Yewe 'nyakungɛngɛ juu gè nɛ̀ fùgu
34
1 A Yewe wi ń'nɛ̀ ki juu Misa mɛ́ wè nɛ́ jo: «Koli ma kàdɛniyɛ yáà siin tɛn, bɛ̀ péliye tíɛlɛ yè. M'bé ní mi siɛnrɛ sɛbɛ dè yi nɛ̄ dàa ti yé kíni nɛ̀ puu péliye nɛ̄ yè, nyàa muɔ 'jabari yè. 2 Mìɛ gbòbori ma yaʔa mbànʔa sínbinimɛ táanni bè. Muɔ bé tánʔa sínbiniwuuro nī dè Sinayii nyagurugo nɛ̄ gè, bà muɔ bé yéri mi yiʔɛ mɛ́ gè nyagurugo naamɛ gè. 3 Siɛn sì yɛli bè tánʔa nɛ́ muɔ níʔ; siɛn sì yɛli bè cɛ nyaa míɛni nyagurugo nɛ̄ gèʔ. Kiì cɛ́nì yɛli sìnbuɔ, kire ga laa síkpuɔ, kire ga laa nùɔ cɛ nyàʔa káa nyagurugo táanni gè wīʔ.»4 A Misa 'kàdɛniyɛ siin tɛn yè, bɛ̀ péliye tíɛlɛ yè. Ki kpìɛnduu sínbinimɛ táanni bè, a wi 'yɛ̀ faʔa nɛ̀ sɛ́nì tánʔa Sinayii nyagurugo nɛ̄ gè, majo bɛ̀ Yewe cé ki juu nɛ̀ gbɛ̀ngɛ wi mɛ́ gè. Kàdɛnitɛnyɛ siin yi 'puu wi mɛ́ kiyɛ nī yè.
5 A Yewe 'tìgi kàsadibagɛ nī gè nɛ̀ yéri baa nɛ́ Misa ní wè, nɛ́ wi tíimɛ míʔɛ yeri gè, 6 nɛ́ tóri wi yiʔɛ mɛ́ gè, nɛ́ jo: «Yewe ! Mi yē Yewe ! Mi yē nyinidaaguugo Kulocɛliɛ níɛ kpuʔɔrɔ kanʔa siɛnnɛ mɛ́ bèle. Mi fungo kiì yɛ̀ madɛniʔ; bànguɔ dɛ́nigɛfɔli wī mi wè, nɛ́ ní kányiʔɛfɔlia. 7 Mi nɛ bànguɔ dɛ́nigɛ nii nɛ́ siɛnnɛ ní bèle fúɔ bè sa nɔ̀ kɛ̀ngɛlɛ sirakogunɔwoli nɛ̄ lè. Mi nɛ kolimɔ, nɛ́ tuudiɛlɛ, nɛ́ kapiile yɛri lè siɛnnɛ nɛ̄ bèle, nɛ̀ ki yaʔa mi wè tànʔa kanʔa siɛn mɛ́ʔ ŋàa wī kolimɔfɔli wèʔ; mi nɛ̂ tuufɔlilɔ pe kolimɔ tari bè pe pìile nɛ̄ bèle, fúɔ bè taa kɛ̀ngɛlɛ taanriwoli nɛ́ sicɛriwoli nɛ̄ lè.»
8 A Misa 'fali nɛ̀ tuu nɛ̀ cúbulo nɛ̀ Yewe gbùʔɔrɔ, 9 nɛ́ jo: «Mi Kàfɔli, a ki yē kányiʔɛ mi 'kpuʔɔrɔ taa muɔ yiʔɛ mɛ́ gè, mi nɛ muɔ fiɛn wī, mi Kàfɔli: te tári weli sunʔɔmɔ nī bè. Mi 'ki cɛ́n, siɛnnɛ bálì pe yē cíimɛ siɛnnɛ. Kire nɛ́ ki mìɛni -weli kolimɔ nɛ́ weli kapiʔile yaʔa gèle weli nɛ̄, ma weli kpíʔile muɔ kɔrigɔ.»
10 A Yewe sí wi yɛ: «-Ki wéli, m'bé ní nyakungɛngɛ káà kpíʔile nɛ́ yeli ní. Siɛnnɛ pe mìɛni nyaamɛ nɛ̄, m'bé kakpoliyo kpíʔile fúɔ nyàa siɛnnɛ piyè fìɛ cɛ́nì nyaa nɛ̀ nyaa yèʔ, dàala ni mìɛni nɛ̄ lè nɛ́ kùlogolo nī gèleʔ. Siɛnnɛ bálì pe mìɛni pe 'yeli màʔa nɛ̀ suʔu bèle, pe bé ki nyaa kiī fíɛrɛwuʔu gàa mi nɛ kpínʔini nɛ́ yeli ní bèle.
