Kacuɔnrilɔ pe 'kakuɔrɔ baapelide kúɔ dè
9
1 Cɛnyɛ kataanriwuʔu nɛ̄ gèa, a Misa wi 'Arawɔn nɛ́ wi jaala yeri bèle, nɛ́ Isirayɛli liɛlɛ ní bèle. 2 A wi 'ki juu Arawɔn mɛ́ nɛ́ jo:«Ma nɛ̀piɛyɛlilɛ nigbe cò, kapiʔile kàsulugo kakuɔrɔ woli lè, nɛ́ sìnbapɔli nigbe ní, kakuɔrɔ kaasuʔuro wuu wè, pe mìɛni siin bèle kpɔlidiʔɛlɛ fùn, ma pɛn nɛ́ ti ní ma pa ti tɛ́ngɛ Yewe yiʔɛ mɛ́ gè.
3 «Ma sí ki juu Isirayɛli siɛnnɛ mɛ́ bèle peri báan nɛ́ síkapɔli ní, kapiʔile kàsulugo kakuɔrɔ wuu wè, nɛ́ nɛ̀piɛyɛlilɛ nɛ́ sìnbapile ní, ke mìɛni siin yiɛlɛ nigbe wuʔulo gálì gīɛlɛ kpɔlidiʔɛlɛ fùn gèle, ke- puu kakuɔrɔ kaasuʔuro. 4 Nɛ́ míɛni pe 'yɛli bè pɛn nɛ́ nɛ̀piɛlɛ nɛ́ sìnbapɔli ní, yanyige yakɔnrɔ wori dè, bè pa ti kɔni Yewe yiʔɛ mɛ́ gè. Pe bè yaliire yakɛnrɛ fàri dè ti nɛ̄, dàa ti 'nyaʔami nɛ́ sùnmɔ ní bè. Nɛ́ ki cɛ́n pàngɛ gè Yewe bé wìi tìɛ yeli nɛ̄.»
5 A pe 'pɛn nɛ́ yɛrɛ ti mìɛni ní dàa wori Misa 'juu nɛ̀ gbɛ̀ngɛ dè, Kpàlidiʔɛ Kpátaʔa yiʔɛ mɛ́ gè. A Isirayɛli tògo siɛnnɛ pe mìɛni 'sìʔɛrɛ nɛ̀ kpɔni baa nɛ̀ yéri Yewe yiʔɛ mɛ́ gè.
6 A Misa 'jo: «Ki n'gɛ gàa Yewe 'juu nɛ̀ gbɛ̀ngɛ gè nɛ́ jo ye- ki kpíʔile gè, kire ga buu Yewe cɛ̀nmɛ nɛ́ wi kpuɔmɔ pi- yiri yeli- pi nyaa.»
7 A Misa sí ń'nɛ̀ ki juu Arawɔn mɛ́ wè nɛ́ jo:
«Sìʔɛrɛ náʔa ma kpɔni gbùʔɔrɔdiʔɛ yafanʔa nɛ̄ gè. Ma pɛn nɛ́ muɔ kapiʔile kàsulugo kakuɔrɔ nɛ́ muɔ kakuɔrɔ kaasuʔuro ní dè, ma kàsulugosuɔ baara kúɔ dè, muɔ wori dè nɛ́ siɛnnɛ pe wori ní dè, nɛ̀ yɛli nɛ́ gàa ní Yewe 'juu nɛ̀ gbɛ̀ngɛ gèb.»
8 A Arawɔn wi 'sìʔɛrɛ nɛ̀ kpɔni gbùʔɔrɔdiʔɛ yafanʔa nɛ̄ gè nɛ̀ nɛ̀piɛyɛlilɛ kɔni lè, kapiʔile kàsulugo woli lè, wire tíimɛ kapiile wuʔu nɛ̄ gè. 9 A Arawɔn jaala pe 'pɛn wi mɛ́ nɛ́ sìsiɛn ní gè, a wi 'wi kabiɛlɛ nígi lè sìsiɛn nī gè, nɛ̀ kàa taʔa gbùʔɔrɔdiʔɛ ki nyɛgɛlɛ nɛ̄ gèle, nɛ́ sí sìsiɛn sɛngɛ ki mìɛni wo gbùʔɔrɔdiʔɛ yafanʔa nɛ̄ gè ki táanmɛ tiɛyɛ nī yè. 10 A wi 'kapiʔile kàsulugo kaara tiɛyɛ nyáà sórigo yè gbùʔɔrɔdiʔɛ nɛ̄ gè: sùnmɔ bè, nɛ́ seluʔulo siin ní gèle nɛ́ nyibɔli ní wè. Wi 'ki kpíʔile nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè. 11 Kaasɛnrɛ dè, nɛ́ nɛ̀piɛyɛlilɛ sɛ̀ngɛ ní gè, a wi sí ti sórigo péwu bùguro kàduʔu mɛ́ gè.
