Kapiʔile gálì kɛnmɛ nɛ̄ pe 'yɛli bè kapiʔile kàsulugo kakuɔrɔ kúɔ dè
5
1 «A ki sí nyaa wàa 'yerile lúʔu yeli nī kaala láà wuʔu nɛ̄, bè sa kányiʔɛ juu gàa wi 'nyáà gè, kire ga laa gàa wi 'lúʔu gè, a wi 'cíi, wiì fɔ̀li wèʔ, wi kolimɔ pi bé tuu wi nɛ̄a.2 «A wàa 'cò nɛ̀ taa yɛgɛ káà nɛ̄ gáà ki 'núʔɔ Yewe yiʔɛ mɛ́ gè, nɛ̀ ki yaʔa wiì ki cɛ́n gèʔb, a ki cɛ́nì yē nyàʔayɛgɛ yakuugo kire ga laa yajuʔu yakuugo gáà ki 'núʔɔ Yewe yiʔɛ mɛ́ gè, á kire bɛ̀ʔ yafuloligo káà nɛ̄ gàa ki 'núʔɔ Yewe yiʔɛ mɛ́, wire tíimɛ bé kò núʔɔwɔ Yewe yiʔɛ mɛ́ bè kolimɔ taa.
3 «A wàa 'cò nɛ̀ taa siɛn núʔɔmɔ páà nɛ̄c bàa pi 'wi yaʔa wi 'kò núʔɔwɔ Yewe yiʔɛ mɛ́ gè, nɛ̀ ki yaʔa wiì ki cɛ́n gèʔ, a wi pɛ́nì ki cɛ́n gè, wi bé kolimɔ taa.
4 «A ki 'nyaa wàa 'fuu nɛ̀ kàli, wiì sɔ̀ngi wèʔ, a ki cɛ́nì yē kacɛ̀ngɛ yo, kire ga laa kapiʔi yo, a wi pɛ́nì ki cɛ́n gè, wi bé kolimɔ taad.
5 «Kele gálì ke mìɛni gèle, a ki pɛ́nì nyaa wàa 'ki cɛ́n wi nyɛ́nì kolimɔ taa wè, wi 'yɛli bè yéri siɛnnɛ yiʔɛ mɛ́ gè bè wi kapiile juu lè. 6 Wi bé sí pɛn nɛ́ sìnbapori ní, kire ga laa nɛ́ síkacuɔ ní, Yewe mɛ́ wè, kapiʔile kàsulugo kakuɔrɔ wuu kapiile náà wi 'kpíʔile lè. Kacuɔnriwɔ wi bé kàsulugosuɔ baara kúɔ dè wi mɛ́, wi kapiile wuʔu nɛ̄ gè.»
A ki sí nyaa siɛn wáà yē fɔ̀ngɔfɔli nɛ̀ cáanri wè
7 «A yakaa wè siɛn mɛ́ wèʔ bè ba sìnbapori kire ga laa síkacuɔ suɔ wèʔ, wi bé pɛn nɛ́ gòtogolo siin ní kire ga laa gòriwuɔyɔ siin ní Yewe mɛ́ wè, kapiʔile kàsulugo kakuɔrɔ wori kapiile náà wi 'kpíʔile lè. Làa bé puu kapiʔile kàsulugo kakuɔrɔ woli, nìi ni bé puu kakuɔrɔ kaasuʔuro woli. 8 Wi bé ke kɛn kacuɔnriwɔ mɛ́ wè. Pélile ni bé puu kapiʔile kàsulugo kakuɔrɔ woli. Wi bé ni yétiige ŋáʔana gè bè kaa nɛ́ kɔli ní, bé ni tɔ́ligi bè ceri nɛ́ kamijinge ní; wiǐ ni nyùgo ceri gè bè láʔa yétiige nɛ̄ gèʔ.
