Leviiyé 13

Césɛngɛ yaama wori dè

1 A 'ki juu nɛ́ mɛ́ nɛ́ jo:

2 «A ki sí nyaa siɛn wáà yē yatinge ní kire ga laa fìɛligɛ ní, á kire bɛ̀ʔ tiɛfiile ní wi césɛngɛ nɛ̄ gè, gàa ki bé gbɛ̀ ki tìɛ césɛngɛ yaabiimɛ bī wè, pe 'yɛli bè pɛn nɛ́ wi ní Arawɔn mɛ́ wè, kire ga laa wi jaa wáà mɛ́.

3 «Bà kacuɔnriwɔ wi bé yaadiɛlɛ sɔ́migɔ lè bè wéli. A césɛngɛ síire ti 'fílige dè yaadiɛlɛ nī lè, a yaadiɛlɛ ni 'cùru césɛngɛ nī gè, kire bé ki tìɛ césɛngɛ yaabiimɛ bī. A kacuɔnriwɔ wi 'ki sɔ́migɔ nɛ̀ wéli gè, wi bé ki juu bé jo siɛn ŋáà wi 'kò núʔɔwɔ Yewe yiʔɛ mɛ́ gè. 4 A ki sí nyaa tiɛfiile niī césɛngɛ nɛ̄ gè, a niì sí cùru céri nī dèʔ, a céri síire míɛni tiì fílige dèʔ, kacuɔnriwɔ wi 'yɛli bè yaawa yige wè bè tɛ́nge tiʔɛ káà nī cɛnyɛ kɔlisiin.

5 «Cɛnyɛ kɔlisiinwuʔu nɛ̄ gè, kacuɔnriwɔ wi bé wi sɔ́migɔ bè wéli. A wi 'ki nyaa yaadiɛlɛ niì yiʔɛʔ, kàa sì fàri ni nɛ̄ʔ césɛngɛ nɛ̄ gèʔ, wi bé ní yaawa yige wè bè tɛ́ngɛ taziinwuʔu nɛ̄ gè, bè taa cɛnyɛ kɔlisiin.

6 «Cɛnyɛ kɔlisiinwuʔu nɛ̄ gè, kacuɔnriwɔ wi bé ní yaawa sɔ́migɔ wè bè wéli cígini. A wi 'ki nyaa kàa 'yiri yaadiɛlɛ nī lè cɛ̀ri, kàa sì fàri ni nɛ̄ lèʔ césɛngɛ nɛ̄ gèʔ, kacuɔnriwɔ wi bé ki juu bé jo wi 'kò cìiliwe Yewe yiʔɛ mɛ́ gè; fìɛligɛ yákuɔ gī. A wi 'wi burudo jíge dè, wi bé kò cìiliwe Yewe yiʔɛ mɛ́ gè.

7 «Bà kacuɔnriwɔ wi cé ki juu nɛ́ jo wiī cìiliwe wè, kire kàduʔumɛ a ki pɛ́nì nyaa kàa taʔa yaadiɛlɛ nɛ̄ lè, wi bé ní koli bɛn kacuɔnriwɔ kúrugu wè. 8 Bà kacuɔnriwɔ wi bé ní pa wi sɔ́migɔ bè wéli. A ki 'nyaa kàa 'taʔa cígini yaadiɛlɛ nɛ̄ lè césɛngɛ nɛ̄ gè, kacuɔnriwɔ wi bé ki juu bé jo siɛn wiī núʔɔwɔ Yewe yiʔɛ mɛ́; césɛngɛ yaabiimɛ bī.

