Leviiyé 11

FANʔA KAJUʔULO GALI KE NYU YACIILIDE NƐ YANUʔƆRƆ WORI NƐ DE

(11.1–15.33)

Yawiire dáà dī cìilide nɛ́ dàa dī núʔɔrɔ dè

1 A 'ki juu nɛ́ mɛ́ nɛ́ jo:

2 «Ye- ki juu mɛ́ bèle, ye- fànʔa kajuʔulo gálì tìɛ gèle pe nɛ̄:

«Yawiire dáà ti mìɛni nī dè, dàa dī duniya nī wè, ti n'dɛ yawiire dáà yeli bé gbɛ̀ káa dè:

3 «Yawiʔi ó yawiʔi gáà gī nɛ́ fèrile ní bèle bàli pe 'sɔ́migɔ nɛ̀ wàli bèle, á ki yajuuro tiī nɛ núru nɛ káa wè, yeli bé gbɛ̀ tire káa. 4 Yawiire dáà ti núru nɛ káa yákuɔ dè, nɛ̀ ki yaʔa fèrile piyè wàligí bèleʔ, á kire bɛ̀ʔ fèrile ní bèle wálilɛ bèle nɛ̀ ki yaʔa ti wè nɛ núru nɛ káa dèʔ, yeli sǐ gbɛ̀ tire káaʔ. Kire 'jo nyuʔɔmɔ wè, 5 nɛ́ kàgbelige ní gè, 6 nɛ́ pòli ní wè, tire yē dàa ti núru nɛ káa dè nɛ̀ ki yaʔa ti fèrile piyè wáligiʔ. Kire nɛ̄ yeli 'yɛli bè ti tɔ́ri núʔɔrɔ yeli mɛ́, Yewe yiʔɛ mɛ́ gè.

7 «Nɛ́ míɛni tiɛligɛ kiī yajuʔu káà gàa ki 'núʔɔ gè yeli mɛ́ Yewe yiʔɛ mɛ́ gè, nɛ́ ki cɛ́n ki fèrile pe 'sɔ́migɔ nɛ̀ wáligi, nɛ̀ ki yaʔa ki wè nɛ núru nɛ káaʔ. 8 Yeli sì yɛli bè yawiire dáà kaara káa dèʔ, yeli míɛni sì yɛli bè cò daa ti wokuugo káà nɛ̄ʔ. Tire yē núʔɔrɔ yeli mɛ́, Yewe yiʔɛ mɛ́.

9 «Dàa dī luʔɔ nī gè, kuʔɔjii nī wè nɛ́ lakoliyo nī yè, yeli bé gbɛ̀ri ti mìɛni káa dàa dī nɛ́ jìɛnyɛ ní yè nɛ́ koriyo ní yè. 10 Nɛ̀ ki yaʔa yeli sǐ ga tíi dàa káa dèʔ dàa nɛ̄ jìɛnyɛ nɛ́ koriyo wè ti nɛ̄ dèʔ, yawiiyiride dáà dī nìʔɛrɛ níɛ fini nɛ mári luʔɔ nī gè kire ga laa yawiire táà tiiyɛ ní, a ti cɛni yē kuʔɔjii nī wè á kire bɛ̀ʔ lakoliyo nī yè. Tire yē yafunro yɛrɛ yeli mɛ́. 11 Bɛ̀ tiī yafunro yeli mɛ́ dè, yeli sǐ gbɛ̀ ti kaara káa dèʔ; yeli 'yɛli bè ti wokuuro tɔ́ri dè yafunro míɛni. 12 Yawiʔi ó yawiʔi gáà gī luʔɔ nī gè nɛ́ gàa nɛ̄ jìɛnyɛ nɛ́ koriyo wè ki nɛ̄ gèʔ, kire yē yafungo yeli mɛ́.

13 «Sínjiɛnrɛ nī dè, dàa tire yē yafunro yeli mɛ́, yeli sǐ gbɛ̀ ti káaʔ: kàgbɛni wè, dìbagɛ gè, nyùɔwɔ wè, 14 dìfira wè, wɔ̀kɔngɔ gè nɛ́ ki feliye ní yè, 15 dìbawuɔlɔ lè nɛ́ ni feliye ní yè, 16 kànasuʔulo wè, gìdege gè, fúɔkɔlilɔ lè, gànviɛlɛ lè nɛ́ ni feliye ní yè, 17 gbòdofinige gè, nyápɔrikpele lè, nɛ́ sàtorigo ní gè, 18 gìdefiige gè, luʔɔ nyápɔrigɔ gè, nɛ́ dìbawuʔɔ ní gè, 19 fúɔkɔligɔ gè, gbìile nɛ́ wi feliye ní yè, gòtunɔpɔrɔ dè, nɛ́ dírige ní gè.