9 «Bà kacuɔnriwɔ wi bé ni sìsiɛn káà nyɛri nyɛri gbùʔɔrɔdiʔɛ lìʔɛlɛ nɛ̄ lè, bé sìsiɛn sɛngɛ wo gè gbùʔɔrɔdiʔɛ ki táanmɛ tiɛyɛ nī yè. Kapiʔile kàsulugo kakuɔrɔ dī. 10 Bà kacuɔnriwɔ wi bé siinwoli kɔ̀n lè kakuɔrɔ kaasuʔuro, nɛ̀ yɛli nɛ́ kakuɔrɔ tìɛgɛnmɛ ní bè. Kacuɔnriwɔ wi bé kàsulugosuɔ baara kúɔ dè wi mɛ́, bà wi kapiʔile kàsulugo ki bé suɔ.
11 «A ki 'nyaa siɛn ŋáà nī fɔ̀ngɔ ki 'cùru, wiǐ gbɛ̀ jáa bè gòtogolo siin suɔʔ kire ga laa gòriwuɔyɔ siin suɔ yèʔ, wi bé pɛn nɛ́ míifuɔnibɔ juubaanyɛni tílaga ní gè kpuʔɔrɔ wi kapiile wuʔu nɛ̄ gè. Ti bé puu kapiʔile kàsulugo kakuɔrɔ wori. Wi fǎga sùnmɔ wo bè míimɛ nɛ̄ bèʔ, wiǐ wusuna cìiliwe taʔa pi nɛ̄ʔ, nɛ́ ki cɛ́n kapiʔile kàsulugo kakuɔrɔ dī. 12 Wi bé pɛn nɛ́ míimɛ ní bè, bè pi kɛn kacuɔnriwɔ mɛ́ wè. Kacuɔnriwɔ wi bé míimɛ kagbuunyiʔɛ nigbe kɔ̀n ki- puu sɔ̀ngidaa wuʔu, bé ki sórigo gbùʔɔrɔdiʔɛ yafanʔa nɛ̄ gè, bè fàri yakɔnrɔ díì nɛ̄ dè dàa dī baa dè, dàa kàsun ki sórigi Yewe yiʔɛ mɛ́ gè. Kapiʔile kàsulugo kakuɔrɔ dī. 13 Bɛ̀ sí kacuɔnriwɔ wi bé kàsulugosuɔ baara kúɔ dè wi mɛ́ kire ga buu kapiile náà wi 'kpíʔile lè kele gálì nī gèle, kapiile ni kàsulugo ki bé suɔ. Míizɛnmɛ pi bé kò kacuɔnriwɔ wobo, majo bɛ̀ yaliire yakɛnrɛ wori ti 'puu dè.»
Kolimɔ kakuɔrɔ wori dè
14 A Yewe sí ń'nɛ̀ ki juu Misa mɛ́ nɛ́ jo:
15 «A ki sí nyaa wàa 'koli, a wi 'kapiile kpíʔile yɛrɛ dáà wuʔu nɛ̄ gè dàa dī wàlidɛngɛrɛ Yewe mɛ́, a wiì ki kɔ̀rirɔ gèʔ, wi bé pɛn nɛ́ sìnbapɔli ní Yewe mɛ́, ŋàa wī kolimɔ kakuɔrɔ wuu wè. Wi bé wi nyíɛnɛ gɔ̀n wi sìnbatogo nī gè, kpɔlidiɛlɛ fùn, sìnbapɔli ŋáà walifiiwe walikpegele lɔri ti 'juu nɛ̀ yɛli nɛ́ saawalidɛngɛgɛ ki wali tɔ́rigɛnmɛ ní bèe. 16 Yawalidɛngɛgɛ gáà wuʔu nɛ̄ wi 'koli gè, wi 'yɛli bè ki fuʔɔ tɔ́n gè, bé ní tílaya kogunɔwuʔu fàri gè ki nɛ̄ bè ti kɛn kacuɔnriwɔ mɛ́ wè. Kacuɔnriwɔ wi bé kàsulugosuɔ baara kúɔ dè wi mɛ́ nɛ́ kolimɔ kakuɔrɔ ní dè, sìnbapɔli wè, bà siɛn wi kapiʔile kàsulugo ki bé suɔ.
17 «A ki sí nyaa siɛn wáà 'kapiile kpíʔile lè, wiì sí ki cɛ́n wèʔ, nɛ́ ki kpíʔile gàa kiì yɛli nɛ́ Yewe kajuudiɛlɛ láà ní wèʔ, wi bé kolimɔ taa bé ki tugoro tugo dè.
