Nàguɔ núʔɔmɔ wori dè
15
1 A Yewe 'ki juu Misa nɛ́ Arawɔn mɛ́ nɛ́ jo:2 «-Ki juu Isirayɛliyé mɛ́ bèle ye- kire fànʔa kajuʔulo tìɛ gèle pe nɛ̄:
«A fiinmɛnige 'nàguɔ ó nàguɔ cò wè, a fìnimɛ nɛ yigi wi mɛ́ wè, wi bé kò núʔɔwɔ Yewe yiʔɛ mɛ́ gè. 3 Ki n'gɛ gàa ki bé ki tìɛ nàguɔ wiī núʔɔwɔ wè: a fìnimɛ nɛ yigi wi mɛ́ wè, kire ga laa a fìnimɛ pi pɛ́nì fìinmɛ tiʔɛ tɔ́n gè, kire nɛ̂ wi núʔɔ.
4 «Yasinɛgɛ ó yasinɛgɛ nɛ̄ kire nàguɔ wi bé sínɛ wè, ki bé kò núʔɔgɔ. Yɛgɛ ó yɛgɛ míɛni nɛ̄ wi bé tɛ́ni gè, ki bé kò núʔɔgɔ. 5 A wàa míɛni 'cò nɛ̀ taa kire nàguɔ ŋáà wi yasinɛgɛ nɛ̄ gè, wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 6 Ŋàa míɛni wi bé tɛ́ni yɛgɛ nɛ̄ gàa nɛ̄ kire nàguɔ wi 'tɛ́ni gè, wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
7 «Siɛn ŋáà míɛni wi bé cò daa kire nàguɔ wi céri nɛ̄ dè, wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 8 A kire nàguɔ wi 'tíɛnrɛ sùlugu nɛ̀ wáa siɛn wáà nɛ̄ ŋàa wiī cìiliwe wè, kire siɛn wè, wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
9 «Suɔnkolo ó suɔnkolo nɛ̄ kire nàguɔ wi bé tɛ́ni lè, ni bé kò núʔɔnɔ. 10 Siɛn ó siɛn wi bé cò daa yakaa nɛ̄ gàa ki 'puu wi laara gè, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. A wàa 'yakaa líɛ gàa ki 'puu wi láara gè, wi 'yɛli bè wi burudo jíge dè bé sí gbéli nɛ́ luʔɔ ní; wi sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
11 «Kire nàguɔ ŋáà wī yaawa wè, a wi kiyɛ yi 'cò nɛ̀ taa siɛn ó siɛn nɛ̄, nɛ̀ ki yaʔa wiì kiyɛ jíge yèʔ, kire siɛn wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 12 Yakpiʔilige ó yakpiʔilige nɛ̄ kire nàguɔ wi bé cò daa gè, gàa pe 'faan nɛ́ cuʔu ní gè, pe bé ki kpúɔn bè muʔɔrɔ. Gunnɛgɛ ó gunnɛgɛ nɛ̄ wi bé cò daa, pe bé ki jíge nɛ́ luʔɔ ní.
13 «Fìnimɛ báà pi cî ki yaʔa nàguɔ wi nɛ̂ kò núʔɔwɔ wè, a pi 'kúɔ bè, wi 'yɛli bè cɛnyɛ kɔlisiin sige bèri cìilimɛ kakuɔrɔ kele kúu gèle, bé wi burudo jíge dè, bé wi céri gbéli dè nɛ́ pìndiɛlɛ luʔɔ ní; wi bé cìile.
14 «Cɛnyɛ kataanriwuʔu nɛ̄ gè, wi bé pɛn nɛ́ gòtogolo siin ní, kire ga laa gòriwuɔyɔ siin ní; wi bé pɛn Yewe yiʔɛ mɛ́ gè, Kpàlidiʔɛ Kpátaʔa wìile nɛ̄ lè, bé yi kɛn kacuɔnriwɔ mɛ́ wè. 15 Kacuɔnriwɔ wi bé nigbe kɔ̀n kapiʔile kàsulugo kakuɔrɔ woli, bé siinwoli kɔ̀n lè kakuɔrɔ kaasuʔuro. Bà kacuɔnriwɔ wi bé kàsulugosuɔ baara kúɔ dè wi mɛ́ Yewe yiʔɛ mɛ́ gè, wi fìnimɛ wolo wuʔu nɛ̄ gè.
16 «A nàguɔ wi nàguɔmɔ luʔɔ ki 'wo wi mɛ́ gè, wi 'yɛli bè wi céri ti mìɛni gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 17 Burugo ó burugo, kire ga laa sɛ̀ngɛ ó sɛ̀ngɛ nɛ̄ ki bé wo gè, pe 'yɛli pe- ki jíge nɛ́ luʔɔ ní; ki bé sí kò núʔɔgɔ fúɔ bè pa nɔ̀ cɛngɛnyɛnijiin lɛ̀lɛ nī lè.
18 «A nàguɔ wáà 'cɛliwɛ nyɔ́gɔ saʔa nī gè, pe 'yɛli pe 'pìye gbéli nɛ́ luʔɔ ní gè; pe bé sì kò núʔɔnɔ fúɔ bè pa nɔ̀ cɛngɛnyɛnijiin lɛ̀lɛ nī lè.»
