Kapiʔile Kàsulugosuɔ cɛngɛ wori dè
(16.1–16.34)
16
1 Arawɔn jaala siin kùulo kàduʔumɛ gè, peli bálì pe 'kùu lɛ̀lɛ líì nī pe 'sìʔɛrɛ nɛ̀ kpɔni Yewe yiʔɛ mɛ́ gèa, a Yewe 'juu nɛ́ Misa ní. 2 A Yewe 'wi yɛ:«-Ki juu muɔ luɔ Arawɔn mɛ́ wè wi fǎga de jiinʔ wi nyɛ́ni lɛ̀lɛ nī lè tiɛcɛ̀njɛngɛ wàlidɛngɛgɛ nī gèʔ gàa gī gunbɔli fɛ̀ni kúrugu wè, kàsulugo suɔdiʔɛ yiʔɛ mɛ́ gè gàa gī nyakungɛngɛ finʔɛgɛ naamɛ gè nɛ̀ ki tɔ́n gè. Kire bé ki yaʔa wi fǎga kúuʔ a mi kɛ́nì tìgi kàsadibagɛ nī gè, kàsulugo suɔdiʔɛ naamɛ gèb.
3 «Lɛ̀lɛ líì nī wi 'jíin saawalidɛngɛgɛ nī gè, Arawɔn wi 'yɛli bè nɛ̀piɛyɛlilɛ cò lè bè jíin nɛ́ ni ní, kapiʔile kàsulugo kakuɔrɔ woli lè, nɛ́ sìnbapɔli ní wè, kakuɔrɔ kaasuʔuro wuu wè. 4 A wi kɛ́nì wìi gbéli wè nɛ̀ kúɔ nɛ́ luʔɔ ní gè, wi bé buruwalidɛngɛrɛ dáà le dè: lɛn burudɔnigɔ wàlidɛngɛgɛ gè, bé sí lɛn jàdigi le wè, bé sí wìi puɔ bè cò nɛ́ lɛn burugo màʔana ní lè, bé sí lɛn ndɔ̀njɛngɛ tɔ́n gè.
5 «Isirayɛliyé tògo siɛnnɛ pe bé kakuɔrɔ yajuuro dáà kɛn dè wi mɛ́: síkapɔlilɔ siin, kapiʔile kàsulugo kakuɔrɔ wuulo, nɛ́ sìnbapɔli nigbe, kakuɔrɔ kaasuʔuro wuu.
6 «Arawɔn bé pɛn nɛ́ kapiʔile kàsulugo nɛ̀piɛyɛlilɛ ní lè wire tíimɛ woli lè, bè kàsulugosuɔ baara kúɔ dè wire tíimɛ wuʔu nɛ̄ gè nɛ́ wi saʔa wuulo wuʔu nɛ̄ gè. 7 Wi bé síkapɔlilɔ siin cò bèle bè pe yérige Yewe yiʔɛ mɛ́ gè, Kpàlidiʔɛ Kpátaʔa wìile nɛ̄ lè. 8 Bà Arawɔn bé bìgele wáa gèle síkapɔlilɔ siinwuʔu nɛ̄ gè. Síkapɔli wáà bé puu Yewe mɛ́, ŋìi wi bé sí puu ŋàa pe bé cìra bè tórigo waama kùlo nī lèc. 9 Bà wi bé síkapɔli ŋíì sìʔɛrɛ wè bè kpɔni ŋàa bìgele ke 'tìɛ Yewe wuu wè, bé wi kɔ̀n kapiʔile kàsulugo kakuɔrɔ. 10 Gàa ki 'síkapɔli siinwuu kúɔ wè, ŋàa bìgele ke 'ki tìɛ wire pe bé cìra bè tórigo waama kùlo nī lè, pe bé wi yérige yaʔa wiiwe Yewe yiʔɛ mɛ́ gè, bè kàsulugosuɔ baara kúɔ dè wi nɛ̄ bè wi cìra bè tórigo waama kùlo nī lè.
