Tabea hai paturo au kahopoana
16
1 Hai ide-ide, ina kupopaisaakau kahemana ide Febe au moanti surangku. Ia halalunta hampepepoinalai au motulungi to Sarani i boea Kengkrea. 2 Kuperapi bona nidoko nodo halalumi i lalu hangana Pue Yesu, lawi itimi au hintoto tababehi au meulake i Yesu. Ane ara apa-apa au naparaluu, niwei, lawi bosa tauna au natulungi, tepesua iko.3 Nipahaweana tabeangku i Priskila hai Akwila. Ihira iti, halalungku hampopobago au mampopolumao liliuhe bagona Kerisitu Yesu. 4 Hangkoia, ina raanti matemi motulungina. Kuuli ngkaia kamaroana irihira, hai bara iko pea, agaiana ope-ope to Sarani au barahe to Yahudi manguli wori ngkaia kamaroana irihira. 5 Nipahawea worina tabeangku i ope-ope halalunta hampepepoinalai au teruhuhe i sounda Priskila hai Akwila.
Tabeangku wori i Epenetus au kupokaahi. Iami au nguru-nguruna mepoinalai i Kerisitu i propinsi Asia. 6 Hai tabeangku wori i Maria, au mobago rumihimi irikamu. 7 Nipahawe wori tabeangku i Andronikus hai Yunia hangka to Yahudingku, au ratarunggu sambelangkai hai au rabilahe i olonda ope-ope surona Pue Yesu. Ihira mahaemohe mepoinalai i Pue Yesu, hangko damanina, iko mepoinalai.
8 Tabeangku wori i Ampliatus, au kupokaahi i lalu hangana Pue Yesu. 9 Tabeangku wori i Urbanus, halalunta hampopobago au mampopolumao bagona Kerisitu. Tabeangku wori i Stakis, au kupokaahi. 10 Tabeangku wori i Apeles, au narumpa ngkaia kapari, agaiana meula liliu i Kerisitu. Tabeangku irihira au i souna Aristobulus. 11 Tabeangku wori i Herodion, hangka to Yahudingku. Tabeangku wori i halalunta hampepepoinalai au ara i souna Narkisus.
12 Tabeangku wori i Tripena hai Triposa, au mobagohe i Pue Yesu, hai i Persis, au kupokaahi, au mobago mantimi wori i lalu bagona Pue. 13 Tabeangku wori i Rupus hai irinana, au kuimbami inangku. Rupus iti iami hadua to Sarani au rabila. 14 Nipahawea worina tabeangku i Asinkritus, Flegon, Hermes, Patrobas, Hermas hai ope-ope halalu au ara hihimbela hai ihira. 15 Tabeangku wori i Filologus hai Yulia, i Nereus hai halaluna towawine, hai i Olimpas hai ope-ope halalunta hampepepoinalai au arahe hihimbela hai ihira.
16 Mombetabe-tabekau hangko i lalumi mpuu ane mombelambikau hai hangka to Saranimi. Ope-ope jumaa inde mopakatuhe tabeanda irikamu, halalu.
17 Halalu hampepepoinalai, kupopaingaakau bona hangangaa maroa-roakau i tauna au mopaara pogaa-gaa hai au rapeinao mopakanawokau i paturonda au montani hai paturo au rapaturoamokau. Nikaraohihe tauna au nodo! 18 Lawi tauna au nodo babehianda, barahe mampopolumao bagona Kerisitu Amputa; moula peahe peundeana lalunda. Hai lolita peroasinda au momi, mopakanawohe tauna au bara manihe moisa apa-apa. 19 Agaiana ane ikamu, halalu, raisami ope-ope tauna pengkorumi i paturona Pue Ala. Matanana i kakuhadina babehiami iti. Agaiana kupeinao bona madotakau mobabehi apa au maroa, hai mokaraohikau babehia au kadake. 20 Pue Ala, pongka roa ngkatuwo, ina monangi hai moropui Datu Tokadake i lalu katuwomi.
Halalu-halalungku! Amputa Yesu Kerisitu, mowatikau hai mamporangai liliukau.
21 Timotiu, rangangku au hampopobago inde, mopakatu tabeana irikamu. Nodo wori Lukius, Yason hai Sosipater, hangka toYahudingkuhe.
22 Iko, Tertius, au mampoukia Paulu sura ide, mopahawe worina tabeangku i lalu hangana Pue Yesu i halalu hampepepoinalaingku i Roma.
23 Gayu wori mopakatu tabeana. Iko, Paulu, maidana i souna Gayu, hai to Sarani i wanua ide paka moguluhe inde. Erastus, topamboli doi wanua, hai halalunta Kwartus mopakatu worihe tabeanda. 24 [Amputa Yesu Kerisitu, mowatikau hai mamporangai liliukau. Amin.]
25 Toiami Pue Ala! Lawi Iami au makuasa mopakaroho pepoinalaimi anti Ngkora Marasa au kupahaweakau bona niisa kahemana Yesu Kerisitu. Iatunami parena, tunggaiana Pue Ala iti bara raisa tauna. 26 Agaiana ide-ide Pue Ala motudungiake tunggaiaNa i sura au rauki nabi-nabi hangkoia hai au rapahawe i ope-ope tauna moula parentana Pue Ala bona ope-ope tauna peisa mepoinalai hai mengkoru Iria. Iami Pue Ala au tuwo hawe i hae-haena, 27 hai au moisa hinangkana, hai au bara ara karoduana! Toiami i lalu hangana Yesu Kerisitu hawe i hae-haena. Amin!
Hangko iriko
PAULU