Leviiyé 14

Césɛngɛ yaabiimɛ nɛ́ ki cìilimɛ wori dè

1 A 'ki juu mɛ́ nɛ́ jo: 2 «Ki n'gɛ fànʔa kajuʔulo gálì kiyē nɛ nyu siɛn ŋáà wi 'puu nɛ́ césɛngɛ yaabiimɛ ní bè, wi cìilimɛ cɛngɛ wuʔu nɛ̄ gè.

«Pe bé wi kɔ́ri bè kɛ́ mɛ́ wè. 3 Kacuɔnriwɔ wi bé yiri bè kɛ́ wi kúrugu bùguro kàduʔu mɛ́ gè, bè césɛngɛ yaabiimɛ yaadiɛlɛ sɔ́migɔ lè bè wéli. A siɛn wi 'puʔɔ wi césɛngɛ yaabiimɛ nɛ̄ bè, 4 kacuɔnriwɔ wi bé ki juu bè gbɛ̀ngɛ bé jo peri báan nɛ́ kakuɔrɔ yɛrɛ dáà ní dè, siɛn wi cìilimɛ wuʔu nɛ̄ gè: sínjapigele siin wiʔile nɛ́ ní cìiligele Yewe yiʔɛ mɛ́ gè, nɛ́ tiige lège ní, nɛ́ jèsii ŋáà wī nyìɛwɛ kpólokpolo wè, nɛ́ wɛrɛ ní dè.

5 «Kacuɔnriwɔ wi bé ki juu bè gbɛ̀ngɛ bé jo pe- sínjapile láà kɔni kàjuʔɔ nyuɔ naamɛ gè, gàa nī pìndiɛlɛ luʔɔ ki yē gè. 6 Bà wi bé sínjapile wowiile cò lè, nɛ́ sɛdiri tiige lège ní gè, nɛ́ jèsii ŋáà wī nyìɛwɛ kpólokpolo wè, nɛ́ isɔpi wɛrɛ ní dè. Wi bé ti mìɛni líɛ nɛ́ sínjapile wowiile ní lè, bè ti nyɔ́gɔ sìsiɛn nī gè gàa gī kàjuʔɔ nī gè, gàa nī pìndiɛlɛ luʔɔ ki yē gè, gàa nyuɔ naamɛ wi 'sínjapile kɔni lè. 7 Wi bé ti mìɛni yige bè sìsiɛn luʔɔ nyɛri nyɛri gè tɔliyɔ kɔlisiin siɛn nɛ̄ wè, ŋàa piyē nɛ cìile wi césɛngɛ yaabiimɛ wobo bè. Bà kacuɔnriwɔ wi bé ki juu bé jo wi nyɛ́nì cìile Yewe yiʔɛ mɛ́ gè, bé sínjapile wowiile yaʔa lè ni- fini bè kɛ́ sìnbirige nī gè.

8 «Ŋàa piyē nɛ cìile wè, wi bé wi burudo jíge dè, bé wi nzìire ti mìɛni kùnu dè, bé sí gbéli nɛ́ luʔɔ ní. Bà wi bé kò cìiliwe Yewe yiʔɛ mɛ́ gè. Kire kàduʔumɛ wi bé koli jíin bùguro nī dè, nɛ̀ ki yaʔa wi bé cɛnyɛ kɔlisiin kúɔ wiǐ jíin wi fɛ̀ni saʔa nī gèʔ.

9 «Cɛnyɛ kɔlisiinwuʔu nɛ̄ gè, wi bé ní wi nzìire kùnu dè nɛ́ báʔajuɔ ní wè, nɛ́ naamɛ nyapikosiire ní dè, nɛ́ cétiɛyɛ sɛnyɛ síire ní dè. Wi bé wi burudo jíge dè bé sí gbéli nɛ́ luʔɔ ní. A kire 'kpíʔile wi bé kò cìiliwe.

10 «Cɛnyɛ kataanriwuʔu nɛ̄ gè, wi bé sìnbapɛngɛlɛ siin cò, kpɔlidiɛlɛfun wuʔulo, nɛ́ sìnbapori nigbe ní, kpɔlidiɛlɛfun wuu ŋàa wi 'liɛ nɛ̀ yiɛlɛ nigbe taa lè, nɛ́ míifuɔnibɔ gbɔngbonyiʔɛ tílaya kiɛ ki tiɛyɛ taanriwuʔu bàa pi 'nyaʔami nɛ́ sùnmɔ ní, yaliire wori dè, nɛ́ sùnmɔ yakuunyɛni tílaga nigbe ní gè.