9 «A ki 'nyaa césɛngɛ yaabiimɛ yē siɛn wáà nɛ̄, pe 'yɛli bè pɛn nɛ́ wi ní kacuɔnriwɔ mɛ́ wè. 10 Kacuɔnriwɔ wi bé wi sɔ́migɔ bè wéli. A yatinge yē wi césɛngɛ nɛ̄ gè nɛ́ ní fìige gè, a ki míɛni 'céri síire fílige dè, a yatinge ki 'puru gè nɛ̀ kò nɔmirɔ, 11 kire yē césɛngɛ yaabiimɛ bī bàa pi 'mɔgɔ bè. Kacuɔnriwɔ wi bé ki juu bé jo siɛn wiī núʔɔwɔ; nyùgo wè ki nɛ̄ʔ bè wi yige bè tɛ́ngɛ tiʔɛ káà nīʔ, nɛ́ ki cɛ́n wiī núʔɔwɔ Yewe yiʔɛ mɛ́.

12 «Nɛ̀ ki yaʔa a césɛngɛ yaama báà pi 'céri ti mìɛni cò dè, nɛ̀ ki séli nyùgo nɛ̄ gè nɛ̀ sɛ́nì nɔ̀ tɔliyɔ nɛ̄ yè, baa kacuɔnriwɔ wi bé nyaa bè nɔ̀ wè, 13 bà wi bé yaawa sɔ́migɔ wè bè wéli cígini. A wi 'ki nyaa yaama pi 'siɛn wi céri ti mìɛni cò dè, kacuɔnriwɔ wi bé ki juu bé jo wiī cìiliwe. Wi céri ti mìɛni 'kò fìire; wiī cìiliwe.

14 «Nɛ̀ ki yaʔa a ki pɛ́nì nyaa cɛngɛ káà a nɔmirɔ ti 'kúnminɔ wi céri nɛ̄ dè, siɛn wi bé kò núʔɔwɔ. 15 A kacuɔnriwɔ wi kɛ́nì céri nɔmirɔ sɔ́migɔ dè nɛ̀ wéli dè, wi bé ki juu bé jo siɛn ŋáà wiī núʔɔwɔ Yewe yiʔɛ mɛ́ gè. Bɛ̀ nɔmirɔ tiī núʔɔrɔ dè, césɛngɛ yaabiimɛ bī. 16 A nɔmirɔ ti 'puʔɔ nɛ̀ nyuɔ nɛ̀ kò césɛngɛ tíɛlɛ gè, siɛn wi bé koli bɛn kacuɔnriwɔ mɛ́ wè. 17 Kacuɔnriwɔ wi bé wi sɔ́migɔ bè wéli. A 'ki nyaa yaadiɛlɛ ni 'puʔɔ nɛ̀ nyuɔ nɛ̀ kò césɛngɛ tíɛlɛ gè, kacuɔnriwɔ wi bé ki juu bé jo yaawa wi nyɛ́nì cìile. Wiī cìiliwe Yewe yiʔɛ mɛ́ gè.

18 «A ki 'nyaa fìnige 'puu wàa ceri nɛ̄ dè a ki kɛ́nì puʔɔ gè, 19 a ki sí nyaa fìnige tiʔɛ nī gè, yatinge 'yɛ̀ baa gàa ki 'fílige, kire ga laa tiɛfiile nàa ni 'nyɛ́nigɛ nɛ̀ yɛli lè, siɛn wi 'yɛli bè pɛn bè ba ki tìɛ kacuɔnriwɔ nɛ̄ wè. 20 Bà kacuɔnriwɔ wi bé yaadiɛlɛ sɔ́migɔ lè bè wéli. A wi 'ki nyaa ni 'cùru céri nī dè, a céri síire ti 'fílige dè, kacuɔnriwɔ wi bé ki juu bé jo siɛn wiī núʔɔwɔ Yewe yiʔɛ mɛ́ gè. Césɛngɛ yaabiimɛ bī, bàa pi séli nɛ piʔi fìnige tiʔɛ nī gè.

