.
17 Bà Yesuwe kɛ́nì siɛnnɛ pe yékpuʔulo lúʔu gèle, a wi 'ki juu Misa mɛ́ nɛ́ jo: «Cí ! Kapiɛnnɛ yékpuʔulo yē baa bùguro nī dè díɛʔ !»
18 A Misa sí jo: «ʔéʔe, fànʔataa yékpuʔulo bɛ̀ʔ, penɛjaa yékpuʔulo bɛ̀ʔ míɛni; pùrɔrɔ ŋúnuyɔ yékpuʔulo gīɛlɛ gàli mi nɛ lúru gèle.»
19 Bà Misa pɛ́nì nɔ̀ pe nɛ̄ wè, a wi 'nɛ̀piɛyɛlilɛ nyaa lè nàa pe yé kpíʔile nɛ̀ yérige lè, á pe nɛ yúu nɛ ni mári lè, a Misa fungo ki 'yɛ̀ kpuʔɔ pe kúrugu, a wi 'kàdɛnitɛnyɛ wáa yè dàala nɛ̄ lè nyagurugo táanmɛ gè a yi 'jabari. 20 A wi 'nɛ̀piɛyɛlilɛ líɛ lè nàa pe 'kpíʔile lè nɛ̀ ni sórigo kàsun nī gè, nɛ́ ki súu míige, nɛ̀ ki míige nyɛri nyɛri gè luʔɔ naamɛ gè, nɛ́ Isirayɛli siɛnnɛ cò bèle fànʔa a pe 'ki luʔɔ gbuɔ gè.
21 A Misa sí Arawɔn yúgo wè nɛ́ jo: «Gáa siɛnnɛ bálì pe 'kpíʔile muɔ nɛ̄, á muɔ 'pe nyɔ́gɔ kapiigbuʔɔ gáà nī gè ?»
22 A Arawɔn 'ki juu nɛ́ jo: «Fǎga muɔ fungo yɛ̀gɛ gèʔ, mi kàfɔli. Muɔ tíimɛ nyɛ́nì ki cɛ́n siɛnnɛ bálì piyē gbòboriyaʔala bèri kapiʔile kpínʔini gèle. 23 Peli tíimɛ pe 'mi yɛ: ‹-Kulocɛliɛ wáà kpíʔile ma weli kɛn, ŋàa wi béri tári weli yiʔɛ mɛ́ gè. Nɛ́ ki cɛ́n nàguɔ ŋáà wi 'weli yige Ezipiti kùlo nī lè, Misa wè, weli sì ki cɛ́n gàa ki kɛ́nì wi taa gèʔg.› 24 A mi sí ki juu pe mɛ́ nɛ́ jo: ‹Bàli mɛ́ tiɛ wi yē wè, pe- wi kɔ̀n.› A pe 'wi kɔ̀n nɛ̀ kɛn m'mɛ́, a mi 'fali nɛ̀ wi wáa kàsun nī gè; ki sí n'gɛ, a wi 'fali nɛ̀ yiri nɛ̀piɛyɛlilɛ.»
25 Bà Misa 'ki nyaa siɛnnɛ pe yé kò pìyemɛ bèle, nɛ́ ki cɛ́n Arawɔn cé pe yaʔa a pe 'kò pìyemɛ fúɔ a pe 'kò wáayaʔala bèle; pe leguulo pe- sí gari pe tíʔɛ wè, 26 a Misa sí yéri bùguro wìile nɛ̄ lè nɛ́ yékpoli wáa lè nɛ́ jo: «Ŋáa wī Yewe wuu wè ? Wiri báan náʔa m'mɛ́ !» A Levii saʔa tùlugo wuulo pe mìɛni 'pìye pínɛ Misa táanni wè.
27 A wi sí pe yɛ: «Ti n'dɛ dàa Yewe, Isirayɛliyé Kulocɛliɛ, wi 'juu dè: ‹Siɛn ó siɛn 'yɛli wi- wi kapiɛngbuɔn ŋɔsii puɔ wè wi nágbɛnigɛ nɛ̄ gè. Yeri waa bùguro tiɛyɛ yi mìɛni nī yeri caa yeri mári, yéri waa saaya wìʔile ke mìɛni nɛ̄, ye- sa yeli siinyɛninɛ nɛ́ yeli nàgorilo nɛ́ yeli tɛ́ninyɛninɛ kpúu bèle !› »
28 A Levii siɛnnɛ pe 'ki kpíʔile gàa Misa juu gè. Kire cɛngɛ gè a pe 'nàguɔlɔ sirakiɛ nɛ́ kogunɔ (3 000) kpúu.
29 A Misa 'ki juu Leviiyé mɛ́ bèle nɛ́ jo: «Bɛ̀ yeli 'fɔ̀li nɛ̀ yeli jaala nɛ́ yeli siinyɛninɛ kpúu bèle, yeli nyɛ́nì yìye wàli nɛ̀ tɛ́ngɛ pàngɛ gè Yewe mɛ́ bèri wi baara kúu dè. Kire nɛ̄ wi nyɛ́nì diba taʔa wè yeli nɛ̄ pàngɛ gè.»
30 Ki kpìɛnduu gè, a Misa 'ki juu siɛnnɛ mɛ́ bèle nɛ́ jo: «Yeli nyɛ́nì kapiigbuʔɔ kpíʔile. Píra ŋáà nī wè m'bé tánʔa Yewe kúrugu wè, bè ki wéli dùʔɔ m'bé jáa bè yeli kapiigbuʔɔ ki kàsulugo náari gè.»
31 A Misa 'koli nɛ̀ kɛ́ Yewe kúrugu wè, nɛ̀ sɛ́nì ki juu nɛ́ jo: «Cí, Yewe, mi nɛ muɔ fiɛn wī, siɛnnɛ bálì pe nyɛ́nì kapiigbuʔɔ kpíʔile ! Pe nyɛ́nì kulocɛliɛ wáà faan nɛ́ tiɛ ní ! 32 Bɛ̀ ki 'nyaa mmɛ gè, píra ŋáà nī wè, mi nɛ muɔ náari ma pe kapiile yaʔa lè pe nɛ̄. Á kire bɛ̀ʔ gè, ma mi míʔɛ yige gè muɔ sìi sɛbɛ nī wè ŋàa muɔ 'sɛbɛ wèh.»
33 A Yewe sí ki juu Misa mɛ́ wè nɛ́ jo: «Siɛn ŋáà wi 'kapiile kpíʔile mi nɛ̄ wè, kire siɛn wire míʔɛ m'bé yige mi sɛbɛ nī wè. 34 Píra ŋáà nī wè, te waa ma sa siɛnnɛ pe yiʔɛ kíni, mari waa tiʔɛ gíì nī gàa mi 'tìɛ muɔ nɛ̄ gè. Mi nyìʔɛnɛ tundunwɔ wi béri tári muɔ yiʔɛ mɛ́. Nɛ̀ ki yaʔa muɔ 'yɛli bè ki cɛ́n cɛngɛ káà m'bága siɛnnɛ wuʔɔ bèle bè pe kpúɔn pe kapiile náà ni kɛnmɛ nɛ̄ bè.»
35 A Yewe pɛ́nì Isirayɛli siɛnnɛ kpúɔn bèle nɛ̀ yɛli nɛ́ gàa ní pe yé kpíʔile gè, bɛ̀ pe yé Arawɔn yɛ wi- nɛ̀piɛyɛlilɛ faan lè peli mɛ́ lè.