KACUƆNRILƆ TƐNGƐ BAARA KELE GELE
(8.1–10.20)
Misa wi 'Arawɔn nɛ́ wi jaala tɛ́ngɛ bèle pe baara nɛ̄ dè
8
1 A Yewe sí ki juu Misa mɛ́ nɛ́ joa: 2 «Ma Arawɔn nɛ́ wi jaala kɔ́ri bèle, ma pe burudo líɛ dè, nɛ́ siɛnnyiɛnɛgɔn sùnmɔ ní bè, nɛ́ kapiʔile kàsulugo kakuɔrɔ nɛ̀piɛyɛlilɛ ní lè, nɛ́ sìnbapɔlilɔ siin, nɛ́ sìnvarifun búrulo danʔa ní gè. 3 Ma Isirayɛliyé tògo siɛnnɛ gbuʔulo bèle Kpàlidiʔɛ Kpátaʔa wìile yiʔɛ mɛ́ gè.»4 A Misa 'ki kpíʔile gàa Yewe yé juu nɛ̀ gbɛ̀ngɛ gè, a tògo ki siɛnnɛ pe sɛ́nì gbuʔulo Kpàlidiʔɛ Kpátaʔa wìile yiʔɛ mɛ́ gè. 5 A Misa 'ki juu siɛnnɛ mɛ́ bèle nɛ́ jo: «Ki n'gɛ gàa Yewe 'juu nɛ̀ gbɛ̀ngɛ nɛ́ jo we- ki kpíʔile gè.»
6 A wi 'Arawɔn nɛ́ wi jaala sìʔɛrɛ bèle nɛ̀ kpɔni, nɛ́ tí a pe 'pìye gbéli nɛ́ luʔɔ ní gèb. 7 A wi 'burudɔnigɔ le gè Arawɔn nɛ̄ wè, nɛ́ wi puɔ nɛ́ burudɔnigɔ màʔana ní lè, nɛ́ burugbuɔyɛligɛ le gè wi nɛ̄. Nɛ́ efodi burubilec le lè wi nɛ̄, nɛ́ wi puɔ nɛ́ efodi màʔana ní lè, nàa kpìɛndiinnɛ pe 'sɔ́migɔ nɛ̀ kpíʔile lè. 8 A wi 'sìndinge kpɔ̀bid le wè wi nɛ̄, nɛ́ Urimi nɛ́ Tumimie líɛ wè nɛ̀ le baa kpɔ̀bi nī wè. 9 A wi 'ndɔ̀njɛngɛ tɔ́n gè wi nyùgo nɛ̄ gè, nɛ́ sí tiɛ yakpɔbigɔ puɔ gè nɛ̀ ki tárigɛ ndɔ̀njɛngɛ nɛ̄ gè gbɛlɛ yiʔɛ mɛ́ gè, gàa gī wàlidɛngɛlɛ fìɛ wèf, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.
10 A Misa wi 'siɛnnyiɛnɛgɔn sùnmɔ líɛ bè, nɛ̀ Kòridiʔɛ nyɛri nyɛri gè nɛ̀ tóri yɛrɛ ti mìɛni nɛ̄ dè dàa dī ki nī gè. A Kòridiʔɛ ki sí kò wàlidɛngɛgɛ Yewe mɛ́, nɛ́ ki yakpiʔilide ti mìɛni ní dèg. 11 A wi 'siɛnnyiɛnɛgɔn sùnmɔ páà líɛ nɛ̀ gbùʔɔrɔdiʔɛ yafanʔa nyɛri nyɛri gè tɔliyɔ kɔlisiin, nɛ́ ki yakpiʔilide ti mìɛni ní dè, nɛ́ tasaakpuʔɔ ní gè nɛ́ ki tɛ́ngɛdiʔɛ ní gè, nɛ̀ sí ti mìɛni wàli nɛ̀ tɛ́ngɛ. 12 A wi 'siɛnnyiɛnɛgɔn sùnmɔ páà wo Arawɔn nyùgo nɛ̄ gè, nɛ̀ sí wi wàli nɛ̀ tɛ́ngɛ.
13 A Misa wi 'Arawɔn jaala sìʔɛrɛ bèle nɛ̀ kpɔni, nɛ́ sí burudɔniyɔ le yè pe nɛ̄. A wi 'pe puɔ nɛ̀ cò nɛ́ burudɔniyɔ màʔagɛlɛ ní gèle, nɛ́ sí pe ndɔ̀ngɔlɔ tɔ́n gèle pe nɛ̄, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wèh.