21 «Nɛ̀ ki yaʔa a kacuɔnriwɔ wi 'ki nyaa céri síire tiì fílige dèʔ, a fìnige tiʔɛ kiì cùru gèʔ, a kàa 'yiri yaadiɛlɛ nī lè, wi bé yaawa yige wè bè tɛ́ngɛ tiʔɛ káà nī cɛnyɛ kɔlisiin. 22 Kire kàduʔumɛ, a kàa 'fàri yaadiɛlɛ nɛ̄ lè césɛngɛ nɛ̄ gè, kacuɔnriwɔ wi bé ki juu bé jo wiī núʔɔwɔ Yewe yiʔɛ mɛ́ gè; césɛngɛ yaabiimɛ bī. 23 A ki sí nyaa kàa sì fàri yaadiɛlɛ nɛ̄ lèʔ, kire yē fìnige ki nɔmidiɛlɛ. Kacuɔnriwɔ wi bé ki juu bé jo wiī cìiliwe Yewe yiʔɛ mɛ́ gè.

24 «A ki sí nyaa kàsun súʔugo nɔmidiʔɛ yē siɛn wáà césɛngɛ nɛ̄, a ki 'nyɛ́nigɛ nɛ̀ yɛli gè, á kire bɛ̀ʔ a ki 'fílige fáa gè, 25 kacuɔnriwɔ wi bé ki sɔ́migɔ bè wéli. A suʔudiʔɛ céri síire ti 'fílige dè, a nɔmigɔ ki 'cùugo gè, yaadiɛlɛ niī nɛ ki tìí césɛngɛ yaabiimɛ piī nɛ séligi suʔudiʔɛ nɛ̄ gè. Kacuɔnriwɔ wi bé ki juu bé jo césɛngɛ yaabiimɛ bī; wiī núʔɔwɔ Yewe yiʔɛ mɛ́ gè.

26 «Nɛ̀ ki yaʔa a kacuɔnriwɔ wi 'yaadiɛlɛ wéli lè, wiì céri síire nyaa dè fìire dèʔ, wiì ki nyaa a ki 'cùru gèʔ, a kàa 'yiri yaadiɛlɛ nī lè, wi bé yaawa yige wè bè tɛ́ngɛ tiʔɛ káà nī cɛnyɛ kɔlisiin.

27 «Cɛnyɛ kɔlisiinwuʔu nɛ̄ gè, a kacuɔnriwɔ wi 'ki nyaa a kàa 'fàri yaadiɛlɛ nɛ̄ lè césɛngɛ nɛ̄ gè, wi bé ki juu bé jo wiī núʔɔwɔ Yewe yiʔɛ mɛ́. Césɛngɛ yaabiimɛ bī. 28 Nɛ̀ sí ki yaʔa a yaadiɛlɛ niì yiʔɛ lèʔ, a kàa sì fàri césɛngɛ nɛ̄ gèʔ, a kàa 'yiri yaadiɛlɛ nī lè, kire yē súʔulo yatinge. Kacuɔnriwɔ wi bé ki juu bé jo wiī cìiliwe Yewe yiʔɛ mɛ́ gè. Súʔulo nɔmidiɛlɛ nī.

29 «A ki sí nyaa nàguɔ kire ga laa cɛliwɛ wi yē nɛ́ yaadiɛlɛ ní wi nyùgo nɛ̄ gè, kire ga laa nyafungbege nɛ̄ gè, 30 kacuɔnriwɔ wi bé ni sɔ́migɔ bè wéli. A kire yaadiɛlɛ ni 'cùru lè, a céri síire dáà dī yaadiɛlɛ nī lè a ti 'kò namiige céri dè nɛ́ cɛ́ri nɛ̀ tóri céri síire sɛnrɛ nɛ̄ dè, bà kacuɔnriwɔ wi bé ki juu bé jo wiī núʔɔwɔ Yewe yiʔɛ mɛ́ gè. Césɛngɛ wírele yaabiimɛ bī, bàa bī nyùgo nɛ̄ gè á kire bɛ̀ʔ nyafungbege nɛ̄ gè.

