Nadabi nɛ́ Abiyu pe 'kùu pe kolimɔ kɛnmɛ nɛ̄ bè
10
1 Nadabi nɛ́ Abiyu, Arawɔn jaala bèle, a pe 'pe tingbopigele líɛ gèle nɛ́ kàsunnɛganʔana kálì kɔ̀n nɛ̀ le ke nī, nɛ́ wusuna wo baa. A pe sí pɛn Yewe yiʔɛ mɛ́ gè nɛ́ kàsun káà kiiyɛ ní gàa nɛ̄ Yewe wiì cé fɔ̀li gèʔ, gàa wuʔu wiì cé juu nɛ̀ gbɛ̀ngɛ pe mɛ́ gèʔ. 2 A kàsun káà sí yiri Yewe yiʔɛ mɛ́ gè nɛ̀ pe sórigo, a pe 'kùu Yewe yiʔɛ mɛ́ gè.3 A Misa 'ki juu Arawɔn mɛ́ nɛ́ jo:
«Dàa tire dī Yewe cé juu lɛ̀lɛ líì nī wi 'jo, ‹Bàli pe 'sìʔɛrɛ nɛ̀ kpɔni mi nɛ̄ wè, pe 'yɛli bè ki cɛ́n dí mi yē tiɛlɛ fùn, bà kpuʔɔrɔ bè taʔa mi nɛ̄ siɛnnɛ pe mìɛni nyaamɛ nɛ̄ bè.› »
A Arawɔn 'pìiri.
4 A Misa sí Misayɛli nɛ́ Elisafanyé yeri bèle, Uziyɛli jaala bèle; Uziyɛli wi 'puu Arawɔn tuu cɔni. A wi 'pe yɛ:
«Yeri báan, ye- yeli siinyɛninɛ yige bèle saawalidɛngɛgɛ nī gè, ye kɛ́ nɛ́ pe ní bùguro kàduʔu mɛ́ gè.»
5 A pe 'fali nɛ̀ pɛn nɛ̀ pɛ́nì kúbilo líɛ bèle nɛ̀ kɛ́ bùguro kàduʔu mɛ́ gè nɛ̀ yɛli nɛ́ gàa Misa 'juu gè; kúbilo pe burudɔniyɔ, yi 'puu nɛ tíin pe nɛ̄.
6 A Misa sí 'ki juu Arawɔn nɛ́ wi jaasɛnminɛ mɛ́ bèle, Eleyazari nɛ́ Itamari wè, nɛ́ pe yɛ̀:
«Ye fǎga yeli nzìire yaʔa dè nyaʔamidɛʔ, ye fǎga yeli buruyo cɛnminɛ yè kùu kayaʔa nɛ̄ gèʔ. Á kire bɛ̀ʔ yeli bé ní kùu yeri wè bè wáa yìye nɛ̄, nɛ́ Yewe funbiɛnrɛ ní dè Isirayɛli tògo ki mìɛni nɛ̄. Yeli siinyɛninɛ Isirayɛliyé bèle, peli yákuɔ pe béri nyɛni de cáaduu kɔnrɔ wáari dè kúbilo nɛ̄ bèle, bàli Yewe 'kpúu nɛ́ kàsun ní gèa. 7 A yeli 'fìʔɛ nɛ yiri Kpàlidiʔɛ Kpátaʔa wìile nī lè, yeli bé kùu wī, nɛ́ ki cɛ́n Yewe siɛnnyiɛnɛgɔn sùnmɔ piī yeli nɛ̄.»
A pe 'ki kpíʔile gàa Misa 'juu gè.
Kacuɔnrilɔ pe tánʔagɛnmɛ wori dè
8 A Yewe 'ki juu Arawɔn mɛ́ nɛ́ jo:
9 «A muɔ kɛ́nì je jíin Kpàlidiʔɛ Kpátaʔa nī gè, muɔ sì yɛli bè diviɛn gbuɔ bé nɛ́ cɛ ga jo sunmɔ páà piiyɛʔ, muɔ nɛ́ muɔ jaala ní bèle, á kire bɛ̀ʔ yeli bé kùu wī. Tire ti bé puu fànʔa kaala súuri yeli mɛ́ nɛ́ yeli siimɛ ní bè, 10 kire ga buu yeli bé gbɛ̀ ki cɛ́n gàa gī wàlidɛngɛgɛ Yewe mɛ́ wè nɛ́ gàa piyè wàli nɛ̀ tɛ́ngɛ gèʔ, nɛ́ gàa gī cìilige Yewe yiʔɛ mɛ́ gè nɛ́ gàa gī núʔɔgɔ wi yiʔɛ mɛ́ gè.
