Yirile 40

Yewe 'jo pe- wire Kòridiʔɛ yérige gè

1 A sí ń'nɛ̀ ki juu mɛ́ nɛ́ jo: 2 «Yebelige ki cɛnbelige nɛ̄ gè, muɔ 'yɛli bè mi cɔ́ri gè bè yérige, kire gáà gī mi gè. 3 Muɔ bé tɛ́ngɛ gè gunbɔli fɛ̀ni kàduʔu mɛ́ gè, baa siɛn sǐ gbɛ̀ nyaa wèʔ. 4 Muɔ bé tabali líɛ wè bè tɛ́ngɛ bé sí yɛrɛ taʔa dè wi nɛ̄ dàa ti 'yɛli bè puu wi nɛ̄ dè. Muɔ bé fètindaʔagɛlɛ tiige líɛ gè bè nyɔ́gɔ baa, bé sí fètingele líɛ gèle bè taʔa ki nɛ̄. 5 Muɔ bé wusuna sórigodiʔɛ líɛ gè, tiɛ cɛ̀nwɛ wuʔu gè, bè ki tɛ́ngɛ nyakungɛngɛ finʔɛgɛ yiʔɛ mɛ́ gè; muɔ míɛni bé Kòridiʔɛ ki wìile tɔ́n lè nɛ́ fɛ̀ni ní wè.

6 «Muɔ bé Yewe líɛ gè, wuʔu gè, bè ki tɛ́ngɛ Kòridiʔɛ wìile yiʔɛ mɛ́ gè, Kpàlidiʔɛ Kpátaʔa woli lè. 7 Muɔ bé tasaakpuʔɔ tɛ́ngɛ gè Kpàlidiʔɛ Kpátaʔa nɛ́ Yewe gbùʔɔrɔdiʔɛ yafanʔa sunʔɔmɔ nī bè, bé sí luʔɔ le ki nī. 8 Muɔ 'yɛli bè mi Kòridiʔɛ dàligɛ sùlu gè, bé sí wìile tɔ́nfɛni tɔ́n wè ki wìile nɛ̄ lè.

9 «Muɔ bé siɛnnyiɛnɛgɔn sùnmɔ líɛ bè, bè Kòridiʔɛ nyɛri nyɛri gè nɛ́ yɛrɛ ti mìɛni nɛ̄ dàa dī ki nī gè. Bà muɔ bé ki wàli dɛ́ngɛ, nɛ́ ki yakpiʔilide ti mìɛni ní dè; bà ti bé kò wàlidɛngɛrɛ m'mɛ́. 10 Yewe gbùʔɔrɔdiʔɛ yafanʔa gè, kakuɔrɔ kaasuʔuro wuʔu gè, muɔ bé siɛnnyiɛnɛgɔn sùnmɔ líɛ bè, bè ki nyɛri nyɛri gè nɛ́ ki yakpiʔilide ti mìɛni ní, bà gbùʔɔrɔdiʔɛ ki bé sí kò yacɛ̀njɛngɛ wàlidɛngɛgɛ m'mɛ́. 11 Bà míɛni tasaakpuʔɔ nɛ́ ki tɛ́ngɛdiʔɛ ní gè, muɔ bé ki nyɛri nyɛri bè ki wàli dɛ́ngɛ m'mɛ́.

12 «Muɔ bé kɔ́ri wè, wire nɛ́ wi jaala ní bèle, bè pa pe yérige Kpàlidiʔɛ Kpátaʔa wìile nɛ̄ lè. Ma pe gbéli nɛ́ luʔɔ ní gè. 13 Muɔ bé buruwalidɛngɛrɛ le dè Arawɔn nɛ̄ wè, bé siɛnnyiɛnɛgɔn sùnmɔ wo bè wi nɛ̄ bè wi wàli dɛ́ngɛ kire ga buu wiri baara kúu dè. 14 Muɔ bé wi jaala míɛni kɔ́ri bèle, bè burudɔniyɔ le yè pe nɛ̄. 15 Muɔ bé siɛnnyiɛnɛgɔn sùnmɔ wo bè pe nɛ̄, bè pe wàli dɛ́ngɛ bɛ̀ muɔ 'ki kpíʔile pe tuu nɛ̄ wè, kire ga buu peri baara kúu dè. Sùnmɔ wolo pi bé ki yaʔa pe- puu wàlidɛngɛlɛ bèri kacuɔnrilɔ baara kúu dè, peli nɛ́ pe siimɛ ní bè, lɛ̀lɛ ó lɛ̀lɛ.»