11 «Kacuɔnriwɔ ŋáà wi 'cìilimɛ baara kúu dè, wi bé siɛn tɛ́ngɛ wè ŋàa mɛ́ piyē nɛ cìilimɛ kakuɔrɔ kúu dè, nɛ́ wi yakɔnrɔ ní dè Yewe yiʔɛ mɛ́ gè, wìile nɛ̄ lè. 12 Bà kacuɔnriwɔ wi bé sìnbapɛnnɛ pélile cò lè, kolimɔ kakuɔrɔ woli lè, nɛ́ sùnmɔ yakuunyɛni tílaga nigbe ní gè, bè ti yɛ̀gɛ naamɛ Yewe yiʔɛ mɛ́ gè. 13 Wi bé sìnbapɛnnɛ kɔni lè, tiʔɛ nī gàa nī pe sî yajuʔu nɛ́ yajuʔu kɔni gè, tiʔɛ nī gè. Nɛ́ ki cɛ́n kolimɔ kakuɔrɔ dè, kire yē kacuɔnriwɔ wire wuʔu kanumɔ nɛ̄ kapiʔile kàsulugo kaara ti yē. Yakaa gī gàa gī cɛ̀njɛngɛ wàlidɛngɛgɛ.

14 «Kacuɔnriwɔ wi bé kolimɔ kakuɔrɔ sìnbapɛnnɛ sìsiɛn káà tuʔɔ, bè kàa taʔa siɛn nɛ̄ wè ŋàa mɛ́ piyē nɛ cìilimɛ kakuɔrɔ kúu dè: wi kàliige kɔli ngbówɛgɛ nɛ̄ gè táanmɛ gè, nɛ́ wi kàliige kɔli kabaligbuɔ nɛ̄ wè, nɛ́ wi kàliige tɔligɔ kabaligbuɔ nɛ̄ wè.

15 «Bà wi bé sùnmɔ páà líɛ bè pi wo wi tíimɛ kàmɛgɛ kadaala nī lè, 16 bè wi kàliige kɔli kabiɛlɛ nígi lè, bé sùnmɔ nyɛri nyɛri bè tɔliyɔ kɔlisiin Yewe yiʔɛ mɛ́ gè. 17 Sùnmɔ báà pi bé kò wi kadaala nī lè, kacuɔnriwɔ wi bé pàa taʔa siɛn nɛ̄ wè ŋàa piyē nɛ cìilé wè: wi kàliige kɔli ngbówɛgɛ nɛ̄ gè táanmɛ gè, nɛ́ wi kàliige kɔli kabaligbuɔ nɛ̄ wè, nɛ́ wi kàliige tɔligɔ kabaligbuɔ nɛ̄ wè. Sùnmɔ pi bé taʔa tiɛyɛ nɛ̄ yè baa kolimɔ kakuɔrɔ yajuʔu sìsiɛn ki kíni nɛ̀ puu gè. 18 Sùnmɔ sɛnbɛ báà pi 'kò kacuɔnriwɔ wi kadaala nī lè, wi bé pi taʔa siɛn nɛ̄ wè ŋàa piyē nɛ cìile wè, wi nyùgo nɛ̄ gè. Kacuɔnriwɔ wi bé sí kàsulugosuɔ baara kúɔ dè wi mɛ́ Yewe yiʔɛ mɛ́ gè.

19 «Kire kàduʔumɛ gè, kacuɔnriwɔ wi bé kapiʔile kàsulugo kakuɔrɔ kúɔ dè, bè kàsulugosuɔ baara kúɔ dè siɛn mɛ́ wè ŋàa mɛ́ piyē nɛ cìilimɛ kakuɔrɔ kúu dè wi núʔɔmɔ wuʔu nɛ̄ gè. Kire kàduʔumɛ wi bé kakuɔrɔ kaasuʔuro yajuʔu kɔni gè, 20 bè ki taʔa nɛ̄ gè nɛ́ yaliire yakɛnrɛ ní dè. Bɛ̀ ki bé kpíʔile kacuɔnriwɔ wi bé kàsulugosuɔ baara kúɔ dè wi mɛ́, bà wi bé kò cìiliwe Yewe yiʔɛ mɛ́ gè.