11 «Ye- yìye cò díɛʔ gàa m'bé juu bè gbɛ̀ngɛ yeli mɛ́ pàngɛ gè. M'bé Amɔriyé cìra bèle yeli yiʔɛ mɛ́, nɛ́ Kanaa siɛnnɛ, nɛ́ Eti siɛnnɛ, nɛ́ Perezi siɛnnɛ, nɛ́ Evi siɛnnɛ, nɛ́ Jebusi siɛnnɛ ní bèle. 12 Yeli fǎga nyakungɛngɛ kpíʔile nɛ́ kùlo náà ni siɛnnɛ ní bèle baa yeli nɛ waaʔ, kire ga laa pe fǎga puu gárigɛ yeli sunʔɔmɔ nīʔ. 13 Yeli bé pe sundiɛyɛ kpúɔn yè cúʔɔ, bé pe kàdɛnicɔriyɔb kpúɔn yè muʔɔrɔ nyàa pe 'kpíʔile pe sundiɛyɛ nī yè, bé Asɛra tiikoriyeriyec kɔ́ligi yè bè cáan. 14 Yeli wáà sì yɛli bága káguro cáan pe kulocɛliɛ wáà táanniʔ, nɛ́ ki cɛ́n mi Yewe wè, mi yē yejaʔafɔli. Yejaʔa Kulocɛliɛ wī mi wè.
15 «Yeli fǎga nyakungɛngɛ kpíʔile nɛ́ kùlo náà siɛnnɛ ní bèleʔ, nɛ́ ki cɛ́n bà piyē nɛ yasunro sungu dè, pe mìɛni kò bɛ̀ nàjaacɛlilɛ tíɛlɛ bàli pe pìye kanʔa pàli mɛ́ bèle. Lɛ̀lɛ líì nī piyē nɛ yasunro sungu dè, pe bága yeli kɔ́ri yeli- pe yasunro kaara táà káa, dí yeli sí ki kpíʔile. 16 Dí yeli míɛni gari pe pórilo líi bèle bèri kanʔa yeli jaala mɛ́ bèle, nɛ́ pe pórilo míɛni pe béri pe yasunro sungu dè, bɛ̀ nàjaacɛlilɛ tíɛlɛ bàli pe pìye kanʔa pàli mɛ́ bèle, bága yeli jaala kɔ́ri bèle peri ki kpínʔini bɛ̀ míɛni.
17 «Yeli fǎga timɔri yasungo káà kpíʔileʔd.
18 «Yeli 'yɛli bèri Sìnvarifun Búru Fundaanra tánʔagbuɔlɔ kpínʔini lè. Cɛnyɛ kɔlisiin sunʔɔmɔ nī bè, Yaliire Puru yege nī gè, yeli béri sìnvarifun búru káa wè majo bɛ̀ mi 'ki juu nɛ̀ gbɛ̀ngɛ yeli mɛ́ bèle, nɛ́ ki cɛ́n Yaliire Puru yege kire nī yeli nyɛ́nì yiri Ezipiti kùlo nī lèe.
19 «Jaafɔpelile pe mìɛni yē mi wuulo, nɛ́ yajuuro ti pìpelile bálì bīɛlɛ nàguɔlɔ bèle, a ki yē nùɔ yo, sìnbuɔ yo, síkpuɔ yof. 20 A ki pɛ́nì nyaa sèfɛngɛlɛ pìpelile bèle, yeli bé pe fɛ̀ni nɛ́ sìnbapigele ní kire ga laa nɛ́ síkapigele ní gèle, bà ki bé kpíʔile yeli bé ti fùgu bè suɔ. Á kire bɛ̀ʔ gè, yeli bé yétiige ŋáʔana gè bè kaa ti nɛ̄. A ki 'nyaa siɛnnɛ jaapelile bèle, yeli bé pe fùgu suɔ.
«Yeli sì yɛli bága pɛn mi mɛ́ nɛ́ kiyɛ ní yē waayaʔg.
21 «Yeli bé baara cɛnyɛ kɔlini cégboli nī lè; kɔlisiinwuʔu nɛ̄ gè muɔ 'yɛli bè ŋɔ́ daa. A ki cɛ́nì nyaa tànyiʔɛ kɔ̀n lɛ̀lɛ nī yo, nɛ́ yaliire líɛ lɛ̀lɛ nī yo, yeli 'yɛli bè ŋɔ́ daah.
22 «Yeli 'yɛli bèri tɔ́ri nɛ́ Yaliipelide Líɛ Lɛ̀lɛ Fundaanra tánʔagbuɔlɔi ní lè, bè Cégbuʔulo Fundaanra kpíʔile dè, bè yeli bíle yaliipelide kɛ́n dè. Nɛ́ míɛni yeli béri Yaliire Líɛ Lɛ̀lɛ Fundaanra tánʔagbuɔlɔ kpínʔini dè, yiɛlɛ ni kúɔmɔ mɛ́ bè. 23 Tɔliyɔ taanri yiɛlɛ nī lè, yeli nàguɔlɔ pe mìɛni 'yɛli pe- pɛn mi yiʔɛ mɛ́ gè, mi ŋáà wī Kàfɔli Yewe wè, Isirayɛliyé Kulocɛliɛ wè. 24 Nɛ́ ki cɛ́n m'bé kùlogolo siɛnnɛ cìra bèle bè yige yeli yiʔɛ mɛ́, bè kàa fàri yeli kùlo nɛ̄ lè. Siɛn sǐ ga tíi yɛ̀ bè yeli kùlo suɔ lè yeli mɛ́ lɛ̀lɛ líì nī yeli nɛ báan Yewe yeli Kulocɛliɛ yiʔɛ mɛ́ gè, tɔliyɔ taanri yiɛlɛ nī lèʔ.