Misa wi 'Kpàlidiʔɛ Kpátaʔa yérige gè

16 A 'ki kpíʔile dàa ti mìɛni yé juu nɛ̀ gbɛ̀ngɛ wi mɛ́ dè. Bɛ̀ ki 'puu a wi 'ti mìɛni kpíʔile.

17 Bà ki 'kpíʔile, yebelige ki cɛnbelige nɛ̄ gè, yiɛlɛ nigbe tórilo kàduʔumɛ gè bà pe yé yiri Ezipiti kùlo nī lè, a Misa 'Kulocɛliɛ kpíʔile gè nɛ̀ yérige céwu.

18 A Misa wi 'tí a siɛnnɛ pe 'Kòridiʔɛ yɛ̀gɛ nɛ̀ yérige gè. A pe 'nyùyɔ cɔ́ri yè nɛ̀ yérige, nɛ́ tingele cɔ́ri gèle yi nɛ̄, nɛ́ kàgbiiparigɛlɛ pari gèle ke nɛ̄, nɛ́ tiindugugolo cɔ́ri gèle nɛ̀ yérige. 19 A pe 'kpátaʔa ki naamɛ fɛ̀ni yɛ́ligɛ wè Kòridiʔɛ ki naamɛ gè, nɛ́ ki yatɔngɔ líɛ gè nɛ̀ tɔ́n fɛ̀ni péliwe nɛ̄ wè naamɛ gè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

20 A Misa 'fali nɛ̀ siɛnrɛ kàdɛnitɛnyɛ líɛ yè nɛ̀ le ki laamɛ nī bè, nɛ́ kàgbiʔile líɛ gèle nɛ̀ le finʔɛgɛ ki kájingele nī gèle, nɛ́ fali nɛ̀ taʔa gè ki naamɛ gè. 21 A wi 'finʔɛgɛ líɛ gè nɛ̀ le Kòridiʔɛ nī gè, nɛ́ gunbɔli fɛ̀ni tùɔn wè nɛ̀ ki tɔ́n kire ga buu nyakungɛngɛ finʔɛgɛ ki- làri, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

22 A wi 'tabali líɛ wè nɛ̀ tɛ́ngɛ nī gè, gunbɔli fɛ̀ni yiʔɛ mɛ́ gè, Kòridiʔɛ ki cɛngɛnyɛnifolimɛ kàmɛgɛ kɔli mɛ́ gè. 23 A wi 'búru feliye líɛ yè nɛ̀ yi sɔ́migɔ nɛ̀ taanni, búru feliye nyáà yī tɛ́ngɛyɛ danʔa nī gè Yewe yiʔɛ mɛ́ gè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

24 A wi 'fètindaʔagɛlɛ tiige líɛ gè nɛ̀ tɛ́ngɛ Kpàlidiʔɛ Kpátaʔa nī gè, Kòridiʔɛ ki cɛngɛnyɛnifolimɛ kàliige kɔli mɛ́ gè, tabali yiʔɛ mɛ́ gè. 25 A wi 'fètingele líɛ gèle nɛ̀ taʔa ki nɛ̄ Yewe yiʔɛ mɛ́ gè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

26 A wi 'tiɛ cɛ̀nwɛ wusuna sórigodiʔɛ líɛ gè nɛ̀ tɛ́ngɛ Kpàlidiʔɛ Kpátaʔa nī gè, gunbɔli fɛ̀ni yiʔɛ mɛ́ gè. 27 Kire tiʔɛ nī gè, a wi 'nùdaanna wusuna sórigo wè baa, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