12 A Arawɔn wi 'kakuɔrɔ kaasuʔuro yajuʔu kɔni gè. A wi jaala pe 'pɛn nɛ́ sìsiɛn ní gè wi mɛ́, a wi 'ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle. 13 A pe 'kakuɔrɔ kaasuʔuro kaara kɛn dè wi mɛ́ yasɛyɛ yasɛyɛ, nɛ́ nyùgo ní gè, a wi 'ti sórigo gbùʔɔrɔdiʔɛ nɛ̄ gè. 14 A wi 'yajuʔu ki laafungbuʔɔ nɛ́ laara nɛ́ tɔliyɔ jíge yè, nɛ́ ti taʔala kakuɔrɔ kaasuʔuro naamɛ gè, nɛ̀ sí ti sórigo gbùʔɔrɔdiʔɛ yafanʔa nɛ̄ gè.
15 Kire kàduʔumɛ a wi 'pɛn nɛ́ kpuʔɔrɔ ní dè, siɛnnɛ wori dè. A wi 'síkapɔli cò wè, siɛnnɛ kapiʔile kàsulugo wuu wè, nɛ́ wi kɔni kàsulugosuɔ kakuɔrɔ wuu, kanumɔ nɛ̄ wi 'ki kpíʔile nɛ́ kakuɔrɔ pélide wori ní dè. 16 A wi 'pɛn nɛ́ yajuuyo siin ní yè, kakuɔrɔ kaasuʔuro woyo yè, nɛ̀ wi 'kakuɔrɔ baara kúɔ dè nɛ̀ yɛli nɛ́ ti tìɛgɛnmɛ ní bèc.
17 A wi sí pɛn nɛ́ yaliire yakɛnrɛ ní dè. A wi 'míimɛ kagbuunyiʔɛ nigbe kɔ̀n ti nī nɛ̀ ki sórigo gbùʔɔrɔdiʔɛ yafanʔa nɛ̄ gè, nɛ̀ fàri kakuɔrɔ kaasuʔuro nɛ̄ dè, sínbinimɛ táanni wori dè. 18 A wi sí nɛ̀piɛlɛ nɛ́ sìnbapɔli kɔni wè, siɛnnɛ yanyige yakɔnrɔ wori dè.
A Arawɔn jaala pe 'sìsiɛn kɛn gè wi mɛ́, a wi 'ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle. 19 A pe 'nɛ̀piɛlɛ nɛ́ sìnbapɔli sùnmɔ tiɛyɛ líɛ yè: nɛyɛ yè, nɛ́ sùnmɔ tiɛyɛ nyáà yi 'laafungboliyo nɛ́ laara màʔa dè, nɛ́ seluʔulo ní gèle, nɛ́ nyibɔlilɔ ní bèle. 20 A pe 'sùnmɔ tiɛyɛ taʔa yè dìribuulo nɛ̄ bèle, á Arawɔn 'sùnmɔ tiɛyɛ sórigo yè gbùʔɔrɔdiʔɛ yafanʔa nɛ̄ gè. 21 A wi sí dìribuulo nɛ́ kàliige ciile líɛ lè nɛ̀ ti yɛ̀gɛ naamɛ Yewe yiʔɛ mɛ́ gè, nɛ̀ yɛli nɛ́ gàa ní Misa cé juu nɛ̀ gbɛ̀ngɛ gè.
22 Bà Arawɔn 'kúɔ tire baara nɛ̄ dè, kapiʔile kàsulugo kakuɔrɔ dè, nɛ́ kakuɔrɔ kaasuʔuro dè, nɛ́ yanyige yakɔnrɔ dè, a wi 'wi kiyɛ yɛ̀gɛ yè siɛnnɛ kɔli mɛ́ gè nɛ́ diba kpíʔile wè pe mɛ́d. A wi 'tìgi gbùʔɔrɔdiʔɛ yafanʔa nɛ̄ gè.
23 A Misa nɛ́ Arawɔn pe 'jíin Kpàlidiʔɛ Kpátaʔa nī gè. Bà pe 'puu nɛ yigi wè, a pe ń'nɛ̀ diba kpíʔile wè siɛnnɛ mɛ́ bèle, a Yewe cɛ̀nmɛ nɛ́ wi kpuɔmɔ pi 'fali nɛ̀ tìgi siɛnnɛ pe mìɛni nyaamɛ nɛ̄. 24 A kàsun káà 'yiri Yewe yiʔɛ mɛ́ gè nɛ̀ ti mìɛni sórigo dàa ti 'puu gbùʔɔrɔdiʔɛ yafanʔa nɛ̄ gè, kakuɔrɔ kaasuʔuro dè nɛ́ sùnmɔ tiɛyɛ ní yè. A siɛnnɛ pe mìɛni pe 'ki nyaa, a pe 'fali nɛ̀ fundaanra kòkuʔulo wáa nɛ́ tuu nɛ̀ yiɛyɛ cúbulo yè dàala nɛ̄ lè Yewe yiʔɛ mɛ́ gè.