Leviiyé 4

Kapiile kàsulugo kakuɔrɔ wori dè

1 A sí ń'nɛ̀ ki juu mɛ́ nɛ́ jo: 2 «Ma ki juu siɛnnɛ mɛ́ bèle ma pe yɛ:

«A ki sí nyaa siɛn wáà 'kapiile kpíʔile lè, wiì sí ki kɔ̀rirɔ wèʔ, nɛ́ ki kpíʔile gàa kiì yɛli nɛ́ Yewe kajuudiɛlɛ láà ní wèʔ, dàa tire wi 'yɛli bè kpíʔile.»

A ki 'nyaa kacuɔnrilɔ kàfɔli wi 'kapiile kpíʔile lè

3 «A ki 'nyaa ŋáà nɛ̄ pe 'sùnmɔ wo bè, wi 'kapiile kpíʔile lè, a ki 'nyaa wire kɛnmɛ nɛ̄ siɛnnɛ pe 'kolimɔ taa bè, wi 'yɛli bè pɛn nɛ́ nɛ̀piɛyɛlilɛ ní, kpɔlidiɛlɛ fùn, bè pa ni tɛ́ngɛ yiʔɛ mɛ́ gè. Ni bé puu woli, kapiile náà wi 'kpíʔile lè lire kɛnmɛ nɛ̄.

4 «Wi sí pɛn nɛ́ nɛ̀piɛyɛlilɛ ní wìile mɛ́ lè, Yewe yiʔɛ mɛ́ gè, bé wi kɔli taʔa gè ni nyùgo nɛ̄ gè bé ni kɔni Yewe yiʔɛ mɛ́ gè. 5 Kacuɔnrilɔ kàfɔli wi bé nɛ̀piɛyɛlilɛ sìsiɛn káà tuʔɔ bè pɛn nɛ́ ki ní Kpàlidiʔɛ Kpátaʔa laamɛ nī bè. 6 Wi bé wi kabiɛlɛ nígi lè sìsiɛn nī gè bè ki nyɛri nyɛri ki gunbɔli fɛ̀ni yiʔɛ mɛ́ gè tɔliyɔ kɔlisiin, Yewe yiʔɛ mɛ́ gè. 7 Bà kacuɔnriwɔ wi bé sí sìsiɛn káà taʔa wusuna nùdaanna sórigodiʔɛ ki nyɛgɛlɛ nɛ̄ gèle, gàa gī Kpàlidiʔɛ Kpátaʔa nī gè, Yewe yiʔɛ mɛ́ gè. Wi bé sí sìsiɛn sɛngɛ ki mìɛni wo nɛ̄ gè ki táanmɛ tiɛyɛ nī yè, wuʔu gàa gī Kpàlidiʔɛ Kpátaʔa wìile táanni lè.

8 «Bà wi bé sùnmɔ tiɛyɛ yi mìɛni celile kapiʔile kàsulugo nɛ̀piɛyɛlilɛ nī lè: sùnmɔ tiɛyɛ yi mìɛni nyáà yi 'ki laafungbuʔɔ nɛ́ ki laara màʔa dè, 9 nɛ́ seluʔulo siin ní gèle nɛ́ sùnmɔ ní bè bàa pi 'sɛ̀nnɛ màʔa gèle, nɛ́ ní wè. Tire ti mìɛni bé kɔ̀n nɛ́ seluʔulo ní gèle, 10 majo bɛ̀ ki 'kpíʔile wori nɛ̄ dè. Kacuɔnriwɔ wi bé ti sórigo Yewe gbùʔɔrɔdiʔɛ yafanʔa nɛ̄ gè, kakuɔrɔ kaasuʔuro wuʔu gè. 11 Nɛ̀ ki yaʔa nɛ̀piɛyɛlilɛ sɛ̀ngɛ gè, nɛ́ kaara ti mìɛni ní dè, nɛ́ nyùgo ní gè, nɛ́ tɔliyɔ ní yè, nɛ́ laafungbuʔɔ nɛ́ ki laara nɛ́ ti fire ní dè, 12 kire 'jo tire dáà ti mìɛni ti 'kò nɛ̀piɛyɛlilɛ wori dè, wi bé kɛ́ nɛ́ ti ní bùguro kàduʔu mɛ́ gè, tiɛciilige tiʔɛ nī gè gàa nī pe cúnʔɔ wáari gè, bè sa ti sórigo cúnʔɔ gboli nɛ̄ lè nàa nɛ̄ kásiin kàsun ki yē gè.»