25 «Yeli sì yɛli bè yajuʔu káà sìsiɛn woʔ, gàa pe 'kpúu Yewe kakuɔrɔ wuʔu gè, yakaa nɛ̄ gàa gī sìnvari ní dèʔ. Yeli sì yɛli bè Torimakiyaʔa kaara táà tɛ́ngɛ ti- suɔnʔj.
26 «Yeli 'yɛli bè yeli siiye yaliipelide líɛ dè bè pɛn nɛ́ ti ní Yewe yeli Kulocɛliɛ saʔa mɛ́ gè.
«Yeli sì yɛli bè síkapile ni yàa yírimɛ tíʔɛ bè, bè ni suʔɔʔk.»
27 A Yewe ń'nɛ̀ ki juu Misa mɛ́ nɛ́ jo: «-Siɛnrɛ dáà sɛbɛ dè. Nɛ́ ki cɛ́n nyakungɛngɛ gáà mi 'kpíʔile nɛ́ muɔ ní nɛ́ Isirayɛli siɛnnɛ ní bèle, mi 'ki kpíʔile nɛ̀ yɛli nɛ́ siɛnrɛ dáà ní dè.»
28 A Misa 'kò baa nɛ́ Yewe ní fúɔ nɛ̀ taa cɛnyɛ togosiin nɛ́ pìliye togosiin. Wiì lìiʔ; wi míɛni sì luʔɔ gbuɔʔ. A wi 'kajuudiʔɛlɛ kiɛ sɛbɛ gèle kàdɛnitɛnyɛ siin nɛ̄ yè, nyakungɛngɛ siɛnrɛ dè.
Misa yiʔɛ ki 'yiʔɛ nɛ nyíʔɛnɛ
29 Bà Misa kɛ́nì tìgi Sinayii nyagurugo nɛ̄ gè, nɛ́ nyakungɛngɛ siɛnrɛ kàdɛnitɛnyɛ siin ní yè wi kiyɛ nī yè, wiì cé ki cɛ́n wire yiʔɛ ki yé kò nɛ̀ nyíʔɛnɛʔ, lɛ̀lɛ líì nī wi 'puu nɛ nyu nɛ́ Yewe ní wèʔ.
30 Bà Arawɔn nɛ́ Isirayɛli siɛnnɛ pe kɛ́nì Misa nyaa wè, a pe 'ki nyaa wi yiʔɛ ki 'puu nɛ nyíʔɛnɛ, pe 'puu nɛ fìʔɛ́ bè sìʔɛrɛ bè kpɔni wi nɛ̄ʔ.
31 A Misa sí pe yeri, a Arawɔn nɛ́ Isirayɛli tògo kàfɔlilɔ pe mìɛni ní bèle, a pe 'pɛn wi kúrugu, a wi pɛ́nì juu nɛ́ pe ní.
32 Kire kàduʔumɛ gè, a Isirayɛli siɛnnɛ pe mìɛni sìʔɛrɛ nɛ̀ kpɔni wi nɛ̄, a wi 'siɛnrɛ juu dè pe mɛ́ dàa Yewe yé juu nɛ̀ gbɛ̀ngɛ wi mɛ́ dè, Sinayii nyagurugo nɛ̄ gè.
33 Bà Misa 'juu nɛ̀ kúɔ nɛ́ pe ní wè, a wi 'wi yiʔɛ tɔ́n gè nɛ́ fɛ̀ni ní. 34 A Misa gbɛ̀ni je jíin Yewe yiʔɛ mɛ́ gè bè juu nɛ́ wi ní wè, wi nɛ̂ cé fɛ̀ni láʔa wè yiʔɛ nɛ̄ gè fúɔ bè taa wi- pa yiri. A wi cé gbɛ̀ni yiri wè, wi nɛ̂ ki juu Isirayɛli siɛnnɛ mɛ́ bèle dàa Yewe cé juu nɛ̀ gbɛ̀ngɛ wire mɛ́ dè.
35 A Isirayɛli siɛnnɛ pe gbɛ̀ni Misa yiʔɛ nyaa gè, bɛ̀ ki 'puu nɛ nyíʔɛnɛ gè, Misa nɛ̂ koli nɛ̀ fɛ̀ni tɔ́n wè wi yiʔɛ nɛ̄ gè fúɔ bè taa wi ní ga koli bè sa juu nɛ́ Yewe ní wè.