Surana Suro Paulu au napakatu i to Sarani i wanua
Roma
Pepongkaa lolita
Hangkoia wanua Roma iami pohudaa poparenta kadatua Roma au mokamumu ngkaia tampo ntanina. Tunggaiana Paulu mouki sura ide bona mopaguru to Sarani i Roma kana i patoa paturo agama Sarani, lawi Paulu bara mani tepaka lao i Roma mopaguruhe tauna indo.
Patoa lolita i lalu sura ide peisa tahumba i Rom. 1:17 au manguli node, “Hangko i Ngkora Marasa, taisa noumba rarana Pue Ala mopamanotoke i peitaNa. Naimbake manoto anti pepoinalainta Iria.” I lalu sura ide, Paulu mopakanoto kamadosanta, maroa to Yahudi ba au bara to Yahudi. Anti kamadosanta, hintotoke nahuku Pue Ala (3:9-19). Agaiana i lalu kamaahiNa, Nahompomi dosanta melempo i kapatena Pue Yesu (3:24-25; 5:8). Mewali ane mepoinalaike i Yesu, Pue Ala mohoremake hangko i huku dosanta, hai Naimbake manoto i peitaNa (3:22,26; 4:24-25; 5:1).
I lalu sura ide, Paulu mepaturo kana i tunggaiana Pue Ala i to Yahudi, au rauli worihe to Isaraeli (9:1–11:32). Nauli Paulu, ide-ide kabosana to Yahudi barahe ina molambi katuwo maroa lawi barahe mau mepoinalai i Yesu (10:1-4). I lalu pesapuakanda, tebungkahimi rara i tauna bosa au barahe to Yahudi bona peisahe molambi katuwo maroa (11:11-15, 30-31). Tunggaiana Pue Ala bona, “ope-ope to Isaraeli ina tehorema hangko i huku dosanda” (11:26).
Kahopoana Paulu mopaguruhe to Roma kana i babehia au hintoto i to Sarani. Napaturohe bona mampokaahihe hangka ranganda (12:9-16; 13:8-14), mengkoruhe i topoparenta (13:1-7), hai mombeadaihe (14:1–15:13).
Ihi sura
1. Pepongkana lolita (1:1-15)
2. Patoa paturo: rara manusia mewali manoto i peitana Pue Ala (1:16-17)
3. Ope-ope tauna madosa hai hintoto molambi pehukuna Pue Ala (1:18–3:20)
4. Ikita mewali manoto i peitana Pue Ala anti kanahompotami Yesu Kerisitu hai anti pepoinalainta Iria (3:21–5:21)
5. Anti pohintuwuta hai Yesu, tekabahamoke hangko i kuasa dosa hai molambike katuwo au wou (6:1–8:39)
6. Paulu mampololita noumba rarana bona to Yahudi hai tauna au barahe to Yahudi peisa mewali taunana Pue Ala i lalu poparentaNa (9:1–11:36)
7. Paulu mepaguru kana i babehia au hintoto irikita au mepoinalai i Yesu (12:1–15:13)
8. Paulu motuntu pobagona mobambari Ngkora Marasa i tauna au barahe to Yahudi (15:14-33)
9. Kahopoa lolita (16:1-27)