Yewe 'jo wire sì je pínɛ nɛ́ Isirayɛliyé ní bèleʔ
33
1 A Yewe 'ki juu Misa mɛ́ nɛ́ jo: «Yɛ̀ mari waa ma núgo náʔa gè, muɔ nɛ́ muɔ siɛnnɛ ní bèle bàli muɔ 'yige Ezipiti kùlo nī lè. Yeri tári yeri waa kùlo náà mɛ́ lè nàa nyuɔ mi 'kún nɛ̀ kɛn Birayima mɛ́ wè, nɛ́ Siaga nɛ́ Yakuba mɛ́ wè, nɛ́ ki juu pe mɛ́ nɛ́ jo: ‹Muɔ siimɛ pire mɛ́ mi bága kùlo náà kɛn lè.› 2 M'bé mi nyìʔɛnɛ tundunwɔ tórigo wè muɔ yiʔɛ mɛ́, bé sí Kanaa siɛnnɛ cìra bèle bè yige, peli nɛ́ Amɔriyé ní bèle, nɛ́ Etiyé, nɛ́ Pereziyé, nɛ́ Eviyé nɛ́ Jebusiyé ní bèle. 3 Mi nyìʔɛnɛ tundunwɔ wi bé yeli yiʔɛ kíni gè bè kɛ́ kùlo náà nī lè tiʔɛ gíì nī nɛ̀yirimɛ nɛ́ sárigɛ kiī nɛ fúu gèa. Mi wè, miǐ ga tíi puu yeli sunʔɔmɔ nī bèʔ, bè kɛ́ nɛ́ yeli níʔ, nɛ́ ki cɛ́n yeli yē cíimɛ siɛnnɛ; a mi yē nɛ́ yeli ní wè, dùʔɔ mi bága yeli kpúu koligo nɛ̄ gè.»4 Bà siɛnnɛ pe 'siɛngbɛnrɛ dáà lúʔu dè, a ki 'kò pe mɛ́ kayaʔa a céri ti 'kùu pe nɛ̄; wàa nigbe sì ń'nɛ̀ fɔ̀li nɛ́ wìi fériʔ. 5 Nɛ́ ki cɛ́n, Yewe cé ki juu nɛ̀ gbɛ̀ngɛ Misa mɛ́ nɛ́ jo wi- ki juu Isirayɛli siɛnnɛ mɛ́ bèle wi pe yɛ: «Yeli yē cíimɛ siɛnnɛ ! A mi nɛ tári yeli sunʔɔmɔ nī bè nɛ̀ cɛ́nì lɛ̀lɛ cɛ̀ri kúɔ wè, ki bé gbɛ̀ nyaa mi bé yeli ye mìɛni kpúu péwu ! Kire nɛ̄ ye- yeli nàbuɔrɔ yɛrɛ ti mìɛni yige, bà mi bé ki wéli kɛnmɛ bíì nɛ̄ m'bé yeli nàʔa bè síɛ wè.»
6 Kire nɛ̄ a Isirayɛli siɛnnɛ pe mìɛni 'fali nɛ̀ pe nàbuɔrɔ yɛrɛ ti mìɛni kɔ̀n pìye nɛ̄, piyè ń'nɛ̀ ti leʔ nɛ̀ ki séli baa Worɛbi nyagurugo tiʔɛ nī gè.
Misa 'kpàlidiʔɛ káà kpíʔile
7 Misa yé dàli nɛ fɛ̀ni saʔa káà líi nɛ ki tɛ́ngi liilige bùguro nɛ̄ dè, níɛ ki ye Kpàlidiʔɛ Kpátaʔa. A ŋìi 'puu nɛ caa bè Yewe yúgo wè kaala láà nɛ̄ wè, kire siɛn wi yé yɛli bè yiri bùguro nī dè bè kɛ́ Kpàlidiʔɛ Kpátaʔa mɛ́ gè. 8 Lɛ̀lɛ ó lɛ̀lɛ nī Misa cé gbɛ̀ni yiri nɛ waa Kpátaʔa mɛ́ gè, siɛnnɛ pe mìɛni nɛ̂ yiri nɛ̀ yéri pe fɛ̀ni saaya wìʔile nɛ̄ gèle nɛ Misa wéli wè, wi níɛ waa fúɔ bè taa wi nɛ̂ sɛ́nì jíin Kpátaʔa wìile nī lè. 9 A wi yé sɛ́nì jíin Kpátaʔa nī gè, kàsadibagɛ gáà ki 'tɔni nɛ̀ cùungu gè, ki nɛ̂ tìgi nɛ̀ pɛ́nì yéri wìile yiʔɛ mɛ́ gè, á Yewe níɛ nyu nɛ́ Misa ní wè. 10 A siɛnnɛ pe mìɛni cé gbɛ̀ni kàsadibagɛ sìtɔnigɔ nyaa gè a ki 'wìile yiʔɛ tɔ́n gè, siɛnnɛ pe mìɛni nɛ̂ yɛ̀ nɛ̀ tuu nɛ́ cúbulo pe fɛ̀ni saaya wìʔile yiʔɛ mɛ́ gè. 11 Yewe puu nɛ nyu nɛ́ Misa ní nyuɔ nɛ́ nyuɔ, majo bɛ̀ siɛn cî nɛ nyu nɛ́ wi nàgori ní kɛnmɛ bíì nɛ̄ wè. Kire kàduʔumɛ Misa nɛ pɛ́ni jíin bùguro nī dè, nɛ̀ ki yaʔa wi baakuɔwɔ Nuni jaa Yesuwe wè, nàgapunwɔ wè, wire sì puu nɛ laʔa baa Kpátaʔa laamɛ nī bèʔ.