31 «A ki sí pɛ́nì nyaa kacuɔnriwɔ wi 'ki nyaa yaadiɛlɛ niì cùru lèʔ, a wiì céri síire nyaa dè ni nī wuɔrɔ dèʔ, wi bé siɛn yige wè bè tɛ́ngɛ cɛnyɛ kɔlisiin.

32 «Cɛnyɛ kɔlisiinwuʔu nɛ̄ gè, a wi 'ki nyaa kàa sì fàri yaadiɛlɛ nɛ̄ lèʔ césɛngɛ nɛ̄ gèʔ, céri síire míɛni tiì kò namiige céri dèʔ, yaadiɛlɛ niì cùru lèʔ, 33 wi bé wi síire kùnu dè. Wiǐ sí yaadiɛlɛ kùnu lèʔ, césɛngɛ wírele yaama woli lè. Kacuɔnriwɔ wi bé siɛn yige wè bè tɛ́ngɛ cígini tiʔɛ káà nī cɛnyɛ kɔlisiin. 34 Cɛnyɛ kɔlisiinwuʔu nɛ̄ gè, kacuɔnriwɔ wi bé ki sɔ́migɔ bè wéli. A ki 'nyaa kàa sì fàri wírele tiʔɛ nɛ̄ gèʔ césɛngɛ nɛ̄ gèʔ, tiʔɛ kiì cùru gèʔ, kacuɔnriwɔ wi bé ki juu bé jo wiī cìiliwe Yewe yiʔɛ mɛ́ gè. Siɛn wi bé wi burudo jíge dè; wi bé kò cìiliwe.

35 «Nɛ̀ ki yaʔa a ki yé juu nɛ̀ kúɔ nɛ́ jo wiī cìiliwe wè, a kàa sí fàri wírele tiʔɛ nɛ̄ gè césɛngɛ nɛ̄ gè, 36 kacuɔnriwɔ wi bé ki sɔ́migɔ bè wéli. A kàa 'fàri wírele tiʔɛ nɛ̄ gè, nyùgo wè ki nɛ̄ʔ wi ní de ki caa a ki yē síire tiī namiige céri, nɛ́ ki cɛ́n wiī núʔɔwɔ Yewe yiʔɛ mɛ́ gè. 37 Nɛ̀ ki yaʔa a kàa sì fàri wírele tiʔɛ nɛ̄ gèʔ, a céri síire wuɔrɔ ti 'fùn baa dè, kacuɔnriwɔ wi bé ki juu bé jo wi nyɛ́nì puʔɔ, wiī cìiliwe Yewe yiʔɛ mɛ́ gè.

38 «A ki sí nyaa nàguɔ kire ga laa cɛliwɛ wi yē nɛ́ puupigele fìigele ní wi césɛngɛ nɛ̄ gè, 39 kacuɔnriwɔ wi bé ke sɔ́migɔ bè wéli. A wi 'ke nyaa fìigele fálifali, kire yē puʔulo gálì ke 'yɛ̀ césɛngɛ nɛ̄ gè. Siɛn wiī cìiliwe Yewe yiʔɛ mɛ́ gè.

40 «A siɛn wáà nyùgo 'laala a nzìire ti 'kúɔ dè, wiī cìiliwe. 41 A wi nzìire ti 'kúɔ wi gbɛlɛ nɛ̄ lè, gbawaʔagafɔli wī. Wiī cìiliwe. 42 A ki sí nyaa yaadiɛlɛ náà ni 'nyɛ́nigɛ nɛ̀ yɛli lè, lire láà 'kún nyùgo sunʔɔmɔ nī bè kire ga laa gbɛlɛ yiʔɛ mɛ́ gè nzìire fùndiʔɛ nī gè, kire yē césɛngɛ yaabiimɛ báà pi yɛ̀gí. 43 Kacuɔnriwɔ wi bé ni sɔ́migɔ bè wéli. A yaadiɛlɛ ni 'fiɛ nɛ́ sí nyɛ́nigɛ nɛ̀ yɛli lè, césɛngɛ yaabiimɛ tíɛlɛ bè, 44 siɛn wiī núʔɔwɔ, bɛ̀ césɛngɛ yaabiimɛ yē wi nɛ̄ wè. Kacuɔnriwɔ wi bé ki juu bé jo wiī núʔɔwɔ Yewe yiʔɛ mɛ́ gè, césɛngɛ yaabiimɛ pire kɛnmɛ nɛ̄, bàa bī wi nyùgo nɛ̄ gè.