21 «A ki sí nyaa fuunmɔfɔli wī, a yakaa wè wi mɛ́ bè yɛrɛ dáà ti mìɛni suɔ dèʔ, wi bé pɛn nɛ́ sìnbapɛnnɛ nigbe ní, kolimɔ kakuɔrɔ woli lè, bè pa ni yɛ̀gɛ naamɛ Yewe yiʔɛ mɛ́ gè kire ga buu pe- kàsulugosuɔ baara kúɔ dè wi mɛ́. Wi bé yaliire yakɛnrɛ fàri dè baa ki nɛ̄, míifuɔnibɔ juubaanyɛni tílaga nigbe bàa pi 'nyaʔami nɛ́ sùnmɔ ní bè, nɛ́ sùnmɔ yakuunyɛni tílaga nigbe ní gè. 22 Wi bé pɛn míɛni nɛ́ gòtogolo siin ní kire ga laa gòriwuɔyɔ siin ní, nɛ̀ yɛli nɛ́ wi taagɛnmɛ ní bè. Wi bé nigbe kɔ̀n kapiʔile kàsulugo kakuɔrɔ woli, nìi ni bé puu kakuɔrɔ kaasuʔuro woli lè.

23 «Cɛnyɛ kataanriwuʔu nɛ̄ gè, wi bé pɛn nɛ́ ti ní kacuɔnriwɔ mɛ́ wè, wi cìilimɛ wuʔu nɛ̄ gè, Kpàlidiʔɛ Kpátaʔa wìile mɛ́ lè, Yewe yiʔɛ mɛ́ gè.

24 «Kacuɔnriwɔ wi bé sìnbapɛnnɛ cò lè, kolimɔ kakuɔrɔ woli lè, nɛ́ sùnmɔ yakuunyɛni tílaga nigbe ní gè, bè ti yɛ̀gɛ naamɛ Yewe yiʔɛ mɛ́ gè. 25 Bà wi bé kolimɔ kakuɔrɔ sìnbapɛnnɛ kɔni lè, bé ni sìsiɛn káà tuʔɔ bè kàa taʔa siɛn ŋáà nɛ̄ pe cìilé wè, wi kàliige ngbówɛgɛ nɛ̄ gè, nɛ́ wi kàliige kɔli kabaligbuɔ nɛ̄ wè, nɛ́ wi kàliige tɔligɔ kabaligbuɔ nɛ̄ wè.

26 «Bà wi bé sùnmɔ páà líɛ bè pi wo wi tíimɛ kàmɛgɛ kadaala nī lè, 27 bé sùnmɔ nyɛri nyɛri bè, tɔliyɔ kɔlisiin Yewe yiʔɛ mɛ́ gè, nɛ́ wi kàliige kɔli kabiɛlɛ ní lè. 28 Sùnmɔ báà bī wi kadaala nī lè, kacuɔnriwɔ wi bé sí pàa taʔa siɛn wi kàliige kɔli ngbówɛgɛ nɛ̄ gè táanmɛ gè, nɛ́ wi kàliige kɔli kabaligbuɔ nɛ̄ wè, nɛ́ wi kàliige tɔligɔ kabaligbuɔ nɛ̄ wè. Sùnmɔ pi bé taʔa tiɛyɛ nɛ̄ yè baa kolimɔ kakuɔrɔ yajuʔu sìsiɛn ki kíni nɛ̀ puu gè. 29 Sùnmɔ sɛnbɛ báà pi 'kò wi kadaala nī lè, kacuɔnriwɔ wi bé pi taʔa siɛn wi nyùgo nɛ̄ gè ŋàa mɛ́ piyē nɛ cìilimɛ kakuɔrɔ kúu dè; kacuɔnriwɔ wi bé sí kàsulugosuɔ baara kúɔ dè wi mɛ́ Yewe yiʔɛ mɛ́ gè.

30 «Wi bé gòtogolo siin cò gèle, kire ga laa gòriwuɔyɔ siin yè, nyàa ní wi 'pɛn yè nɛ̀ yɛli nɛ́ wi taagɛnmɛ ní bè. 31 Wi bé nigbe kɔ̀n kapiʔile kàsulugo kakuɔrɔ woli, bé nìi kɔ̀n lè kakuɔrɔ kaasuʔuro woli, bè ni fàri yaliire yakɛnrɛ nɛ̄ dè. Bà kacuɔnriwɔ wi bé kàsulugosuɔ baara kúɔ dè Yewe yiʔɛ mɛ́ gè siɛn mɛ́ wè, ŋàa mɛ́ piyē nɛ cìilimɛ kakuɔrɔ kúu dè.