11 «Bà Arawɔn bé pɛn nɛ́ nɛ̀piɛyɛlilɛ ní lè, kapiʔile kàsulugo kakuɔrɔ woli lè, bè kàsulugosuɔ baara kúɔ dè wi tíimɛ kɛnmɛ nɛ̄ bè nɛ́ wi saʔa wuulo kɛnmɛ nɛ̄ bè. Wi bé nɛ̀piɛyɛlilɛ kɔni lè, wire tíimɛ kapiʔile kàsulugo kakuɔrɔ woli lè. 12 Wi bé tingbopile líɛ lè bé sí kàsunnɛganʔana kɔ̀n gbùʔɔrɔdiʔɛ yafanʔa nī gè gàa gī Yewe yiʔɛ mɛ́ gè, bè tingbopile nyì lè. Wi bé nùdaanna wusuna míige kagbuunyɛyɛ siin kɔ̀n, bè jíin nɛ́ ki ní gunbɔli fɛ̀ni kúrugu wè. 13 Bà wi bé wusuna míige wo gè kàsunnɛganʔana nɛ̄ gèle Yewe yiʔɛ mɛ́ gè, kire ga buu wusuna wírige ki bé kàsulugo suɔdiʔɛ tɔ́n gè, gàa gī nyakungɛngɛ finʔɛgɛ nɛ̄ gèd, bɛ̀ ki bé kpíʔile wiǐ ga tíi kùuʔ.
14 «Wi bé wi kabiɛlɛ nígi lè nɛ̀piɛyɛlilɛ ni sìsiɛn nī gè bè ki nyɛri nyɛri kàsulugo suɔdiʔɛ yiʔɛ nɛ̄ gè, gàa gī cɛngɛnyɛnifoligɔli mɛ́ gè, bé sí sìsiɛn káà nyɛri nyɛri tɔliyɔ kɔlisiin kàsulugo suɔdiʔɛ yiʔɛ mɛ́ gè.
15 «Bà wi bé síkapɔli kɔni wè, siɛnnɛ pe kapiʔile kàsulugo wuu wè, bé sìsiɛn líɛ gè bè jíin gunbɔli fɛ̀ni kúrugu wè. Bà wi bé ki kpíʔile míɛni nɛ́ sìsiɛn ní gè majo bɛ̀ wi 'ki kpíʔile nɛ̀piɛyɛlilɛ sìsiɛn ní gè: wi bé ki nyɛri nyɛri kàsulugo suɔdiʔɛ nɛ̄ gè nɛ́ kàsulugo suɔdiʔɛ yiʔɛ mɛ́ gè.
16 «Bɛ̀ ki bé kpíʔile wi bé kàsulugosuɔ baara kúɔ dè tiɛcɛ̀njɛngɛ wàlidɛngɛgɛ wuʔu nɛ̄ gè, Isirayɛli siɛnnɛ pe núʔɔmɔ kele nɛ́ pe tuudiʔɛlɛ kɛnmɛ nɛ̄ bè, kire 'jo Isirayɛliyé pe kapiʔile ke mìɛni gèle. Bɛ̀ wi bé ki kpíʔile míɛni Kpàlidiʔɛ Kpátaʔa wuʔu nɛ̄ gè, nɛ́ ki cɛ́n kiī tɛ́ngɛgɛ pe núʔɔmɔ sunʔɔmɔ nī bè.
17 «Siɛn sì yɛli bè puu Kpàlidiʔɛ Kpátaʔa nī gèʔ bè líɛ lɛ̀lɛ líì nī Arawɔn bé jíin wè, bè kàsulugosuɔ baara kúɔ dè tiɛcɛ̀njɛngɛ wàlidɛngɛgɛ nī gè, fúɔ bè taa lɛ̀lɛ líì nī wi bé yiri míɛni wè. Wi bé kàsulugosuɔ baara kúɔ dè wire tíimɛ kɛnmɛ nɛ̄ bè, nɛ́ wi saʔa wuulo kɛnmɛ nɛ̄ bè, nɛ́ Isirayɛliyé tògo ki mìɛni wuʔu nɛ̄ gè.
