YEWE 'WI ISIRAYƐLIYÉ YIGE BELE KULO NI LE
(5.1–13.16)
Farawɔn sì yéri Misa siɛnrɛ nɛ̄ dèʔ
5
1 Kire kàduʔumɛ gè, a Misa nɛ́ Arawɔn sɛ́nì jíin Farawɔn kúrugu wè, nɛ̀ wi yɛ: «Ti n'dɛ dàa Yewe 'juu dè, Isirayɛli siɛnnɛ Kulocɛliɛ wè, wi jo: ‹-Mi siɛnnɛ yaʔa bèle pe- kɛ́ waama kùlo mɛ́ lè pe- sa Kulocɛliɛ gbùʔɔrɔ wè.› »2 A Farawɔn sí jo: «Ŋáa wī Yewe wè, dí mi- sí lúʔu wi mɛ́, bé Isirayɛli siɛnnɛ yaʔa bèle pe- kɛ́ ? Mi sì Yewe cɛ́n wèʔ. Yeli Isirayɛliyé bèle, miǐ ga tíi yeli yaʔa yeli kɛ́ʔ.»
3 A pe sí jo: «Eburulo Kulocɛliɛ wi 'wìi tìɛ weli nɛ̄. Píra ŋáà nī wè weli nɛ muɔ fiɛn wī, -weli yaʔa weli- kɛ́ bè sa cɛnyɛ taanri tánʔana tánʔa waama kùlo nī lè bè kakuɔrɔ yajuuro kpúu dè Yewe weli Kulocɛliɛ mɛ́ wèa, kire ga laa wi fǎga wuʔɔgɔ cáan weli nɛ̄ʔ, gàa gī káfaligɛ yaama bè, kire ga buu kapiɛngbuɔn ŋɔnɔ lè.»
4 A Ezipiti kùlofɔli wi 'jo: «Misa nɛ́ Arawɔn yo, gáa nɛ̄ yeli nɛ sàliyɛ nyɔ́gi siɛnnɛ nī bèle bè pe láʔa baara nɛ̄ dè ? Yeri waa yeli parituɔrɔ kúrugu dè !» 5 A Farawɔn 'ki sɔ̀ngi nɛ̀ jo: «Ye- ki wéli, píra ŋáà nī wè, siɛnnɛ pe nyɛ́nì kò nìʔɛnɛ; á yeli bèle, yeli sí nɛ caa pe- ŋɔ́ pe taa, pé sí parituɔrɔ yaʔa dè !»
6 Kire cɛnnugo gè, a Farawɔn 'ki juu nɛ̀ gbɛ̀ngɛ Ezipiti siɛnnɛ mɛ́ bèle bàli pe 'puu parituɔrɔ ti wélifɔlilɔ bèle, nɛ́ Isirayɛli siɛnnɛ yiɛgininɛ ní bèle, nɛ́ jo: 7 «Ye fǎga ní de waa de nyàsige kanʔa gè siɛnnɛ mɛ́ bèleʔ peri jìfaa kpúɔn wèʔ, bɛ̀ ki 'puu nɛ kpínʔini faʔa gèʔ ! Peli tíimɛ pe béri waa bè sari nyàsige caa gè, gàa nɛ̄ pe màakuu wi yē wè. 8 Yeli bé sí pe cò fànʔa peri jìfaa kpúɔn wè wi nyuɔ nɛ̄ gè, nyuɔ gíì pe kíni nɛ kpúɔn faʔa gè, yeli sǐ ga tíi yafiɛn yige ki nīʔ, nɛ́ ki cɛ́n sàliyɛfɔlilɔ bīɛlɛ. Kire nɛ̄ piyē nɛ yékpuʔulo wáari gèle nɛ́ jo: ‹We- kɛ́ we sa yajuuro kpúu weli Kulocɛliɛ mɛ́.› 9 Ye- fùrɔgɔ taʔa siɛnnɛ bálì nɛ̄ bèle kátii nɛ́ baagbɛnrɛ ní dè, peri ti kúu, pe fǎga de káfinɛrɛ siɛnrɛ dáà lúru dèʔ.»
10 A parituɔrɔ wélifɔlilɔ nɛ́ Isirayɛli siɛnnɛ yiɛgininɛ pe 'yiri nɛ̀ ki juu siɛnnɛ mɛ́ bèle nɛ́ jo: «Farawɔn 'jo wire sǐ ní ga tíi nyàsige kɛn yeli mɛ́ʔ. 11 Yeli tíimɛ bèle, yeri waa ye sari nyàsige caa gè tiʔɛ gíì nī yeli bé ki taa wè. Ye- sí ki cɛ́n, yakaa sǐ ga tíi yiri jìfaa wi nyuɔ nī gèʔ !»