20 «Yafiniyirigele ke mìɛni gálì ke yē nìʔɛgɛlɛ níɛ fini nɛ mári gèle, níɛ tári dàala nɛ̄ lè, keli yē yafunro yeli mɛ́. 21 Nɛ̀ ki yaʔa, yafiniyirigele gálì gīɛlɛ ke fini níɛ tári nɛ̀ jàʔá nɛ yogi dàala nɛ̄ lè, yeli bé gbɛ̀ri keli káa: 22 kire 'jo kòto nɛ́ wi feliye ní yè, kàbarigɛ nɛ́ ki feliye ní yè, vìɛnri nɛ́ wi feliye ní yè, nɛ́ vìɛnrijolo nɛ́ ni feliye ní yè. 23 Nɛ̀ ki yaʔa yafiniyirigele gílì sɛngɛlɛ gèle, ke mìɛni yē yafunro yeli mɛ́, gàli ke yē nìʔɛgɛlɛ níɛ fini nɛ mári gèle, níɛ tári dàala nɛ̄ lè.

24 «Ti n'dɛ dàa ti bé yeli núʔɔ Yewe yiʔɛ mɛ́ gè. A ki sí nyaa wàa 'cò nɛ̀ taa ti wokuugo káà nɛ̄, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 25 Nɛ́ míɛni a wàa 'ki wokuugo líɛ gè, wi 'yɛli bè wi burudo jíge dè. Wi bé kò núʔɔwɔ Yewe yiʔɛ mɛ́ gè fúɔ bè pa nɔ̀ cɛngɛnyɛnijiin lɛ̀lɛ nī lè.

26 «Bɛ̀ mìɛni ti bé puu yawiʔi ó yawiʔi gáà fèrile piyè wáligi bèleʔ nɛ́ gàa ki wè núru nɛ káa gèʔ. Kiī núʔɔgɔ yeli mɛ́ Yewe yiʔɛ mɛ́. 27 Nɛ́ míɛni yawiire ti mìɛni dáà ti tári tɔliyɔ sicɛri nɛ̄ yè, nɛ̀ ki yaʔa fèriye wè ti nɛ̄ʔ, tire yē núʔɔrɔ yeli mɛ́. A ki sí nyaa wàa 'cò nɛ̀ taa ti wokuugo káà nɛ̄, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 28 A wàa 'ki wokuugo káà líɛ nɛ̀ tugo, wi 'yɛli bè wi burudo jíge dè. Wi bé kò núʔɔwɔ Yewe yiʔɛ mɛ́ gè fúɔ bè pa nɔ̀ cɛngɛnyɛnijiin lɛ̀lɛ nī lè. Yawiire dáà tire yē núʔɔrɔ yeli mɛ́, Yewe yiʔɛ mɛ́ gè.

29 «Yawiiyiride dáà ti tári nɛ mári dàala nɛ̄ lè, ti n'dɛ dàa dī núʔɔrɔ yeli mɛ́ dè: kagbelige gè, tùu wè, nɛ́ kàdɔrigɔ nɛ́ ki feliye ní yè: 30 kàkɛmidarigɛ gè, pàan wè, kɔ̀ngɔbɔli wè, nàkungo gè nɛ́ gbèri ní wè. 31 Tire yawiiyiride dáà ti tári nɛ mári dàala nɛ̄ lè, tiī núʔɔrɔ yeli mɛ́ Yewe yiʔɛ mɛ́. A ki sí nyaa wàa 'cò nɛ̀ taa ti wokuugo káà nɛ̄, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 32 A ti wokuugo káà 'tuu yɛgɛ ó yɛgɛ nɛ̄, kire yɛgɛ ki bé kò núʔɔgɔ, a ki cɛni yē gunnɛgɛ yo, kire ga laa burugo yo, a ki cɛni yē yɛgɛ ó yɛgɛ gáà gī sɛ̀ngɛ wuʔu yo, á kire bɛ̀ʔ gàa gī gbànvaʔaga gè, yɛgɛ ó yɛgɛ gáà pe líi nɛ baara kúu dè, ki 'yɛli pe- ki le luʔɔ nī; ki bé kò núʔɔgɔ fúɔ bè pa nɔ̀ cɛngɛnyɛnijiin lɛ̀lɛ nī lè, bà ki bé koli bè kò cìilige. 33 A ki wokuugo káà 'tuu yalege nī gàa gī cuʔu wuʔu gè, ki laamɛ yɛrɛ ti mìɛni bé kò núʔɔrɔ. Yeli 'yɛli bè kàjɔli kpúɔn lè bè muʔɔrɔ. 34 A ki sí nyaa luʔɔ 'puu kire kàjɔli nī lè, a ki luʔɔ káà 'wo yaliire nɛ̄ dè, tire yaliire ti bé kò núʔɔrɔ. Nɛ́ míɛni yagbuʔɔ ó yagbuʔɔ gáà ki 'puu kire kàjɔli nī lè, ki bé kò núʔɔgɔ. 35 Yɛgɛ ó yɛgɛ gáà nɛ̄ ki wokuugo bé tuu, kire yɛgɛ ki bé kò núʔɔgɔ. A ki sí yē dìbige gè kire ga laa kákpɔnnɔ gèle, ki 'yɛli pe- ti cúʔɔ.