32 «Keli yē fànʔa kajuʔulo gèle gàli kiyē nɛ nyu siɛn ŋáà wori nɛ̄ dè, ŋàa wi yē nɛ́ césɛngɛ yaabiimɛ yaadiɛlɛ ní lè, a ki yē siɛn ŋáà nī fɔ̀ngɔ ki 'cùru gè bè cìilimɛ kakuɔrɔ yɛrɛ suɔ dè.»

Kùɔnnɔ yaama nɛ́ pi cìilimɛ wori dè

33 A 'ki juu nɛ́ mɛ́ nɛ́ jo:

34 «A yeli kɛ́nì jíin kùlo nī lè, kùlo náà mi 'kɛn muɔ mɛ́ ni- puu yeli woli lè, a mi 'kùɔnnɔ nyɔ́gɔ lè saʔa káà nī gàa gī kùlo nī lè nàa nī yeli woli lè, 35 siɛn ŋáà wuʔu gī saʔa gè, wi bé sa ki juu mɛ́ wè, bé jo: ‹Mi nyɛ́nì yakaa nyaa mi saʔa nī gè gàa gī kùɔnnɔ tíɛlɛ lè.› 36 Kacuɔnriwɔ wi bé ki juu bè gbɛ̀ngɛ bé jo pe- saʔa ki yɛrɛ ti mìɛni yige sɛ́ni wire sa jíin baa, bè ki tiɛlɛ sɔ́migɔ lè bè wéli, bà ki bé puu yɛrɛ dáà dī saʔa nī gè tiǐ gbɛ̀ kò núʔɔrɔʔ. Kire kàduʔumɛ, kacuɔnriwɔ wi bé sa jíin saʔa nī gè bè ki sɔ́migɔ wéli.

37 «Wi bé kùɔnnɔ tiʔɛ sɔ́migɔ gè bè wéli. A wi 'ki nyaa kùɔnnɔ yē gungo tiɛyɛ nɛ̄ yè, a gunyɔ tiɛyɛ yiī lamɔni céri dè á kire bɛ̀ʔ a yiī nyìɛyɛ yè, a ki yē ni 'kàwiiye kúnminɔ gunyɔ nɛ̄ yè, 38 kacuɔnriwɔ wi bé yiri saʔa nī gè, bé wìile tɔ́n lè bè taa cɛnyɛ kɔlisiin.

39 «Cɛnyɛ kɔlisiinwuʔu nɛ̄ gè, wi bé ní koli bɛn bè kùɔnnɔ tiʔɛ sɔ́migɔ gè bè wéli. A kàa 'fàri ki tiʔɛ nɛ̄ gè saʔa gunyɔ nɛ̄ yè, 40 kacuɔnriwɔ wi bé ki juu bè gbɛ̀ngɛ pe- saʔa kàdɛniyɛ wuʔɔbi yè pe yige tiʔɛ gíì nī kùɔnnɔ ni yē lè, pe- yi wáa bùguro kàduʔu mɛ́ gè tiɛnuʔɔgɔ nī gè. 41 Wi bé ní tí pe- saʔa laamɛ gunyɔ yi mìɛni kàari. Gàa pe 'kàari nɛ̀ láʔa gunyɔ nɛ̄ yè, pe bé ki koli bè ki wáa kàʔa kàduʔu mɛ́ gè, tiɛnuʔɔgɔ nī gè. 42 Pe bé sí ní kàdɛniyɛ yáà yiiyɛ líɛ, bè yi le péliye yi kɔ̀ndiɛyɛ nī yè, bé puuro táà tíʔɛ bè gunyɔ wɔligɔ yè.

43 «A ki 'nyaa kùɔnnɔ ni ń'nɛ̀ koli nɛ saʔa cògí gè nɛ waa wè, nɛ̀ ki yaʔa pe 'kàdɛniyɛ nyíì kɔ̀n yè nɛ̀ kúɔ yè, nɛ́ saʔa gunyɔ kàari yè nɛ̀ yi wɔligɔ nɛ̀ kúɔ yè, 44 kacuɔnriwɔ wi bé koli bè ki sɔ́migɔ bè wéli. A wi 'ki nyaa kùɔnnɔ niī nɛ saʔa cògí gè nɛ waa wè, kùɔnnɔ yaama bī. Saʔa kiī núʔɔgɔ. 45 Pe 'yɛli pe- saʔa cáan gè wī. Ki kàdari dè, nɛ́ ki tiire ní dè, nɛ́ ki puuro ní dè, pe bé ti koli bè kɛ́ kàʔa kàduʔu mɛ́ gè, bé ki wáa tiɛnuʔɔgɔ nī gè.