A ki yē Isirayɛliyé tògo ki mìɛni 'kapiile kpíʔile lè

13 «A ki sí nyaa tògo siɛnnɛ pe mìɛni bīɛlɛ pe 'tánʔa nɛ̀ pùunni bèle, nɛ́ ki kpíʔile gàa kiì yɛli nɛ́ kajuudiɛlɛ láà ní lèʔ, piyè sí ki kɔ̀rirɔ wèʔ, pe bé kolimɔ taa. 14 A pùunnidiʔɛ ki pɛ́nì cɛ́n gè, Isirayɛliyé pe mìɛni bé pɛn nɛ́ nɛ̀piɛyɛlilɛ ní, wìile yiʔɛ mɛ́ gè. Ni bé puu woli. 15 Isirayɛli tògo liɛlɛ pe bé pe kiyɛ taʔala yè nɛ̀piɛyɛlilɛ ni nyùgo nɛ̄ gè Yewe yiʔɛ mɛ́, dí pe wàa sí ni kɔni Yewe yiʔɛ mɛ́ gè.

16 «Bà kàfɔli wi bé nɛ̀piɛyɛlilɛ sìsiɛn káà líɛ bè jíin Kpàlidiʔɛ Kpátaʔa nī gè. 17 Wi bé wi kabiɛlɛ nígi lè sìsiɛn nī gè bè ki nyɛri nyɛri gunbɔli fɛ̀ni yiʔɛ mɛ́ gè tɔliyɔ kɔlisiin, Yewe yiʔɛ mɛ́ gè. 18 Bà kacuɔnriwɔ wi bé sí sìsiɛn káà taʔa wusuna sórigodiʔɛ ki nyɛgɛlɛ nɛ̄ gèle, gàa gī baa Kpàlidiʔɛ Kpátaʔa nī gè Yewe yiʔɛ mɛ́ gè, bé sí sìsiɛn sɛngɛ ki mìɛni wo ki táanmɛ tiɛyɛ nī yè, wuʔu gáà ki yē Kpàlidiʔɛ Kpátaʔa wìile táanni lè.

19 «Bà wi bé sùnmɔ tiɛyɛ yi mìɛni kɔ̀n bè yi sórigo gbùʔɔrɔdiʔɛ yafanʔa nɛ̄ gè. 20 Wi bé ki kpíʔile nɛ́ nɛ̀piɛyɛlilɛ náà ní lè majo kɛnmɛ bíì nɛ̄ wi 'ki kpíʔile nɛ́ kapiʔile kàsulugo nɛ̀piɛyɛlilɛ níì ní lè. Bɛ̀ sí wi bé ki kpíʔile bè kàsulugosuɔ baara kúɔ dè, bà pe kapiʔile kàsulugo ki bé suɔ. 21 Wi 'yɛli bè kɛ́ nɛ́ nɛ̀piɛyɛlilɛ ni tiɛsɛnyɛ ní yè bùguro kàduʔu mɛ́ gè, bè sa ti sórigo kɛnmɛ bíì nɛ̄ wi yé nɛ̀piɛyɛlilɛ pélile wori sórigo dè. Isirayɛli tògo siɛnnɛ kapiʔile kàsulugo kakuɔrɔ dī.»

A ki yē kàfɔli wi 'kapiile kpíʔile lè

22 «A ki sí nyaa kàfɔli wáà wi 'kapiile kpíʔile lè, wiì sí ki kɔ̀rirɔ wèʔ, nɛ́ ki kpíʔile gàa kiì yɛli nɛ́ wi Kulocɛliɛ kajuudiɛlɛ láà ní lèʔ, a wi 'kolimɔ taa bè, 23 a pe 'wi kapiile tìɛ lè wi nɛ̄, nàa wi nyɛ́nì kpíʔile lè, wi 'yɛli bè pɛn nɛ́ síkapɔli ní, kpɔlidiɛlɛ fùn, ŋàa wī wi kpuʔɔrɔ dè. 24 Wi bé wi kɔli taʔa gè síkapɔli wi nyùgo nɛ̄ gè, bé wi kɔni tiʔɛ nī gè gàa nī pe sí yajuuro kpúu dè Yewe yiʔɛ mɛ́ gè. dī.

25 «Bà wi bé wi kabiɛlɛ nígi lè kapiʔile kàsulugo síkapɔli wi sìsiɛn nī gè, bé sí kàa taʔa ki nyɛgɛlɛ nɛ̄ gèle, kakuɔrɔ kaasuʔuro wuʔu gè. Wi bé sí sìsiɛn sɛngɛ wo gè gbùʔɔrɔdiʔɛ ki táanmɛ tiɛyɛ nɛ̄ yè.