18 «Wi bé pɛn nɛ́ sìnbapɔli ní wè, kpɔlidiɛlɛ fùn, bè wi kɛn kacuɔnriwɔ mɛ́ wè. Wi bé wi nyíɛnɛ gɔ̀n wi sìnbatogo nī gè, sìnbapɔli ŋáà lɔri ti juu nɛ̀ yɛli nɛ́ nyuɔ gáà ní pe 'tɛ́ngɛ kolimɔ kakuɔrɔ wuʔu nɛ̄ gè. Kacuɔnriwɔ wi bé sí kàsulugosuɔ baara kúɔ dè wi mɛ́ kaala náà wi 'kpíʔile lè a wi 'tánʔa nɛ̀ pùunni, wiì sí ki kɔ̀rirɔ wèʔ. Bà siɛn wi kapiʔile kàsulugo ki bé suɔ. 19 Kolimɔ kakuɔrɔ dī. Nɛ́ ki cɛ́n siɛn ŋáà wi yé tɔ̀ni nɛ̀ koli Yewe yiʔɛ mɛ́ gè.»
20 A Yewe sí ń'nɛ̀ ki juu Misa mɛ́ nɛ́ jo:
21 «A ki sí nyaa wàa 'kapiile kpíʔile nɛ̀ koli Yewe yiʔɛ mɛ́ gè, dùʔɔ wi 'finɛ wi siɛnnyɛni mɛ́ yakaa wuʔu nɛ̄ gàa pe 'kɛn wi mɛ́ nɛ́ jo wi- ki cò gè, á 'kire laa yakaa gàa wi 'náari gè, á kire bɛ̀ʔ gàa wi 'yùu gè, a ki yē gàa wi 'núʔɔrɔ nɛ̀ suɔ wi siɛnnyɛni mɛ́ wè, 22 á 'kire laa á wi 'finɛ yakaa wuʔu nɛ̄ gàa ki 'pùunni á wi kɛ́nì ki nyaa gè, a ki 'nyaa wi finɛ nɛ́ kàli wi kacɛ́nnɛ nɛ̄ nàa siɛn bé gbɛ̀ kpíʔile lè, 23 ŋàa wi 'ki kapiile náà ni làa kpíʔile lè nɛ̀ kolimɔ taa bè, wi 'yɛli bè koli pɛn nɛ́ ki ní gàa wi 'yùu gè, kire ga laa gàa wi 'nùʔɔrɔ nɛ̀ suɔ wi siɛnnyɛni mɛ́ wè, á kire bɛ̀ʔ gàa pe 'kɛn wi mɛ́ nɛ́ jo wi- ki cò gè, kire ga laa gàa ki 'pùunni á wi kɛ́nì ki nyaa gè, 24 á kire 'laa yɛgɛ ó yɛgɛ gáà wuʔu nɛ̄ wi 'finɛ nɛ́ kàli wè. Wi bé koli bè ki mìɛni kɛn bé ki tílaya kogunɔwuʔu fàri ki nɛ̄, bé nɛ́ koli ki kɛn ki kàfɔli mɛ́ wè, cɛngɛ gíì wi 'wi kolimɔ wuʔu cɛ́n gè a wi je pɛn nɛ́ wi kolimɔ kakuɔrɔ ní dè.
25 «Wi 'yɛli bè pɛn kacuɔnriwɔ mɛ́ wè nɛ́ sìnbapɔli ní, kpɔlidiɛlɛ fùn, bè kɛn Yewe mɛ́ wè. Wi bé wi nyíɛnɛ bè kɔ̀n wi sìnbatogo nī gè, sìnbapɔli ŋáà lɔri ti 'juu nɛ̀ yɛli nɛ́ nyuɔ gáà ní pe 'tɛ́ngɛ kolimɔ kakuɔrɔ wuʔu nɛ̄ gè. 26 Kacuɔnriwɔ wi bé sí kàsulugosuɔ baara kúɔ dè wi mɛ́ Yewe yiʔɛ mɛ́ gè, bà siɛn wi kapiʔile kàsulugo ki bé suɔ, a ki cɛ́nì nyaa kaala ó kaala náà wi 'kpíʔile lè nɛ̀ kolimɔ taa bèf.»