45 «A ki sí nyaa césɛngɛ yaabiimɛ yē siɛn wáà nɛ̄ wè, wi béri burucɛnmidɛ nii, bé nzìire yaʔa dè nyaʔamidɛ. Wi bé nyuɔ puɔ gè bè tɔ́n, béri kòkuulo wáari bèri wáa: ‹Núʔɔwɔ ! Núʔɔwɔ !› 46 Bè wi yaʔa yaadiɛlɛ náà ní lè, wi bé kò núʔɔwɔ súuri. Wi bé kò wìi nigbe tiʔɛ káà nī; wi kòridiʔɛ ki bé puu bùguro kàduʔu mɛ́ gè.»

A kùɔnnɔ 'burudo cò dè

47 «A ki yē kùɔnnɔ yē burugo káà nɛ̄ gè, sìnbasiire wuʔu kire ga laa jèsii wuʔu gè, 48 a ki yē fɛ̀ni nɛ̄ wè, kire ga laa burudiinge nɛ̄ gè, lɛn jèsii wuʔu gè, kire ga laa sìnbasiire wuʔu gè, kire ga laa a kùɔnnɔ yē sɛ̀ngɛ nɛ̄ gè, á kire bɛ̀ʔ yɛgɛ ó yɛgɛ gáà pe 'kpíʔile nɛ́ sɛ̀ngɛ ní gè, 49 kire tiʔɛ gè gàa nɛ̄ kùɔnnɔ yē lè, a ki 'kò lamɔni céri dè á kire bɛ̀ʔ a ki 'nyɛ́nigɛ gè, burugo nɛ̄ gè kire ga laa sɛ̀ngɛ nɛ̄ gè, fɛ̀ni yo kire ga laa burudiinge gè, kire ga laa yɛrɛ ti mìɛni dáà dī sɛ̀ngɛ wori dè, kire yē kùɔnnɔ yaama bè. Pe 'yɛli bè ki tìɛ nɛ̄ wè. 50 Wi bé ki sɔ́migɔ wéli, bè kire yɛgɛ yige gè bè tɛ́ngɛ tiʔɛ káà nī cɛnyɛ kɔlisiin.

51 «Cɛnyɛ kɔlisiinwuʔu nɛ̄ gè, wi bé kùɔnnɔ tiʔɛ sɔ́migɔ gè bè wéli. A kàa 'fàri ki tiʔɛ nɛ̄ gè, burugo nɛ̄ gè, fɛ̀ni nɛ̄ yo kire ga laa burudiinge yo, sɛ̀ngɛ gè yo kire ga laa yɛrɛ ti mìɛni dáà dī sɛ̀ngɛ wori dè, lire yē kùɔnnɔ yaama páà bàa pi 'pii bè. Yɛgɛ gáà kiī núʔɔgɔ. 52 Wi bé burugo sórigo gè, kire ga laa fɛ̀ni wè, kire ga laa burudiinge gè, a ki yē sìnbasiire wuʔu kire ga laa lɛn jèsii wuʔu gè, á kire bɛ̀ʔ yɛgɛ ó yɛgɛ gáà pe 'kpíʔile nɛ́ sɛ̀ngɛ ní gè, nɛ́ ki cɛ́n lire yē kùɔnnɔ yaama páà bàa pi 'pii bè. Kire yɛgɛ ki 'yɛli pe- ki sórigo.

