Kulocɛliɛ 'jo wire bé Isirayɛli siɛnnɛ suɔ bèle
6
1 A Yewe 'Misa yɛ wè: «Píra ŋáà nī wè muɔ bé ki nyaa gàa m'bé kpíʔile Farawɔn nɛ̄ wè.Mi ŋɔri kɔli ki bé wi ŋàʔana wi- mi siɛnnɛ yaʔa bèle pe- kɛ́;
mi ŋɔri kɔli ki bé wi ŋàʔana wi bé pe cìra bè yige wi kùlo nī lè.»
2 A Kulocɛliɛ ń'nɛ̀ ki juu Misa mɛ́ nɛ́ jo: «Mi yē Yewea. 3 Mi 'nìɛ tìɛ Birayima nɛ̄, nɛ̀ nìɛ tìɛ Siaga nɛ̄, nɛ̀ nìɛ tìɛ Yakuba nɛ̄, majo Ŋɔri Ti Mìɛni Kulocɛliɛ wèb, nɛ̀ ki yaʔa piyè cé mi cɛ́n míʔɛ gáà nɛ̄ gèʔ, Yewe wèʔ. 4 Mi nyɛ́nì mi nyakungɛngɛ kpíʔile gè nɛ́ pe ní bè Kanaa kùlo kɛn lè pe mɛ́, lire náà nī pe 'puu nabɔnminɔ bèle níɛ nyaari ni nī lè. 5 Ki 'nyaa, mi tíimɛ nyɛ́nì Isirayɛli siɛnnɛ pe cíɛnmɛ lúʔu bè, peli bálì bīɛlɛ Ezipiti siɛnnɛ piyē nɛ wuʔɔ sùkulomɔ nɛ̄ bè, a mi 'sɔ̀ngi nɛ̀ taa nɛ́ mi nyakungɛngɛ ní gè. 6 Kire kɛnmɛ nɛ̄ ma ki juu Isirayɛli siɛnnɛ mɛ́ bèle:
Mi yē Yewe.
M'bé yeli suɔ bè yige Ezipiti siɛnnɛ pe parituɔrɔ mɛ́ dè.
M'bé yeli suɔ baagbɛnrɛ dáà mɛ́ dè.
M'bé ní yeli fùgu suɔ nɛ́ mi ŋɔri kɔli ní gè,
bé sí kàyuʔukpoliyo juu pe nɛ̄.
7 M'bé yeli líɛ mi siɛnnɛ; yeli bèle, m'bé puu yeli Kulocɛliɛc.
Yeli bé ki cɛ́n mi yē Yewe, yeli Kulocɛliɛ wè,
mi ŋáà mi 'yeli yige parituɔrɔ nī dè Ezipiti kùlo nī lè.
8 M'bé yeli nyɔ́gɔ kùlo nī lè nàa nɛ̄ mi 'kɔli yɛ̀gɛ gè
nɛ́ ni kɛn Birayima mɛ́ wè, nɛ́ Siaga, nɛ́ Yakuba ní wè.
M'bé ni kɛn yeli mɛ́ ni bé kò yeli woli.
Mi yē Yewe.»
9 A Misa 'siɛnrɛ dáà ti mìɛni juu Isirayɛli siɛnnɛ mɛ́ bèle. Kire nɛ́ ki mìɛni piyè cɛ́nì lúʔu ti nɛ̄ʔ, nɛ́ ki cɛ́n funbiɛnrɛ ti cé niʔɛ pe nī, sùkulomɔ pire kɛnmɛ nɛ̄.
10 A Yewe ń'nɛ̀ juu nɛ́ Misa ní wè nɛ́ jo: 11 «Te waa, ma sa ki juu Farawɔn mɛ́ wè, Ezipiti kùlofɔli wè, wi- Isirayɛli siɛnnɛ yaʔa bèle pe- yiri wi kùlo nī lè.»
12 A Misa sí siɛnnugoro kɛn dè Yewe mɛ́ wè nɛ́ jo: «Isirayɛli siɛnnɛ tíimɛ peli sì cɛ́nì lúʔu m'mɛ́ʔ, mɛni sí Farawɔn wire bága lúʔu m'mɛ́, mi ŋáà wī siɛnrɛ ti wè nɛ waa mi nɛ̄ wèʔd ?»
13 A Yewe 'juu nɛ́ Misa nɛ́ Arawɔn ní wè, nɛ̀ ki juu nɛ̀ gbɛ̀ngɛ pe mɛ́ gàa ki 'Isirayɛli siɛnnɛ wuʔu kúɔ gè, nɛ́ Farawɔn wuʔu ní gè, Ezipiti kùlofɔli wè, gàa ki bé ki yaʔa dí Isirayɛli siɛnnɛ pe- yiri Ezipiti kùlo nī lè.