18 «Kire kàduʔumɛ wi bé yiri Kpàlidiʔɛ Kpátaʔa nī gè bè kɛ́ gbùʔɔrɔdiʔɛ yafanʔa mɛ́ gè, gàa gī Yewe yiʔɛ mɛ́ gè. Wi bé kàsulugosuɔ baara kúɔ dè gbùʔɔrɔdiʔɛ wuʔu nɛ̄ gè. Bà wi bé nɛ̀piɛyɛlilɛ sìsiɛn káà tuʔɔ, nɛ́ síkapɔli sìsiɛn káà ní, bè sa ki taʔa gbùʔɔrɔdiʔɛ yafanʔa ki nyɛgɛlɛ nɛ̄ gèle bè ki màʔa. 19 Bà wi bé sìsiɛn káà nyɛri nyɛri nɛ́ wi kɔli kabiɛlɛ ní lè gbùʔɔrɔdiʔɛ nɛ̄ gè tɔliyɔ kɔlisiin. Bɛ̀ ki bé kpíʔile wi bé ki cìile Isirayɛli siɛnnɛ pe núʔɔmɔ kele nɛ̄ gèle bè ki wàli dɛ́ngɛ Yewe mɛ́ wè.
20 «A wi 'tiɛyɛ nyáà cìile yè nɛ̀ kúɔ yè, saawalidɛngɛgɛ gè, nɛ́ Kpàlidiʔɛ Kpátaʔa gè, nɛ́ gbùʔɔrɔdiʔɛ yafanʔa ní gè, wi bé pɛn nɛ́ síkapɔli wowiiwe ní wè. 21 Arawɔn wi bé wi kiyɛ siin taʔala yè síkapɔli wowiiwe wi nyùgo nɛ̄ gè, bé sí Isirayɛliyé kolimɔ kele ke mìɛni juu nɛ́ pe tuudiʔɛlɛ ní gèle, kire 'jo pe kapiʔile ke mìɛni gèle. Wi bé ke juu bè taʔa síkapɔli wi nyùgo nɛ̄ gè, kire kàduʔumɛ siɛn ŋáà pe 'nyíɛnɛ nɛ̀ kɔ̀n wè, wi bé síkapɔli cìra wè bè tórigo waama kùlo nī lè. 22 Síkapɔli wi bé Isirayɛliyé kolimɔ tugoro ti mìɛni tugo bè kɛ́ nɛ́ ti ní liʔi waama kùlo nī lè.
23 «Bà Arawɔn bé koli jíin Kpàlidiʔɛ Kpátaʔa nī gè, bè lɛn burudo fòri dè bè tɛ́ngɛ, dàa wi yé kíni nɛ̀ le dè nɛ́ jíin tiɛcɛ̀njɛngɛ wàlidɛngɛgɛ nī gè. 24 Wi bé gbéli nɛ́ luʔɔ ní tiɛwalidɛngɛgɛ káà nī, bé wi tíimɛ burudo le dè. Bà wi bé yiri bè kakuɔrɔ kaasuʔuro sórigo dè, wire tíimɛ wori dè, bé sí kakuɔrɔ kaasuʔuro sórigo dè, siɛnnɛ pe wori dè, bè kàsulugosuɔ baara kúɔ dè wire tíimɛ kɛnmɛ nɛ̄ bè nɛ́ siɛnnɛ kɛnmɛ nɛ̄ bè. 25 Wi bé kapiʔile kàsulugo kaara ti sùnmɔ tiɛyɛ sórigo yè gbùʔɔrɔdiʔɛ yafanʔa nɛ̄ gè.