12 A siɛnnɛ pe mìɛni 'yiri nɛ̀ cɛ̀ri Ezipiti kùlo nī lè bè sari nyàsige caa gè, bè pa jìfaa kpúɔn wè.
13 Parituɔrɔ ti wélifɔlilɔ pe 'puu nɛ pe wuʔɔ nɛ́ jo: «Yeri jìfaa kpúɔn wè ! Ye- jìfaa wi nyuɔ taa gè gàa pe 'tìɛ cɛngɛ ó cɛngɛ gè, majo bɛ̀ ki 'puu faʔa gè á piyē nɛ nyàsige kanʔa gè yeli mɛ́ wè.»
14 A pe 'Isirayɛli siɛnnɛ yiɛgininɛ kpúɔn bèle, bàli parituɔrɔ ti wélifɔlilɔ pe cé tɛ́ngɛ bèle, nɛ́ pe yúgo: «Gáa nɛ̄ siɛnnɛ piyè jáa nɛ̀ jìfaa wi nyuɔ kpúɔn gè nɛ̀ taaʔ mbànʔa gè nɛ́ pàngɛ ní wè ?»
15 A Isirayɛli siɛnnɛ yiɛgininɛ pe 'pɛn nɛ̀ pɛ́nì kúnʔɔri Farawɔn nɛ̄ wè nɛ́ jo: «Gáa nɛ̄ muɔ 'ki kpíʔile muɔ baakuɔlɔ nɛ̄ bèle mmɛ gè ? 16 Pe ní wè nyàsige kanʔa gè muɔ baakuɔlɔ mɛ́ bèleʔ, á pe sí jo weri jìfaa kpúɔn wè ! -Ki wéli, pe nyɛ́nì weli kpúɔn, weli bálì bīɛlɛ muɔ baakuɔlɔ bèle. Muɔ siɛnnɛ pe nyɛ́nì koli.»
17 A Farawɔn sí pe yɛ: «Yeli tɔ̀ni yē sàliyɛfɔlilɔ, kire nɛ̄ yeli 'jo: ‹Weli nɛ caa bè kɛ́ bè sa Yewe gbùʔɔrɔ.› 18 Píra ŋáà nī wè, yeri waa ye sari baara ! Piyě ní de nyàsige kanʔa gè yeli mɛ́ cíginiʔ ! Kire nɛ́ ki mìɛni yeli béri jìfaa wi nyuɔ kpúɔn gè, gàa mi 'tìɛ gè.»
19 A Isirayɛliyé yiɛgininɛ pe 'ki nyaa gàa ki 'peli taa gè ki tɔ̀ni nɛ̀ puu gbɛ̀ngɛ, bà pe 'ki juu nɛ́ jo piyè yɛli bè kàa yige jìfaa wi nyuɔ nī gè gàa peli nɛ kpúɔn cɛngɛ ó cɛngɛ gèʔ. 20 Bà pe 'yiri Farawɔn tiʔɛ nī gè, a pe 'kpàli Misa nɛ́ Arawɔn ní, peli bálì pe 'puu nɛ pe siri bèle. 21 A pe 'ki juu pe mɛ́ nɛ́ jo: «Yewe wi- de yeli nyaʔa bè kàyuʔu juu gè yeli nɛ̄! Nɛ́ ki cɛ́n, yeli 'ki yaʔa weli láa 'kúɔ Farawɔn nī wè, nɛ́ wi siɛnnɛ ní bèle. Yeli 'tànʔa kɛn pe mɛ́ pe- weli kpúu.»
22 A Misa 'yiʔɛ nɛ̀ ki juu Yewe mɛ́ nɛ́ jo: «Mi Kàfɔli, gáa nɛ̄ muɔ 'kapiʔi kpíʔile siɛnnɛ bálì nɛ̄ bèle ? Gáa sí nɛ̄ muɔ 'mi tun náʔa gè ? 23 Nɛ̀ líɛ bà mi pɛ́nì juu nɛ́ Farawɔn ní wè muɔ míʔɛ nɛ̄ gè, a wi 'kàa taʔa siɛnnɛ bálì pe wuʔɔgɔ nɛ̄ gè. Nɛ́ míɛni, muɔ sì yafiɛn kpíʔile nɛ̀ muɔ siɛnnɛ suɔ bèleʔ.»