11 «Nɛ́ míɛni yeli bé gbɛ̀ Isirayɛliyé tɛnmɛ bèle fànʔa kele ke mìɛni nɛ̄, gàli Yewe 'juu pe mɛ́ Misa nyuɔ nī gè.»
12 A Misa sí 'ki juu Arawɔn mɛ́ wè, nɛ́ wi jaasɛnminɛ Eleyazari nɛ́ Itamari ní wè, nɛ́ pe yɛ:
«Yaliire yakɛnrɛ sɛnrɛ dáà ti 'kò dè, kakuɔrɔ yakɔnrɔ nī dè dàa kàsun ki 'sórigo Yewe mɛ́ wè, yeli bé ti líɛ bè ti káa sìnvari fùn, gbùʔɔrɔdiʔɛ yafanʔa táanni gè. Yakaa gī gàa gī cɛ̀njɛngɛ wàlidɛngɛgɛ gèb.
13 «Yeli bé ti káa tiɛwalidɛngɛgɛ káà nī, nɛ́ ki cɛ́n tire yē muɔ nɛ́ muɔ jaala liɛlɛ kakuɔrɔ yakɔnrɔ nī dè dàa kàsun ki sórigi dè. Fànʔa kaala nī nàa Yewe 'juu nɛ̀ gbɛ̀ngɛ m'mɛ́ wè.
14 «Nɛ̀ ki yaʔa dìribuu kaara dáà pe yɛ̀gí naamɛ Yewe yiʔɛ mɛ́ gè nɛ́ kpuʔɔrɔ ciile kaara ní dè, yeli bé ti káa tiɛciilige káà nī, muɔ wè nɛ́ muɔ jaala nɛ́ muɔ pórilo ní bèle, nɛ́ ki cɛ́n tire yē muɔ nɛ́ muɔ jaala liɛlɛ kakuɔrɔ wori, Isirayɛli siɛnnɛ pe yanyige yakɔnrɔ nī dèc. Fànʔa kaala nī.
15 «Kpuʔɔrɔ ciile kaara nɛ́ dìribuu kaara dáà pe yɛ̀gí naamɛ, pe bé pɛn nɛ́ ti ní nɛ̀ fàri sùnmɔ tiɛyɛ nɛ̄ yè nyàa kàsun ki sórigi yè, bè ti yɛ̀gɛ naamɛ Yewe yiʔɛ mɛ́ gè. Tire bé puu muɔ nɛ́ muɔ jaala liɛlɛ súuri, nɛ̀ yɛli nɛ́ fànʔa kaala ní lè nàa Yewe cé juu nɛ̀ gbɛ̀ngɛ lè.»
16 Kire kàduʔumɛ, a Misa 'kapiʔile kàsulugo síkapɔli sɔ́migɔ wè nɛ̀ caa nɛ̀ màʔa, wiì yafiɛn nyaaʔ; wi yé súʔu wī. Kire nɛ̄ a wi fungo ki 'yɛ̀ kpuʔɔ Arawɔn jaasɛnminɛ kúrugu bèle, Eleyazari nɛ́ Itamari wè. A wi 'pe yúgo nɛ́ jod:
17 «Gáa nɛ̄ yeli sì kapiʔile kàsulugo kaara káa dè tiɛwalidɛngɛgɛ káà nī gàa gī saawalidɛngɛgɛ táanni gèʔ ? Yakaa gī gàa gī cɛ̀njɛngɛ wàlidɛngɛgɛ gè. Yewe yé ti kɛn yeli mɛ́ kire ga buu yeli de Isirayɛli tògo siɛnnɛ kolimɔ tugoro turu dè, bè kàsulugosuɔ baara kúɔ dè pe mɛ́ Yewe yiʔɛ mɛ́ gèe. 18 Ye- ki wéli ! Kakuɔrɔ sìsiɛn kiì pɛn tiɛcɛ̀ngɛ wàlidɛngɛgɛ nī gèʔ ! Yeli yé yɛli bè kaara káa dè tiɛwalidɛngɛgɛ káà nī Kpàlidiʔɛ Kpátaʔa dàligɛ nɛ̄ nɛ̀ yɛli nɛ́ gàa ní mi 'juu nɛ̀ gbɛ̀ngɛ gè.»
19 A Arawɔn sí siɛnnugoro kɛn dè Misa mɛ́ wè nɛ́ jo: «ʔá ! Pàngɛ kire gī pe nyɛ́nì pɛn nɛ́ pe kapiʔile kàsulugo kakuɔrɔ ní dè, nɛ́ kakuɔrɔ kaasuʔuro ní dè; ma sí ki wéli gàa ki 'mi taa gè ! A mi yé kapiʔile kàsulugo kaara káa dè pàngɛ gè, kire cî Yewe dɛ́ni wè lé ?»
20 A Misa 'ti lúʔu, a wi 'yéri ti nɛ̄.