Yaliire yakɛnrɛ wori dè
2
1 «A siɛn wáà kɛ́nì pɛn nɛ́ yaliire yakɔnrɔ ní bè pa kɛn Yewe mɛ́ wè, wi kpuʔɔrɔ ti 'yɛli bè puu míifuɔnibɔ. Wi bé sùnmɔ wo pi nɛ̄ bé wusuna cìiliwe taʔa pi nɛ̄. 2 Wi bé sí pɛn nɛ́ ti ní kacuɔnrilɔ mɛ́ bèle, Arawɔn jaala bèle. Kacuɔnriwɔ wi bé míimɛ kagbuunyiʔɛ nigbe kɔ̀n nɛ́ ki sùnmɔ ní bè, nɛ́ wusuna cìiliwe wi mìɛni ní. Wi bé ti sórigo gbùʔɔrɔdiʔɛ yafanʔa nɛ̄ gè ti- puu sɔ̀ngidaa wori. Yakɛnrɛ dī, dàa kàsun ki sórigi dè, dàa nùdaanna ni nyɛ́ni Yewe fungo nyígi gè. 3 Yaliire yakɛnrɛ sɛnrɛ dè, tire bé kò Arawɔn nɛ́ wi jaala wori. Kire liɛlɛ niī yaliicɛ̀njɛnrɛa; ni 'yiri yakɔnrɔ nī dàa kàsun ki sórigi dè Yewe mɛ́ wè.4 «A ki 'nyaa kpuʔɔrɔ dáà ní muɔ 'pɛn dè tiī yaliire yakɛnrɛ dáà pe yé kpúɔn nɛ́ míifuɔnibɔ ní bè nɛ́ ti fúɔ dìbige nī gè, ti 'yɛli ti- puu sìnvarifunb búru kpɔbilɔ bálì pe yé nyaʔami nɛ́ sùnmɔ ní bè, á kire bɛ̀ʔ sìnvarifun ŋɔ̀minɔ bálì nɛ̄ pe 'sùnmɔ wo bè.
5 «A ki yē muɔ kpuʔɔrɔ tiī yaliire yakɛnrɛ dáà pe 'fúɔ yakpɔbigɔ nɛ̄ gè, ti 'yɛli ti- puu sìnvarifun míifuɔnibɔ wori, dàa pe yé nyaʔami nɛ́ sùnmɔ ní bè. 6 Muɔ bé ti cùnʔɔ cùnʔɔ bé sùnmɔ wo ti nɛ̄. Tire yē yaliire yakɛnrɛ.
7 «A ki yē muɔ kpuʔɔrɔ ti 'káli ŋɔ̀mipiɛlɛ nī lè, ti 'yɛli ti- puu míifuɔnibɔ bàa pe yé nyaʔami nɛ́ sùnmɔ ní bè.
8 «Yaliire yakɛnrɛ dáà pe 'kpíʔile nɛ́ yɛrɛ dáà ní dè, muɔ bé pɛn nɛ́ ti ní Yewe mɛ́ wè, bè pa ti kɛn kacuɔnriwɔ mɛ́ wè; wi bé kɛ́ nɛ́ ti ní gbùʔɔrɔdiʔɛ yafanʔa mɛ́ gè. 9 Kacuɔnriwɔ wi bé tàa kɔ̀n yaliire yakɛnrɛ nī dè ti- kò sɔ̀ngidaa wori, bè ti sórigo gbùʔɔrɔdiʔɛ yafanʔa nɛ̄ gè. Yakɔnrɔ dī, dàa kàsun ki sórigi dè, dàa nùdaanna ni Yewe fungo nyígi gè. 10 Yaliire yakɛnrɛ sɛnrɛ dè, tire bé kò Arawɔn nɛ́ wi jaala wori. Kire liɛlɛ niī yaliicɛ̀njɛnrɛ wàlidɛngɛrɛ; ni 'yiri yakɔnrɔ nī, dàa kàsun ki sórigi dè Yewe mɛ́ wè.
11 «Yaliire yakɛnrɛ dáà ti mìɛni muɔ nɛ kanʔa Yewe mɛ́ wè, ti 'yɛli ti- puu sìnvarifun wori. Nɛ́ ki cɛ́n muɔ sì yɛli bè sìnvari le ti nī púloʔ nɛ́ míɛni sárigɛʔ yakɛnrɛ nī dè dàa kàsun ki sórigi Yewe mɛ́ wèʔ. 12 Muɔ bé gbɛ̀ pɛn nɛ́ sìnvari ní nɛ́ sárigɛ ní Yewe mɛ́ wè nɛ́ muɔ yasɛnpelide kpuʔɔrɔ ní dè, nɛ̀ ki yaʔa sìnvari nɛ́ sárigɛ sǐ ga tíi bé taʔa gbùʔɔrɔdiʔɛ yafanʔa nɛ̄ gèʔ bè puu nùdaanna náà ni Yewe fungo nyígi gèʔ.
13 «Muɔ bé yasuʔɔgɔ le yaliire yakɛnrɛ nī dè dàa ní muɔ 'pɛn dè. Muɔ sì yɛli bè cíi fíewu bè yasuʔɔgɔ le muɔ yaliire yakɛnrɛ nī dèʔ; kire nɛ ki tìí muɔ Kulocɛliɛ wi nyakungɛngɛ kiī nɛ mɔgi lɛ̀lɛ ó lɛ̀lɛ nīc.
14 «A muɔ 'pɛn yaliifɔnrɔ yakɛnrɛ ní dè, muɔ bé ti káli kàsun nɛ̄ bé ti cuʔɔri bé nɛ́ sa ti kɛn Yewe mɛ́ wè. 15 Muɔ bé sùnmɔ wo ti nɛ̄ bé sí wusuna cìiliwe taʔa ti nɛ̄. Kire yē yaliire yakɛnrɛ. 16 Yaliire dáà dī cuʔɔridɔ dè, kacuɔnriwɔ wi bé tàa kɔ̀n ti nī bè ti sórigo nɛ́ ti sùnmɔ ní bè, nɛ́ wusuna cìiliwe wi mìɛni ní, ti- puu sɔ̀ngidaa wori. Kire yē kakuɔrɔ yakɔnrɔ Yewe mɛ́ dàa kàsun ki sórigi dè.»