12 Cɛngɛ káà a Misa kɛ́nì ki juu Yewe mɛ́ wè nɛ́ jo: «-Ki wéli ! Muɔ nɛ ki nyu muɔ tíimɛ wè nɛ́ jo mi- siɛnnɛ yige bèle mi de waa, nɛ̀ sí ki yaʔa muɔ sì ki tìɛ mi nɛ̄ ŋàa muɔ je tun nɛ́ mi ní wèʔ. Nɛ̀ ki yaʔa muɔ tíimɛ muɔ yé jo muɔ nyɛ́nì mi cɛ́n mi míʔɛ nɛ̄ gè, nɛ́ míɛni, mi nyɛ́nì kpuʔɔrɔ taa muɔ mɛ́. 13 A ki sí yē kányiʔɛ mi nyɛ́nì kpuʔɔrɔ taa muɔ yiʔɛ mɛ́ gè, ma sí muɔ koligo tìɛ gè mi nɛ̄, kire ga buu mi- gbɛ̀ muɔ cɛ́n bé sí de kpuʔɔrɔ tari dè súuri muɔ yiʔɛ mɛ́. Nɛ́ míɛni, ma sí ki cɛ́n kùpolo náà siɛnnɛ bèle, piyē muɔ wuulo.»
14 A Yewe sí ki juu nɛ́ jo: «Mi tíimɛ m'béri tári muɔ yiʔɛ mɛ́ gè, bé ŋɔ́daala kɛn muɔ mɛ́.»
15 A Misa sí wi yɛ: «A muɔ wè nɛ tári muɔ tíimɛ wèʔ nɛ́ weli ní bèle, ma fǎga weli yige náʔa gèʔ. 16 Mɛni siɛnsɛnminɛ bílì pe bága ki cɛ́n mi nyɛ́nì kpuʔɔrɔ taa muɔ yiʔɛ mɛ́ gè, mi nɛ́ muɔ siɛnnɛ ní bèle ? A ki 'nyaa muɔ tíimɛ yē nɛ tári nɛ́ weli ní wè, kire ga buu ki- puu fìɛ mi nɛ́ muɔ siɛnnɛ ní bèle, siɛnsɛnminɛ pé sí ki cɛ́n muɔ wàlimɛ kpíʔile weli nɛ́ siɛnsɛnminɛ sunʔɔmɔ nī bè dàala nɛ̄ lè ?»
17 A Yewe sí Misa yɛ wè: «Dàa muɔ 'péli nɛ̀ juu dè m'bé ki kpíʔile míɛni, nɛ́ ki cɛ́n muɔ nyɛ́nì kpuʔɔrɔ taa mi yiʔɛ mɛ́ gè, nɛ́ míɛni mi nyɛ́nì muɔ cɛ́n muɔ míʔɛ nɛ̄ gè.»
18 A Misa sí jo: «-Ki yaʔa mi- muɔ cɛ̀nmɛ nɛ́ muɔ kpuɔmɔ nyaa bè !»
19 A Yewe sí ki juu nɛ́ jo: «M'bé mi funjɛ̀ngɛ ki mìɛni yaʔa ki tóri muɔ yiʔɛ mɛ́, bé sí mi míʔɛ yeri gè muɔ mɛ́, Yewe wè; kire nɛ ki tìí ŋàa mi yē wè. M'bé kpuʔɔrɔ kɛn siɛn ŋáà mɛ́ mi je ti kɛn wè, mi míɛni bé nyinimɛ taa siɛn ŋáà nɛ̄ m'bé nyinimɛ taa wèb. 20 Nɛ̀ ki yaʔa muɔ sǐ gbɛ̀ mi yiʔɛ nyaa gèʔ, nɛ́ ki cɛ́n siɛn sǐ gbɛ̀ mi yiʔɛ nyaa gè bé sí ní kò sìi nɛ̄ʔ.»
21 A Yewe sí ń'nɛ̀ ki juu nɛ́ jo: «Tiʔɛ káà yē náʔa mi táanni, muɔ bé sa yéri baa kàdɛnigbaala naamɛ gè. 22 A mi cɛ̀nmɛ nɛ́ mi kpuɔmɔ pi kɛ́nì tóri wè, m'bé muɔ líɛ nyɔ́gɔ kàdɛnijaʔa káà sunʔɔmɔ nī, bé sí mi kadaala tíʔɛ lè bè muɔ tɔ́n fúɔ bè taa mi- pa tóri bè kúɔ. 23 Kire kàduʔumɛ gè, m'bé kɔli láʔa gè dí muɔ sí mi kàduʔu kire yákuɔ nyaa, nɛ́ ki cɛ́n siɛn sǐ gbɛ̀ mi yiʔɛ nyaa gèʔ.»