26 «Wi bé sùnmɔ pi mìɛni sórigo gbùʔɔrɔdiʔɛ nɛ̄ gè, majo bɛ̀ kiī nɛ kpínʔini wori nɛ̄ dè. Bɛ̀ sí kacuɔnriwɔ wi bé kàsulugosuɔ baara kúɔ dè kàfɔli mɛ́ wè, bà wi kapiʔile kàsulugo ki bé suɔ.»

A ki yē kùlo siɛnwariwɛ wi 'kapiile kpíʔile lè

27 «A ki sí nyaa kùlo siɛnwariwɛ wáà wi 'kapiile kpíʔile lè, wiì sí ki kɔ̀rirɔ wèʔ, nɛ́ ki kpíʔile gàa kiì yɛli nɛ́ kajuudiɛlɛ láà ní wèʔ, a wi 'kolimɔ taa bè, 28 a pe 'wi kapiile tìɛ lè wi nɛ̄, nàa wi nyɛ́nì kpíʔile lè, wi 'yɛli bè pɛn nɛ́ síkacuɔ ní, kpɔlidiɛlɛ fùn, ŋàa wī wi kpuʔɔrɔ dè, wi kapiile kɛnmɛ nɛ̄ bè nàa wi 'kpíʔile lè. 29 Wi bé wi kɔli taʔa gè síkacuɔ wi nyùgo nɛ̄ gè, bé wi kɔni tiʔɛ gíì nī pe nɛ̂ yajuuro kpúu dè.

30 «Bà wi bé wi kabiɛlɛ nígi lè sìsiɛn nī gè bé sí ki taʔa Yewe ki nyɛgɛlɛ nɛ̄ gèle, kakuɔrɔ kaasuʔuro wuʔu gè. Wi bé sí sìsiɛn sɛngɛ ki mìɛni wo gbùʔɔrɔdiʔɛ ki táanmɛ tiɛyɛ nī yè.

31 «Kacuɔnriwɔ wi 'yɛli bè sùnmɔ tiɛyɛ yi mìɛni kɔ̀n, majo bɛ̀ ki 'kpíʔile wori nɛ̄ dè, bè ti sórigo gbùʔɔrɔdiʔɛ nɛ̄ gè. Ti bé puu nùdaanna náà ni Yewe fungo nyígi gè. Kacuɔnriwɔ wi bé sí kàsulugosuɔ baara kúɔ dè siɛn mɛ́ wè, bà wi kapiʔile kàsulugo ki bé suɔ.

32 «A ki yē sìnbapile ní wi 'pɛn wè, kapiʔile kàsulugo kakuɔrɔ woli lè, wi kpuʔɔrɔ ti 'yɛli bè puu sìnbaporipile, kpɔlidiɛlɛ fùn. 33 Wi bé wi kɔli taʔa gè ni nyùgo nɛ̄ gè, kire kapiʔile kàsulugo sìnbapile náà lè, bé ni kɔni tiʔɛ gíì nī pe nɛ̂ kakuɔrɔ kaasuʔuro yajuuro kpúu dè.

34 «Bà kacuɔnriwɔ wi bé wi kabiɛlɛ nígi lè ni sìsiɛn nī gè bé sí ki taʔa Yewe gbùʔɔrɔdiʔɛ yafanʔa ki nyɛgɛlɛ nɛ̄ gèle, kakuɔrɔ kaasuʔuro wuʔu gè. Wi bé sí sìsiɛn sɛngɛ ki mìɛni wo gbùʔɔrɔdiʔɛ ki táanmɛ tiɛyɛ nɛ̄ yè.

35 «Kacuɔnriwɔ wi 'yɛli bè sùnmɔ tiɛyɛ yi mìɛni kɔ̀n yè, majo bɛ̀ ki 'kpíʔile yanyige yakɔnrɔ wori nɛ̄ dè, bè yi sórigo gbùʔɔrɔdiʔɛ nɛ̄ gè nɛ́ yakɔnrɔ díì ní dè dàa dī baa dè, dàa kàsun ki sórigi Yewe yiʔɛ mɛ́ gè. Kacuɔnriwɔ wi bé sí kàsulugosuɔ baara kúɔ dè wi mɛ́, bà siɛn wi kapiʔile kàsulugo ki bé suɔ.»