Yanyige yakɔnrɔ wori dè
3
1 «A siɛn wáà kɛ́nì pɛn nɛ́ kpuʔɔrɔ ní dàa dī yanyige yakɔnrɔa yajuʔu gè gàa gī nùɔ wè, a ki yē nɛ̀piɛlɛ kire ga laa nɛ̀nuu wè, wi 'yɛli bè pɛn Yewe mɛ́ nɛ́ yajuʔu ní gè, kpɔlidiɛlɛ fùn. 2 Siɛn wi bé wi kɔli taʔa gè kakuɔrɔ yajuʔu ki nyùgo nɛ̄ gè, bé ki kɔni Kpàlidiʔɛ Kpátaʔa wìile yiʔɛ mɛ́ gè. Arawɔn jaala bèle, kacuɔnrilɔ bèle, pe bé ki sìsiɛn tuʔɔ gè bè ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle.3 «Ŋàa wi 'pɛn nɛ́ yanyige yakɔnrɔ ní dè bè pa ti tɛ́ngɛ Yewe mɛ́ wè, wi 'yɛli bè tiɛyɛ nyáà yige yè baa, bè yi kɛn yakɔnrɔ dáà kàsun ki sórigi dè: sùnmɔ tiɛyɛ yi mìɛni nyáà yi 'ki laafungbuʔɔ nɛ́ ki laara màʔa dè, 4 nɛ́ seluʔulo siin ní gèle, nɛ́ ni sùnmɔ ní bè bàa pi 'sɛ̀nnɛ màʔa gèle, nɛ́ nyibɔli ní wè. Tire ti mìɛni bé kɔ̀n nɛ́ seluʔulo ní gèle.
5 «Kire kàduʔu mɛ́, Arawɔn jaala pe bé ti sórigo gbùʔɔrɔdiʔɛ yafanʔa nɛ̄ gè, nɛ́ kakuɔrɔ kaasuʔuro kaara ní dè dàa dī baa kàsun nī gè. Kakuɔrɔ yakɔnrɔ dī, dàa kàsun ki sórigi dè, dàa nùdaanna ni Yewe fungo nyígi gè.
6 «A ki 'nyaa siɛn wi kpuʔɔrɔ tiī sìnbapɔli wè, á kire bɛ̀ʔ sìnbacuɔ wè, kire ga laa síkapɔli wè, a kire 'laa síkacuɔ wè, bè ti kɛn yanyige yakɔnrɔ Yewe mɛ́ wè, wi 'yɛli bè puu kpɔlidiɛlɛ fùn. 7 A ki 'nyaa sìnbapile wi 'kɛn kpuʔɔrɔ dè, wi bé pɛn nɛ́ ni ní Yewe yiʔɛ mɛ́ gè. 8 Siɛn wi bé wi kɔli taʔa gè wi kpuʔɔrɔ sìnbapile ni nyùgo nɛ̄ gè, bé ni kɔni Kpàlidiʔɛ Kpátaʔa yiʔɛ mɛ́ gè. Arawɔn jaala bèle, pe bé ni sìsiɛn tuʔɔ gè bè ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle. 9 Siɛn wi 'yɛli bè kpuʔɔrɔ tɛ́ngɛ dè Yewe yiʔɛ mɛ́ dàa wi 'kɔ̀n yanyige yakɔnrɔ kaara nī dè, dàa kàsun ki sórigi dè, sùnmɔ tiɛyɛ yè: nɛgɛ gè nɛ́ ki naayugo ní gè gàa wi 'kɔ̀n migɛnigɛ kúɔmɔ mɛ́ bè, nɛ́ sùnmɔ tiɛyɛ yi mìɛni ní nyàa yi 'ki laafungbuʔɔ nɛ́ ki laara màʔa dè, 10 nɛ́ seluʔulo siin ní gèle nɛ́ sùnmɔ ní bè bàa pi 'sɛ̀nnɛ màʔa gèle, nɛ́ nyibɔli ní wè. Tire ti mìɛni bé kɔ̀n nɛ́ seluʔulo ní gèle. 11 Kacuɔnriwɔ wi bé ti sórigo gbùʔɔrɔdiʔɛ yafanʔa nɛ̄ gè. Kakuɔrɔ yaliire dīb, dàa kàsun ki sórigi Yewe mɛ́ wè.
12 «A ki 'nyaa síkpuɔ ní siɛn wi 'pɛn kpuʔɔrɔ dè, wi bé wi kɛn Yewe yiʔɛ mɛ́ gè. 13 Siɛn wi bé wi kɔli taʔa gè wi nyùgo nɛ̄ gè, bé wi kɔni Kpàlidiʔɛ Kpátaʔa yiʔɛ mɛ́ gè. Arawɔn jaala bèle, pe bé ki sìsiɛn tuʔɔ gè bè ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle.
14 «Ŋàa wi 'pɛn nɛ́ yanyige yakɔnrɔ ní dè bè ti tɛ́ngɛ Yewe yiʔɛ mɛ́ gè, yakɔnrɔ dáà kàsun ki sórigi dè, wi 'yɛli bè tiɛyɛ nyáà kɛn yè: sùnmɔ tiɛyɛ yi mìɛni nyàa yi 'ki laafungbuʔɔ nɛ́ ki laara màʔa dè, 15 nɛ́ seluʔulo siin ní gèle nɛ́ sùnmɔ ní bè bàa pi 'sɛ̀nnɛ màʔa gèle, nɛ́ nyibɔli ní wè. Tire ti mìɛni bé kɔ̀n nɛ́ seluʔulo ní gèle. 16 Kacuɔnriwɔ wi bé ti sórigo gbùʔɔrɔdiʔɛ yafanʔa nɛ̄ gè. Kakuɔrɔ yaliirec dī, dàa kàsun ki sórigi, dàa dī nùdaanna wori dè.