36 «A ki wokuugo káà 'tuu pìndiʔɛ nī gè kire ga laa fìtanʔa nī gè, luʔɔ ki bé puu cìilige. Ŋàa sí wi bé ki wokuugo kɔli gè bè yige wè, wi bé kò núʔɔwɔ. 37 A ki wokuugo káà 'tuu yaliire nī dàa pe bé tánʔa dè, yaliire ti bé kò cìilide. 38 Nɛ̀ ki yaʔa a pe sí ki luʔɔ wo gè yaliitanʔara nɛ̄ dè, a ki wokuugo káà 'tuu ti nī dè, yatanʔara ti bé kò núʔɔrɔ yeli mɛ́.

39 «A ki 'nyaa yawiire táà dī dàa yeli bé gbɛ̀ káa dè, a kàa 'kùu gè, siɛn ŋáà wi 'cò nɛ̀ taa ki wokuugo nɛ̄ gè, wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 40 Ŋàa wi 'ki wokuugo kaara táà káa dè, wi 'yɛli bè wi burudo jíge dè. Wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. Ŋàa wi 'ki wokuugo tugo gè, wi míɛni 'yɛli bè wi burudo jíge dè; wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.

41 «Yawiiyiride dáà ti mìɛni dè, dàa ti tári nɛ mári dàala nɛ̄ lè, tire yē yafunro yɛrɛ. Yeli sì yɛli bè ti káaʔ. 42 A kiī nɛ fulolo ki liyɛ nɛ̄ yè, a ki sí nɛ tári tɔliyɔ sicɛri nɛ̄ yo, kire ga laa ki tɔliyɔ yiī nìʔɛyɛ yo, a ki yē yawiire gboli nī lè dàa ti 'niʔɛ dè níɛ tári nɛ mári dàala nɛ̄ lè, yeli sì yɛli bè ti káaʔ. Tire yē yafunro yeli mɛ́. 43 Yeli sì yɛli bè kaala láà kpíʔile bè kò yanuʔɔrɔ nɛ́ ti níʔ. Yeli fǎga yìye kpíʔile kanabiɛnnɛ yɛrɛ Yewe yiʔɛ mɛ́ gè dàa kɛnmɛ nɛ̄ bèʔ.

44 «Nɛ́ ki cɛ́n mi yē Yewe, yeli Kulocɛliɛ wè. Yeli sí yɛli bè yìye wàli dɛ́ngɛ m'mɛ́ bè puu tiɛlɛ fùn, nɛ́ ki cɛ́n mi yē tiɛlɛ fùn. Kire nɛ̄ yeli sì yɛli bè yìye núʔɔʔ nɛ́ yawiiyiride dáà ní dèʔ, dàa ti yē nìʔɛrɛ níɛ tári nɛ mári dàala nɛ̄ lèʔ. 45 Mi yē Yewe, ŋàa wi 'yeli yige kùlo nī lè bè puu yeli Kulocɛliɛ. Kire nɛ̄ yeli 'yɛli bè puu tiɛlɛ fùn, nɛ́ ki cɛ́n mi yē tiɛlɛ fùn.

46 «Keli yē fànʔa kajuʔulo gàli kiyē nɛ nyu yajuuro nɛ́ sínjiɛnrɛ wori nɛ̄ dè, nɛ̀ fàri luʔɔ yɛrɛ ní dè, nɛ́ yafulolido dáà tiī nɛ tári nɛ mári dàala nɛ̄ lè. 47 Kiyē nɛ tɛnmɛnɛ kanʔa bè ki fílige tìɛ gàa gī núʔɔgɔ nɛ́ gàa gī cìilige Yewe yiʔɛ mɛ́ gè, yawiire wuʔu nɛ̄ gè dàa ti bé gbɛ̀ káa nɛ́ dàa tiǐ gbɛ̀ káa dèʔ.»