Leviiyé Kacuɔnrirɔ Sɛbɛ wè
Leviiyé
FANʔA KAJUʔULO GALI KE NYU KAKUƆRƆ NƐ YAKƆNRƆ WUʔU NƐ GE
(1.1–7.38)
1
1 Bè Yewe yaʔa wè baa Kpàlidiʔɛ Kpátaʔa nī gè, a wi 'Misa yeri wè nɛ́ jo:Kakuɔrɔ kaasuʔuro wori dè
2 «-Ki juu Isirayɛliyé mɛ́ bèle ma kele gálì tìɛ gèle pe nɛ̄:
«A siɛn wáà kɛ́nì yiri yeli sunʔɔmɔ nī bè nɛ̀ pɛn nɛ́ kpuʔɔrɔ ní Yewe mɛ́ wè, wi 'yɛli wi- pɛn nɛ́ kakuɔrɔ yajuʔua ní gàa ki 'kɔ́n wi nɛ̀togo nī gè, kire ga laa wi sìnbatogo nī gè, á kire bɛ̀ʔ wi síkatogo nī gè.
3 «A ki 'nyaa siɛn wi kpuʔɔrɔ ti 'kɔ̀n wi nɛ̀togo nī, bè kakuɔrɔ kaasuʔuro kɔ̀n dèb, wi 'yɛli bè pɛn nɛ́ nɛ̀piɛlɛ ní nàa nī kpɔlidiɛlɛ fùn lè. Wi sí pɛn nɛ́ ni ní Kpàlidiʔɛ Kpátaʔa wìile yiʔɛ mɛ́ gè, kire ga buu Yewe- fɔ̀li wi nɛ̄.
4 «Siɛn wi bé wi kɔli taʔa gè kakuɔrɔ yajuʔu ki nyùgo nɛ̄ gèc, kire ga buu Yewe- fɔ̀li ki nɛ̄ ki- kò kàsulugosuɔ wuʔu wi mɛ́. 5 Bà wi bé ki kɔni Yewe yiʔɛ mɛ́ gè. Arawɔn jaala bèle, kacuɔnrilɔ bèle, pe bé ki sìsiɛn tuʔɔ gèd bè ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle, gbùʔɔrɔdiʔɛ gáà gī Kpàlidiʔɛ Kpátaʔa wìile yiʔɛ mɛ́ gè. 6 Kire siɛn wi bé kakuɔrɔ yajuʔu ki sɛ̀ngɛ láʔa gè, bé sí ki kaara celile dè yasɛyɛ yasɛyɛ. 7 Kacuɔnriwɔ Arawɔn jaala bèle, pe bé kàsun le gbùʔɔrɔdiʔɛ nī gè, bé sí kásɛnrɛ le dè ki nī. 8 Pe bé yajuʔu ki yasɛyɛ líɛ yè, nɛ́ ki nyùgo nɛ́ ki sùnmɔ tiɛyɛ ní yè, bè taʔala kàsun nɛ̄ gè gbùʔɔrɔdiʔɛ yafanʔa nɛ̄ gè. 9 Siɛn ŋáà wi 'pɛn nɛ́ kakuɔrɔ ní dè, wi bé yajuʔu ki laafungbuʔɔ nɛ́ ki laara nɛ́ ki tɔliyɔ jíge yè nɛ́ luʔɔ ní. Kire kàduʔumɛ, kacuɔnriwɔ wi bé yajuʔu kaara ti mìɛni pínɛ bè sórigo nɛ́ ti ní gbùʔɔrɔdiʔɛ yafanʔa nɛ̄ gè. Kakuɔrɔ kaasuʔuro dī dàa kàsun ki sórigi dè, dàa nùdaanna ni nyɛ́ni Yewe fungo nyígi gè.
10 «A ki 'nyaa siɛn wi kpuʔɔrɔ ti 'kɔ́n wi sìnbatogo nī kire ga laa wi síkatogo nī, bè kakuɔrɔ kaasuʔuro kɔ̀n dè, wi 'yɛli bè pɛn nɛ́ sìnbapɛnnɛ ní kire ga laa síkapɛnnɛ ní nàa nī kpɔlidiɛlɛ fùn lè. 11 Kire siɛn wi bé ni kɔni Yewe yiʔɛ mɛ́ gè, gbùʔɔrɔdiʔɛ yafanʔa lìʔɛgɛlɛ nɛ̄ gèle, cɛngɛnyɛnifolimɛ kàmɛgɛ kɔli mɛ́ gè. Arawɔn jaala bèle, kacuɔnrilɔ bèle, pe bé ni sìsiɛn tuʔɔ gè bè ki nyɛri nyɛri gbùʔɔrɔdiʔɛ lìʔɛgɛlɛ nɛ̄ gèle. 12 Siɛn wi bé yajuʔu celile gè yasɛyɛ yasɛyɛ. Kacuɔnriwɔ wi bé ki yasɛyɛ, nɛ́ ki nyùgo nɛ́ ki sùnmɔ tiɛyɛ líɛ yè, bè taʔala kàsun nɛ̄ gè gbùʔɔrɔdiʔɛ yafanʔa nɛ̄ gè. 13 Bà wi bé yajuʔu ki laafungbuʔɔ nɛ́ ki laara nɛ́ ki tɔliyɔ jíge yè nɛ́ luʔɔ ní. Kire kàduʔumɛ, kacuɔnriwɔ wi bé ti mìɛni tɛ́ngɛ Yewe yiʔɛ mɛ́ bé ti sórigo gbùʔɔrɔdiʔɛ nɛ̄ gè. Kakuɔrɔ kaasuʔuro dī dáà kàsun ki sórigi dè, dàa nùdaanna ni nyɛ́ni Yewe fungo nyígi gè.
14 «A ki 'nyaa siɛn wi kpuʔɔrɔ dáà ní wi 'pɛn Yewe yiʔɛ mɛ́ gè kakuɔrɔ kaasuʔuro wori dè, ti 'kɔ̀n sínjiɛnyɛ nī yè, wi 'yɛli bè pɛn nɛ́ gòtolo ní kire ga laa gòriwuʔɔpile ní. 15 Kacuɔnriwɔ wi bé pɛn nɛ́ ni ní gbùʔɔrɔdiʔɛ yafanʔa mɛ́ gè, bè ni yétiige píle gè bè kɔ́n nɛ́ kɔli ní, bé sí ni nyùgo sórigo gè gbùʔɔrɔdiʔɛ nɛ̄ gè, bè ni sìsiɛn wo gè gbùʔɔrɔdiʔɛ lìʔɛlɛ nɛ̄ lè. 16 Bà wi bé sínjiɛnnɛ ni yékpoganʔa kɔ̀n gè nɛ́ ki laamɛ yɛrɛ ní dè, bè ti wáa cúnʔɔ wáadiʔɛ nī gè gàa gī gbùʔɔrɔdiʔɛ yafanʔa lìʔɛlɛ nī lè, cɛngɛnyɛnifoligɔli mɛ́ bè. 17 Wi bé sínjiɛnnɛ jaa lè kayɔbiyɔ siin; wi fǎ ni jaa bè láʔa nìi nɛ̄ʔ. Bà kacuɔnriwɔ wi bé ni sórigo kàsun nī gè gbùʔɔrɔdiʔɛ nɛ̄ gè. Kakuɔrɔ kaasuʔuro dī dàa kàsun ki sórigi dè, dàa nùdaanna ni nyɛ́ni Yewe fungo nyígi gè.»