28 A wi 'Kòridiʔɛ ki wìile fɛ̀ni tùɔn wè wìile nɛ̄ lè. 29 A wi 'Yewe líɛ gè, wuʔu gè, nɛ̀ tɛ́ngɛ kpànʔanɛ Kòridiʔɛ wìile yiʔɛ mɛ́ gè, Kpàlidiʔɛ Kpátaʔa woli lè. Kire tiʔɛ nī gè a wi 'kakuɔrɔ kaasuʔuro nɛ́ yaliire kɔ̀n dè baa, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

30 A wi 'tasaakpuʔɔ tɛ́ngɛ gè Kpàlidiʔɛ Kpátaʔa nɛ́ Yewe gbùʔɔrɔdiʔɛ yafanʔa sunʔɔmɔ nī bè, nɛ́ luʔɔ le ki nī peri pìye jíri. 31 Misa nɛ́ nɛ́ Arawɔn jaala ní bèle, peli 'puu nɛ luʔɔ gáà kóri gè nɛ̀ pe kiyɛ nɛ́ pe tɔliyɔ jíri yè. 32 Bà pe 'puu nɛ pìye jíri lɛ̀lɛ ó lɛ̀lɛ a pe yé je jíin Kpàlidiʔɛ Kpátaʔa nī gè, kire ga laa a pe yé je sìʔɛrɛ kpɔni Yewe gbùʔɔrɔdiʔɛ yafanʔa nɛ̄ gè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.

33 A pe 'Kòridiʔɛ nɛ́ Yewe gbùʔɔrɔdiʔɛ yafanʔa màʔa gè nɛ́ suʔu nɛ́ fɛ̀ninɛ gunyɔ ní yè, nɛ́ wìile tɔ́n lè nɛ́ wìile tɔ́nfɛni ní wè. Bà ki 'kpíʔile a Misa wi 'baara ti mìɛni kúɔ.

Yewe cɛ̀nmɛ nɛ́ wi kpuɔmɔ pi 'Kòridiʔɛ nyì gè

34 A kàsadibagɛ ki tɔ́n gè, a cɛ̀nmɛ nɛ́ wi kpuɔmɔ pi nyì gè. 35 A ki 'nyaa sì cî ní gbɛ̀ jíin baa Kpàlidiʔɛ Kpátaʔa nī gèʔ, nɛ́ ki cɛ́n kàsadibagɛ ki cé tiʔɛ ki mìɛni tɔ́n, a Yewe cɛ̀nmɛ nɛ́ wi kpuɔmɔ pi 'Kòridiʔɛ le gè a ki 'nyì.

36 Nɛ̀ líɛ kire lɛ̀lɛ nī lè, a kàsadibagɛ ki gbɛ̀nɛ yɛ̀ Kòridiʔɛ naamɛ gè, siɛnnɛ pe nɛ̂ yɛ̀ nɛ̀ koligo líɛ gè nɛ waa, pe tánʔagɛlɛ ke mìɛni nɛ̄. 37 A ki 'nyaa kàsadibagɛ kiì cé yɛ̀ gèʔ, Isirayɛli siɛnnɛ pe nɛ̌ kɛ́ʔ. Pe nìɛ ki cɛngɛ siri gè, cɛngɛ gíì ki bága yɛ̀ naamɛ gè, pe- sí nɛ́ yɛ̀ de waa wè. 38 Nɛ́ ki cɛ́n Yewe kàsadibagɛ gè, ki 'puu Kòridiʔɛ nɛ̄ gè cɛnvugo nɛ̄ gè; a ki yē pìlige nī gè, kàsun nɛ 'puu nɛ nyí kàsadibagɛ nī gè. Bà ki 'puu Isirayɛli siɛnnɛ pe mìɛni nìɛ ki nyaʔa pe tánʔagɛlɛ ke mìɛni nī lɛ̀lɛ ó lɛ̀lɛ.