14 A wi sí pɛn nɛ́ kapiʔile kàsulugo kakuɔrɔ nɛ̀piɛyɛlilɛ ní lè, a Arawɔn nɛ́ wi jaala pe sí kiyɛ taʔala yè ni nyùgo nɛ̄ gè. 15 A Misa 'ni kɔni nɛ́ ni sìsiɛn tuʔɔ gè nɛ́ sí wi kabiɛlɛ nígi lè ki nī nɛ̀ taʔa gbùʔɔrɔdiʔɛ yafanʔa ki nyɛgɛlɛ nɛ̄ gèle nɛ̀ ki cìile, nɛ́ sí sìsiɛn sɛngɛ wo gè gbùʔɔrɔdiʔɛ ki táanmɛ tiɛyɛ nī yè. Bɛ̀ ki 'kpíʔile a wi 'ki wàli nɛ̀ tɛ́ngɛ kire ga buu peri kàsulugosuɔ baara kúu dè ki nɛ̄.
16 A Misa wi 'sùnmɔ tiɛyɛ yi mìɛni celile yè nyàa yi 'laafungbuʔɔ nɛ́ laara tɔ́n dè, nɛ́ nyibɔli ní wè, nɛ́ seluʔulo siin ní gèle nɛ́ sùnmɔ ní bè bàa pi 'ke màʔa gèle. A wi 'ti mìɛni sórigo gbùʔɔrɔdiʔɛ nɛ̄ gè. 17 Nɛ̀ ki yaʔa nɛ̀piɛyɛlilɛ kaasɛnrɛ dè, nɛ́ ni sɛ̀ngɛ ní gè nɛ́ ni fire ní dè, a wi 'ti sórigo péwu bùguro kàduʔu mɛ́ gè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.
18 A wi sí pɛn nɛ́ kakuɔrɔ kaasuʔuro sìnbapɔli ní wè. A Arawɔn nɛ́ wi jaala pe sí kiyɛ taʔala yè sìnbapɔli wi nyùgo nɛ̄ gè. 19 A Misa wi 'wi kɔni nɛ́ wi sìsiɛn tuʔɔ gè nɛ̀ ki nyɛri nyɛri gbùʔɔrɔdiʔɛ yafanʔa lìʔɛgɛlɛ nɛ̄ gèle.
20 A Misa wi 'sìnbapɔli kaara celile dè yasɛyɛ yasɛyɛ, nɛ̀ ti sórigo nɛ́ nyùgo ní gè, nɛ́ sùnmɔ tiɛyɛ ní yè. 21 A wi sí sìnbapɔli wi laafungbuʔɔ nɛ́ wi laara nɛ́ wi tɔliyɔ jíge yè nɛ́ luʔɔ ní gè. A Misa 'tire pínɛ nɛ́ sìnbapɔli kaara ní dè nɛ̀ ti mìɛni sórigo gbùʔɔrɔdiʔɛ yafanʔa nɛ̄ gè, kakuɔrɔ kaasuʔuro dáà nùdaanna ni nyɛ́ni Yewe fungo nyígi gè. Tire 'puu kakuɔrɔ yakɔngɔ gáà kàsun ki sórigi, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.
22 A wi 'pɛn nɛ́ sìnbapɔli siinwuu ní wè, siɛntɛngɛ kakuɔrɔ sìnbapɔli wè, a Arawɔn nɛ́ wi jaala pe 'pe kiyɛ taʔala yè sìnbapɔli nyùgo nɛ̄ gè. 23 A Misa 'sìnbapɔli kɔni wè, nɛ́ wi sìsiɛn tuʔɔ gè nɛ̀ kàa taʔa Arawɔn kàliige kɔli ngbówɛgɛ nɛ̄ gè táanmɛ gè, nɛ ń'nɛ̀ nɛ́ kàa taʔa wi kàliige kɔli kabaligbuɔ nɛ̄ wè, nɛ́ wi kàliige tɔligɔ kabaligbuɔ nɛ̄ wè.
24 A wi sí Arawɔn jaala sìʔɛrɛ bèle nɛ̀ kpɔni wi nɛ̄, nɛ́ sìsiɛn káà taʔa pe kàliige kɔli ngbówɛyɛ nɛ̄ yè táanmɛ gè, nɛ́ kàa taʔa pe kàliige kiyɛ kabaligbuɔlɔ nɛ̄ bèle, nɛ́ pe kàliige tɔliyɔ kabaligbuɔlɔ nɛ̄ bèle.
A Misa 'sìsiɛn sɛngɛ nyɛri nyɛri gè gbùʔɔrɔdiʔɛ yafanʔa lìʔɛgɛlɛ nɛ̄ gèle. 25 A wi sí sìnbapɔli wi sùnmɔ tiɛyɛ líɛ yè: nɛgɛ gè, nɛ́ sùnmɔ tiɛyɛ nyáà yi 'sìnbapɔli laafungbuʔɔ nɛ́ wi laara màʔa dè, nɛ́ nyibɔli ní wè, nɛ́ seluʔulo siin ní gèle nɛ́ ke sùnmɔ ní bè, nɛ́ míɛni kàliige ciile ní lè.