26 «Nàguɔ ŋáà wi yé síkapɔli cìra wè nɛ̀ tórigo waama kùlo nī lè, wi 'yɛli bè wi burudo jíge dè wí sí gbéli nɛ́ luʔɔ ní. Kire kàduʔumɛ wi bé gbɛ̀ jíin bùguro nī dè.
27 «Kapiʔile kàsulugo nɛ̀piɛyɛlilɛ lè nɛ́ kapiʔile kàsulugo síkapɔli ní wè, dàa sìsiɛn Arawɔn 'líɛ nɛ̀ jíin tiɛcɛ̀njɛngɛ wàlidɛngɛgɛ nī gè nɛ̀ kàsulugosuɔ baara kúɔ dè, pe bé kɛ́ bùguro kàduʔu mɛ́ gè nɛ́ ti kaasɛnrɛ ní dè, nɛ́ ti sɛ̀nyɛ ní yè, nɛ́ ti fire ní dè, bè sa ti sórigo péwu. 28 Ŋàa wi 'ti sórigo dè, wi 'yɛli bè wi burudo jíge dè, wí sí gbéli nɛ́ luʔɔ ní. Kire kàduʔumɛ wi bé gbɛ̀ jíin bùguro nī dè.
29 «Tire bé puu fànʔa kaala yeli mɛ́ lɛ̀lɛ ó lɛ̀lɛ nī: yeye kɔlisiinwuʔu ki cɛnyɛ kiɛwuʔu nɛ̄ gè, yeli bé yìye cɛ́rigɛ, yeli sǐ baara yafiɛn kúɔʔ, Isirayɛli siɛn yo, kire ga laa nabɔnwɔ wáà yo, ŋàa wī tɛ́niwɛ yeli sunʔɔmɔ nī bèe. 30 Nɛ́ ki cɛ́n kire cɛngɛ gī pe bé kàsulugosuɔ baara kúɔ dè yeli mɛ́, bè yeli cìile yeli kapiʔile ke mìɛni nī gèle. Yeli 'yɛli bè puu cìilile Yewe yiʔɛ mɛ́ gè. 31 Ki bé puu yeli mɛ́ cɛndɛnigɛ nɛ́ ní cɛnŋɔdaʔa; yeli sǐ baara yafiɛn kúɔʔ. Kire cɛngɛ gè yeli bé yìye cɛ́rigɛ. Tire yē fànʔa kaala lɛ̀lɛ ó lɛ̀lɛ.
32 «Ŋàa wi bága de kàsulugosuɔ baara kúu dè, wi bé puu kacuɔnriwɔ ŋáà pe yé siɛnnyiɛnɛgɔnwɔ sùnmɔ wo bè wi nɛ̄ wè, nɛ́ siɛntɛngɛ kele kúɔ gèle wi nɛ̄ wè, wi- wi tuu sìndiʔɛ líɛ gè bè kò kacuɔnriwɔ. Wire wi béri lɛn burudo wàlidɛngɛrɛ nii dè, 33 béri kàsulugosuɔ baara kúu dè tiɛcɛ̀njɛngɛ wàlidɛngɛgɛ wuʔu nɛ̄ gè, nɛ́ Kpàlidiʔɛ Kpátaʔa wuʔu nɛ̄ gè, nɛ́ gbùʔɔrɔdiʔɛ yafanʔa wuʔu nɛ̄ gè, béri kàsulugosuɔ baara kúu dè míɛni kacuɔnrilɔ mɛ́ bèle nɛ́ Isirayɛliyé tògo siɛnnɛ pe mìɛni ní.
34 «Tire yē fànʔa kaala lɛ̀lɛ ó lɛ̀lɛ nī: tɔligɔ nigbe yiɛlɛ nī lè, kàsulugosuɔ baara ti 'yɛli bè kúɔ Isirayɛli siɛnnɛ pe kapiʔile wuʔu nɛ̄ gè.»
A Arawɔn 'ki kpíʔile dàa ti mìɛni Yewe yé juu nɛ̀ gbɛ̀ngɛ Misa mɛ́ wè.