53 «A kacuɔnriwɔ wi sí ki nyaa kàa sì fàri kùɔnnɔ tiʔɛ nɛ̄ gèʔ, burugo nɛ̄ gèʔ, fɛ̀ni nɛ̄ wèʔ kire ga laa burudiinge gèʔ, kire ga laa yɛgɛ gáà pe 'kpíʔile nɛ́ sɛ̀ngɛ ní gèʔ, 54 wi bé ki juu bè gbɛ̀ngɛ bé jo pe- kire yɛgɛ jíge gè, bé sí ki yige bè tɛ́ngɛ tiʔɛ káà nī taziinwuʔu nɛ̄ gè, cɛnyɛ kɔlisiin. 55 Bà pe 'ki jíge nɛ̀ kúɔ gè, kacuɔnriwɔ wi bé ki sɔ́migɔ bè wéli. A wi 'ki nyaa kiì yiʔɛ gèʔ, nɛ̀ sí ki taa kàa sì cɛ́nì fàri ki nɛ̄ gèʔ, kiī núʔɔgɔ. Ki 'yɛli pe- ki sórigo kàsun nī. A ki 'tiɛlɛ tɛ́ngɛ yɛgɛ nɛ̄ gè ki laamɛ nī, kire ga laa ki kàduʔu mɛ́ gè, kire yē kùɔnnɔ yaama bī.

56 «A kacuɔnriwɔ wi sí ki nyaa a kùɔnnɔ cɛ̀ri 'láʔa burugo nɛ̄ gè, lɛ̀lɛ líì nī pe 'ki jíge gè, wi bé ki tiʔɛ ciɛn gè bè láʔa burugo nɛ̄ gè kire ga laa sɛ̀ngɛ nɛ̄ gè, kire ga laa fɛ̀ni nɛ̄ wè, á kire bɛ̀ʔ burudiinge nɛ̄ gè. 57 A ki sí pɛ́nì nyaa, tiɛlɛ ni 'koli nɛ̀ tɛ́ni burugo nɛ̄ gè, kire ga laa fɛ̀ni nɛ̄ wè, kire ga laa burudiinge nɛ̄ gè, kire ga laa sɛ̀ngɛ yɛgɛ nɛ̄ gè, a tiɛlɛ ni kpóri nɛ waa lè, kùɔnnɔ yaama piī nɛ yɛ̀gí nɛ waa wī. Kire yɛgɛ ki 'yɛli pe- ki sórigo kàsun nī. 58 A ki sí nyaa burugo gè, kire ga laa fɛ̀ni wè, kire ga laa burudiinge gè, á kire bɛ̀ʔ yɛgɛ ó yɛgɛ gáà pe 'kpíʔile nɛ́ sɛ̀ngɛ ní gè, a tiɛlɛ ni 'láʔa yɛgɛ nɛ̄ gè ki jígele kàduʔumɛ gè, pe 'yɛli bè ki jíge taziinwuʔu nɛ̄ gè, bà ki bé kò cìilige.»

59 Keli yē fànʔa kajuʔulo gálì gīɛlɛ kùɔnnɔ wuʔu nɛ̄ gè, a ki yē sìnbasiire burugo nɛ̄ gè, kire ga laa lɛn jèsii burugo nɛ̄, kire ga laa fɛ̀ni nɛ̄, kire ga laa burudiinge nɛ̄ gè, á kire bɛ̀ʔ yɛgɛ ó yɛgɛ nɛ̄ gàa pe 'kpíʔile nɛ́ sɛ̀ngɛ ní gè. Fànʔa kajuʔulo gálì kiyē nɛ tɛnmɛnɛ kanʔa kɛnmɛ bíì nɛ̄ ki 'yɛli pe- ki juu síɛ a yɛgɛ gíì yē cìilige, kire ga laa núʔɔgɔ, Yewe yiʔɛ mɛ́ gè.