26 A Misa sí sìnvarifun búrulo kɔ̀n bèle, búrulo bílì nī pe yé tɛ́ngɛ danʔa nī gè Yewe yiʔɛ mɛ́ gè: búru kpɔbiwɔ nigbe, nɛ́ búru nigbe ŋáà pe 'kpúɔn nɛ́ sùnmɔ ní bè, nɛ́ ŋɔ̀mi nigbe ní. A wi 'pe taʔa sùnmɔ tiɛyɛ nɛ̄ yè nɛ́ kàliige ciile nɛ̄ lè. 27 A wi 'ti mìɛni pínɛ nɛ̀ le Arawɔn kadaʔala nī gèle nɛ́ Arawɔn jaala kadaʔala nī gèle, a pe sí ti yɛ̀gɛ naamɛ Yewe yiʔɛ mɛ́ gè. 28 A Misa 'koli nɛ̀ ti suɔ pe mɛ́ nɛ̀ ti taʔa kakuɔrɔ kaasuʔuro naamɛ gè, nɛ́ sí ti sórigo gbùʔɔrɔdiʔɛ yafanʔa nɛ̄ gè. Siɛntɛngɛ kakuɔrɔ kele wori dī, dàa nùdaanna ni nyɛ́ni Yewe fungo nyígi gè, kakuɔrɔ yakɔnrɔ dáà kàsun ki sórigi Yewe mɛ́ wè.
29 A Misa 'sìnbapɔli wi dìribuu kaara líɛ dè, dàa dī siɛntɛngɛ kakuɔrɔ kele wori dè, nɛ̀ ti yɛ̀gɛ naamɛ Yewe yiʔɛ mɛ́ gè. Tire ti 'puu wi liɛlɛ lè, nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè.
30 A Misa sí siɛnnyiɛnɛgɔn sùnmɔ páà suɔ, nɛ́ sìsiɛn káà tuʔɔ gàa ki 'wo gbùʔɔrɔdiʔɛ nɛ̄ gè, nɛ̀ ki nyɛri nyɛri Arawɔn nɛ́ wi burudo nɛ̄ dè, nɛ́ wi jaala nɛ̄ bèle nɛ́ pe burudo ní dè. Bɛ̀ ki 'kpíʔile a wi 'pe wàli nɛ̀ tɛ́ngɛ Yewe mɛ́, Arawɔn nɛ́ wi jaala ní bèle, peli nɛ́ pe burudo ní dè.
31 A Misa 'juu Arawɔn nɛ́ wi jaala ní bèle, nɛ́ jo:
«Ye- kaara suʔɔ dè Kpàlidiʔɛ Kpátaʔa wìile yiʔɛ mɛ́ gè, ye ti káa baa nɛ́ búrulo ní bèle bàli pe 'puu siɛntɛngɛ kakuɔrɔ danʔa nī gè, nɛ̀ yɛli nɛ́ dàa ní mi 'juu nɛ̀ gbɛ̀ngɛ nɛ́ jo: ‹Arawɔn nɛ́ wi jaala ní bèle, peli pe bé ti kaai.› 32 A tàa 'kò dè, kaara nɛ́ búrulo wori dè, ye- ti sórigo.
33 «Cɛnyɛ kɔlisiin sunʔɔmɔ nī bè, yeli sǐ gbɛ̀ yiri Kpàlidiʔɛ Kpátaʔa wìile nī lèʔ, fúɔ bè taa yeli tɛ́ngɛ lɛ̀lɛ ni ba fori, nɛ́ ki cɛ́n cɛnyɛ kɔlisiin 'yɛli bè nyì yeli tɛ́ngɛlɛ kakuɔrɔ wori nɛ̄ dè. 34 Gàa 'ki kpíʔile pàngɛ gè, kire Yewe cé juu nɛ̀ gbɛ̀ngɛ nɛ́ jo we- ki kpíʔile bè yeli kàsulugosuɔ baara kúɔ dè. 35 Yeli bé kò Kpàlidiʔɛ Kpátaʔa wìile yiʔɛ mɛ́ gè pìlige nɛ́ cɛnvugo fúɔ cɛnyɛ kɔlisiin, bèri Yewe tunduro kúu dè. Bɛ̀ ki bé puu yeli sǐ kùuʔ. Tire ti yé juu nɛ̀ gbɛ̀ngɛ mi mɛ́.»
36 Dàa ti mìɛni Yewe cé juu nɛ̀ gbɛ̀ngɛ Misa nyuɔ nī gè, a Arawɔn nɛ́ wi jaala pe 'ti mìɛni kpíʔile.