Misa nɛ́ Arawɔn tobilo nariyɛ yè
14 Tuufɔlilɔ kpáaya yi kàfɔlilɔ peli míɛyɛ yire yī nyàa yè:
Wurubɛni jaala peli bīɛlɛ bàli bèle, Isirayɛli jaapeliwe wè: Anɔki, Palu, Ezurɔn nɛ́ Karimii. Bàli peli bīɛlɛ Wurubɛni nariyɛ yèe.
15 Simɛyɔ jaala peli bīɛlɛ bàli bèle: Yemuwɛli, Yamɛ, Woyadi, Yakɛn, Zokari nɛ́ Sawuli, wire ŋáà wi 'puu Kanaayé cuɔ wi jaa wè. Peli bīɛlɛ Simɛyɔ nariyɛ yè.
16 Levii jaala pe míɛyɛ yire yī nyàa yè nɛ̀ yɛli nɛ́ pe tùluyo ní yè: Gerisɔn, Keyati nɛ́ Mɛrarii. A Levii sìi yiʔɛlɛ ke mìɛni bìnɛ wi 'nyaa yiʔɛlɛ tekɔlini nɛ́ kpɔrigɔ nɛ́ kɔlisiin (137). 17 Gerisɔn jaala peli bīɛlɛ bàli bèle: Libinii, nɛ́ Simɛyii, nɛ̀ yɛli nɛ́ pe nariyɛ ní yè. 18 Keyati jaala peli bīɛlɛ bàli bèle: Amirami, Yisekari, Eburɔn nɛ́ Uziyɛli. A Keyati sìi yiʔɛlɛ ke mìɛni bìnɛ wi 'nyaa yiʔɛlɛ tekɔlini nɛ́ kpɔrigɔ nɛ́ taanri (133). 19 Mɛrarii jaala peli bīɛlɛ bàli bèle: Makilii, nɛ́ Musiyi. Peli bīɛlɛ Leviiyé nariyɛ yè nɛ̀ yɛli nɛ́ pe tùluyo ní yè.
20 A Amirami 'wi tuu cɔni Yokebɛdi líɛ cɛliwɛ, a wi 'Arawɔn nɛ́ Misa sii wi mɛ́. A Amirami sìi yiʔɛlɛ ke mìɛni bìnɛ wi 'nyaa yiʔɛlɛ tekɔlini nɛ́ kpɔrigɔ nɛ́ kɔlisiin (137).
21 Yisekari jaala peli bīɛlɛ bàli bèle: Kore, Nɛfɛgi, nɛ́ Zikirii.
22 Uziyɛli jaala peli bīɛlɛ bàli bèle: Misayɛli, Elisafan, nɛ́ Sitirii.
23 A Arawɔn 'cɛliwɛ wáà líɛ, pe wi ye Eliseba. Aminadabi póri wi 'puu, nɛ́ ní Nasɔn cɔni. A wi 'Nadabi, nɛ́ Abiyu, nɛ́ Eleyazari nɛ́ Itamari sii wi mɛ́.
24 Kore jaala peli bīɛlɛ bàli bèle: Asiiri, Elikana nɛ́ Abiyazafi. Peli bīɛlɛ Kore nariyɛ yè.
25 Eleyazari wè, Arawɔn jaa wè, a wire 'cɛliwɛ wáà líɛ ŋàa wi 'puu Putiɛli póri wáà wè. A wire 'Finɛyasi sii wi mɛ́. Peli bīɛlɛ Leviiyé kpáaya kàfɔlilɔ bèle nɛ̀ yɛli nɛ́ pe nariyɛ ní yè.
26 Peli bálì bèle, Arawɔn nɛ́ Misa ní wè, peli mɛ́ Yewe yé kíni nɛ̀ ki 'juu nɛ́ jo: «Ye- Isirayɛli siɛnnɛ yige bèle Ezipiti kùlo nī lè; ye- pe tɔ́ri yé pe taanni pìye nɛ̄ gbuʔulo gbuʔulo.» 27 Peli numinɔ pe yé sɛ́nì juu nɛ́ Farawɔn ní wè, Ezipiti kùlofɔli wè, nɛ́ jo wi- Isirayɛli siɛnnɛ yaʔa bèle pe- yiri Ezipiti kùlo nī lè. Peli bīɛlɛ pe 'puu Misa nɛ́ Arawɔn wè.
Kulocɛliɛ wi 'ki tìɛ gàa wire bé kpíʔile gè
28 Cɛngɛ gíì Yewe 'juu nɛ́ Misa ní wè Ezipiti kùlo nī lè, 29 Yewe cé wi yɛ: «Mi yē Yewe. -Ki juu Ezipiti kùlofɔli Farawɔn mɛ́ wè dàa ti mìɛni mi 'juu muɔ mɛ́ dè.»
30 A Misa 'ki juu Yewe yiʔɛ mɛ́ nɛ́ jo: «-Ki wéli, siɛnrɛ ti wè nɛ waa mi nɛ̄ʔf. Mɛni sí m'bé ní sa juu nɛ́ Farawɔn ní wè, wi sí ga lúʔu mi mɛ́ ?»