46 «A siɛn wáà 'jíin saʔa nī gè cɛnyɛ nyáà yi mìɛni nī kiī tɔ́ngɔ gè, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 47 A siɛn wáà 'sínɛ kire saʔa nī gè, á kire bɛ̀ʔ a wi 'lìi baa ki nī gè, wi 'yɛli bè wi burudo jíge dè.

48 «A ki sí yē kacuɔnriwɔ wi 'koli nɛ̀ jíin baa saʔa nī gè bè ki sɔ́migɔ bè wéli, bà pe yé saʔa wɔligɔ gè nɛ̀ kúɔ gè, a wi 'ki nyaa kùɔnnɔ niì saʔa cò gèʔ cígini wèʔ, kacuɔnriwɔ wi bé ki juu bé jo saʔa ki 'kò cìilige; kùɔnnɔ yaama wè ki nɛ̄ʔ.

49 «Bè saʔa ki cìilimɛ kakuɔrɔ kúɔ dè, kacuɔnriwɔ wi bé sínjapigele siin cò, nɛ́ tiige lège ní, nɛ́ jèsii ŋáà wī nyìɛwɛ kpólokpolo wè, nɛ́ wɛrɛ ní. 50 Wi bé sínjapile pélile kɔni lè kàjuʔɔ nyuɔ naamɛ gè, gàa nī pìndiɛlɛ luʔɔ ki yē gè. 51 Wi bé sí sɛdiri tiige lège líɛ gè, nɛ́ isɔpi wɛrɛ ní dè, nɛ́ jèsii ŋáà wī nyìɛwɛ kpólokpolo wè, nɛ́ sínjapile wowiile ní lè, bè ti nyɔ́gɔ sìsiɛn luʔɔ nī gè, sínjapile wuʔu gè nàa pe 'kɔni kàjuʔɔ nyuɔ naamɛ gè nɛ̀ ni sìsiɛn le gè pìndiɛlɛ luʔɔ nī gè. Wi bé sìsiɛn nyɛri nyɛri gè tɔliyɔ kɔlisiin saʔa nī gè.

52 «Bɛ̀ ki bé kpíʔile dí kacuɔnriwɔ wi sí saʔa cìile gè, nɛ́ sínjapile sìsiɛn ní gè, nɛ́ pìndiɛlɛ luʔɔ ní gè, nɛ́ sínjapile wowiile ní lè, nɛ́ sɛdiri tiige lège ní gè, nɛ́ isɔpi wɛrɛ ní dè, nɛ́ jèsii ŋáà wī nyìɛwɛ kpólokpolo wè. 53 Wi bé sí sínjapile wowiile cò lè wi- kɛ́ nɛ́ wi ní kàʔa kàduʔu mɛ́, wi sa ni yaʔa ni- fini ni kɛ́ sìnbirige nī gè. Bɛ̀ ki bé kpíʔile wi bé kàsulugosuɔ baara kúɔ dè saʔa nī gè, bà ki bé kò cìilige Yewe yiʔɛ mɛ́ gè.

54 «Keli yē fànʔa kajuʔulo gálì gīɛlɛ césɛngɛ yaabiimɛ wuʔu nɛ̄ gè, nɛ́ wírele wuʔu nɛ̄ gè, 55 nɛ́ kùɔnnɔ yaama báà bī burudo nɛ̄ dè kire ga laa saʔa nɛ̄ gè, 56 nɛ́ yatinge wuʔu nɛ̄ gè nɛ́ fìɛligɛ wuʔu nɛ̄ gè, á kire bɛ̀ʔ tiɛfiile wuʔu nɛ̄ gè nàa nī césɛngɛ nɛ̄ gè. 57 Kiyē nɛ tɛnmɛnɛ kanʔa kɛnmɛ bíì nɛ̄ ki 'yɛli pe- ki juu síɛ a yɛgɛ gíì yē cìilige kire ga laa núʔɔgɔ Yewe yiʔɛ mɛ́ gè. Keli yē fànʔa kajuʔulo gálì gīɛlɛ kiyē nɛ nyu césɛngɛ yaabiimɛ nɛ́ kùɔnnɔ yaama wuʔu nɛ̄ gè.»