Cɛliwɛ sìsiɛn wolo núʔɔmɔ wori dè
19 «A cɛliwɛ wiī gbélige nɛ̄ gè, a sìsiɛn ki ŋu wi mɛ́ gè, wi bé kò núʔɔwɔ cɛnyɛ kɔlisiin. Ŋàa wi bé cò daa wi nɛ̄ wè, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
20 «Bè wi yaʔa wi gbélige lɛ̀lɛ nī lè, yɛgɛ ó yɛgɛ gáà nɛ̄ wi 'sínɛ gè nɛ́ yɛgɛ ó yɛgɛ gáà nɛ̄ wi 'tɛ́ni gè ki bé kò núʔɔgɔ. 21,22 Ŋàa wi bé cò daa ki yasinɛgɛ nɛ̄ gè, kire ga laa ki yatɛnigɛ nɛ̄ gè, wi 'yɛli bè wi burudo jíge dè, wi sí gbéli nɛ́ luʔɔ ní gè; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 23 A ki 'nyaa yɛgɛ káà 'puu wi yasinɛrɛ nɛ̄ dè kire ga laa wi yatɛnigɛ nɛ̄ gè, siɛn ó siɛn wi 'cò nɛ̀ taa ki nɛ̄, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
24 «A ki sí nyaa nàguɔ 'wi nyɔ́gɔ saʔa nī, a ki yē wi gbélige sìsiɛn ki 'nàguɔ márigɛ wè, wi bé kò núʔɔwɔa cɛnyɛ kɔlisiin; yasinɛgɛ ó yasinɛgɛ gáà nɛ̄ wi 'sínɛ gè ki bé kò núʔɔgɔ.
25 «A sìsiɛn nɛ ŋu cɛliwɛ mɛ́ wè, fúɔ nɛ̀ taa cɛnniʔɛyɛ yè gàa ki wè nugoʔ nɛ́ gbélige lɛ̀lɛ wuʔu ní gèʔ, kire ga laa sìsiɛn wolo niī nɛ waa nɛ mɔgɔ nɛ̀ tóri gbélige cɛnyɛ nɛ̄ yè, wi bé kò núʔɔwɔ súuri lɛ̀lɛ ó lɛ̀lɛ nī ki ŋu gè, majo bɛ̀ wi cî puu núʔɔwɔ gbélige lɛ̀lɛ nī lèb.
26 «Bè wi 'yaʔa kire sìsiɛn wolo lɛ̀lɛ nī lè, yɛgɛ ó yɛgɛ gáà nɛ̄ wi 'sínɛ gè, nɛ́ yɛgɛ ó yɛgɛ gáà nɛ̄ wi 'tɛ́ni gè, ki bé kò núʔɔgɔ, kanumɔ nɛ̄ wi gbélige lɛ̀lɛ nī lè. 27 Siɛn ó siɛn wi 'cò nɛ̀ taa yɛrɛ dáà nɛ̄ dè, wi bé kò núʔɔwɔ. Wi 'yɛli bè wi burudo jíge dè bé sí gbéli nɛ́ luʔɔ ní; wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.
28 «A ki sí nyaa kire sìsiɛn wolo ni 'kúɔ lè, cɛliwɛ wi bé cɛnyɛ kɔlisiin sige; kire kàduʔumɛ wi bé kò cìiliwe. 29 Cɛnyɛ kataanriwuʔu nɛ̄ gè, wi bé pɛn míɛni nɛ́ gòtogolo siin ní, kire ga laa gòriwuɔyɔ siin ní, bé ke kɛn kacuɔnriwɔ mɛ́ wè, Kpàlidiʔɛ Kpátaʔa wìile nɛ̄ lè.
30 «Kacuɔnriwɔ wi bé nigbe kɔ̀n kapiʔile kàsulugo kakuɔrɔ woli, bé nìi kɔ̀n lè kakuɔrɔ kaasuʔuro woli. Bà wi bé kàsulugosuɔ baara kúɔ dè Yewe yiʔɛ mɛ́ gè, wi sìsiɛn wolo núʔɔmɔ wuʔu nɛ̄ gè.
31 «Bɛ̀ ki bé kpíʔile dí yeli- Isirayɛliyé wàli bèle bè tɛ́ngɛ yɛgɛ gáà nɛ̄ ki bé pe núʔɔ gè Yewe yiʔɛ mɛ́ gè, bé sí ki kpíʔile mi fǎga pe 'kpúɔn gbúuʔ a pe 'mi Kòridiʔɛ núʔɔ gè gàa gī pe sunʔɔmɔ nī bè.
32 «Gàli keli yē fànʔa kajuʔulo gálì kiyē nɛ nyu nàguɔ wori nɛ̄ dè, ŋàa mɛ́ fìnimɛ piī nɛ ŋu bè, nɛ́ míɛni ŋàa mɛ́ nàguɔmɔ luʔɔ ki 'wo gè a wi 'kò núʔɔwɔ, 33 nɛ́ cɛliwɛ míɛni ní wè, wi gbélige lɛ̀lɛ nī lè, nɛ́ siɛn ó siɛn, nàguɔ yo, cɛliwɛ yo, ŋàa mɛ́ yakaa nɛ yigi wi fìɛrɛ tiʔɛ nī gè, nɛ́ nàguɔ ní wè ŋàa wi 'cɛliwɛ nyɔ́gɔ wè wi saʔa nī gè, cɛliwɛ ŋáà wī núʔɔwɔ wè Yewe yiʔɛ mɛ́ gè.»