Tauna au malede hai tauna au maroho
15
1 Ikita au marohomi pepoinalainta i Pue Ala, hangangaa sabarake i kabata-batana lalunda ranganta au bara mani maroho pepoinalainda. Inee peake mohaoki kamatananta haduduanta. 2 Ikita ope-ope hangangaa mobabehi au mopamatana laluna ranganta hai au motulungi ranganta bona tapakaroho pepoinalainda. 3 Lawi Kerisitu bara wori mohaoki kamatanaNa haduduaNa. Anti peulaNa i Pue Ala, Ia molambi ngkaia kapari. I lalu Sura Malelaha hangkoia ara lolita au mampololita kana i watana Pue Yesu au manguli, “Ope-ope lolita au mopapakoi Pue Ala, mokanai worina.” 4 Ope-ope au teuki hangkoia i lalu Sura Malelaha, teuki bona mewali paturo irikita. Hangko i paturo au tahumba i lalu Sura Malelaha iti, tabuku mantaha i lalu kapari, hai tehuweki lalunta bona maroho peharunganta i Pue Ala.5 Taperapi Pue Ala mohuweki lalunta hai mopakarohoke bona mantahake i lalu kapari, bona mohintuwukau hadua hai hadua anti peulami i Kerisitu Yesu 6 alana hampepekirikau motoia Pue Ala, Umana Amputa Yesu Kerisitu.
Ngkora Marasa i to Yahudi hai au barahe to Yahudi
7 Mewali, halalu, ido hai kuuliangaakau: nidoko maroa halalumi hampepepoinalai, nodo Kerisitu modoko worike ope-ope. Lawi ane hintuwuke hai halalunta hampepepoinalai, Pue Ala rapomahile anti babehianta iti. 8 Nipailalu ide: Kerisitu mai i dunia motulungihe to Yahudi bona tepabukei dandina Pue Ala i toiorunda hangkoia, alana tongawa i ope-ope tauna katouna Ngkorana Pue Ala. 9 Kamaina Kerisitu i dunia ide, Ia mobungkahi rara bona tauna au barahe to Yahudi peisahe molambi katuwo maroa, hai motoiahe Pue Ala anti kamaroana laluNa irihira. I lalu Sura Malelaha ara lolita au teuki node:
“O Pue Ala, kupomahileKo i olonda tauna au barahe to Yahudi.
Monanina motoia hangaMu.”*
10 Ara wori au manguli node:
“Ikamu au bara to Yahudi, matanakau hihimbela hai to Yahudi.”*
11 Ara wori lolita au teuki node:
“Ikamu au barakau to Yahudi, nitoiami Pue.
Ee humalele tina, nipomahilemi Pue!”*
12 Ara wori lolita, au nauki nabi Yesaya hangkoia, au manguli node:
“Hangko i pemuleana Isaia,
ina hawe hadua tauna au moparentaihe tauna au bara to Yahudi.
Ia iti au mewali peharunganda.”*
13 Taperapi Pue Ala, peharunganta, moweikau katana hai roa ngkatuwo i lalu pepoinalaimi i Pue Yesu, bona kamaroho-rohoa peharungami Iria anti kuasana Inao Malelaha.
Paulu mopahawe tunggaiana mouki sura ide
14 Halalungku ope-ope! Kuisa mpuu kangkaiana babehiami au maroa. Niisami paturo hangko i Ngkorana Pue, hai niisa mombepakaroho mpolalu hadua hai hadua. 15 Agaiana nauri nodo, i lalu surangku ide, barana maea mopaturokau, mampololita bahangkia pakana paturo. Tunggaiaku bona mampopaingaakau ope-ope paturo ide, lawi itimi bago au naweina Pue Ala anti kabulana laluNa. 16 Naangkana mewali topobagona Kerisitu Yesu, hai Naposurona i tauna au barahe to Yahudi. Bagongku ide peisa rapandiri nodo pobagona tadulako mpenomba, lawi mopahawena Ngkora Marasa. Hai ihira au barahe to Yahudi au mepoinalai i Pue Yesu, kuimbahe nodo popenombaku i Pue Ala. Hai popenombaku iti, batena nadoko Pue Ala, lawi Inao Malelaha mopamalelahahe hai mampopewalihe kirana Pue Ala.
17 Anti pohintuwuku hai Kerisitu Yesu, matana lalungku mopatuntu bago au kupobago i Pue Ala. 18 Au kuuli ide, kupobago anti kuasana Kerisitu Yesu bona tauna au barahe to Yahudi mengkoru i Pue Ala. Mengkoruhe i Pue Ala anti pobagongku hai pepaturongku, 19 hai anti tanda-tanda kuasa au kubabehi hai kuasana Inao Malelaha. Hangko i wanua Yerusale hawe i tampo Ilirikum, kupahawemi Ngkora Marasa i ope-ope tauna, kupaturoahe kahemana Kerisitu. 20 Idemi peundeaku bona moanti liliuna Ngkora Marasa i tampo ntanina au bara manihe mohadi hangana Kerisitu. Bara kuunde moaro sou i wongko watu au naaro tohaduana. 21 Kupeinao mopabukei lolita i lalu Sura Malelaha au manguli:
“Tauna au bara manihe rabambaria kana Iria, ina moisa mpuuhe kahemaNa.
Tauna au bara manihe mohadi bambari kana Iria,
ina mohadi hai moisa mpuuhe lempona bambari iti.”*
Paulu moliwo lao i Roma
22 Halalu, anti kangkaiana bagongku ide, bosami belana tunggaiaku mosondakikau tesalempori. 23-24 Agaiana ide-ide, hopomi pobagongku i tampo ide, hai i parenami kupeinao lao mosondakikau, kuharunga i polumaongku lao i Spanyol, peisana mehupe irikamu, hai kahopoana ina matana-tanana hihimbela hai ikamu nauri sangka pea. Hai kuharunga wori ina nipopeangka maroana lao i Spanyol. 25 Agaiana ina laona hampai i Yerusale moanti doi petulungi i to Yahudi au hampepepoinalainta inditi. 26 Lawi taunana Pue Ala au barahe to Yahudi i propinsi Makedonia hai Akaya ide moruruhe doi bona rawei i halalunda hampepepoinalai au meahi-ahi tuwonda i Yerusale. 27 Iti rababehi mentumbu hangko i kamatanana lalunda. Hai hintoto mpuu ane tauna au barahe to Yahudi mokira-kiraahe to Yahudi anu-anu dunia, lawi hangko i to Yahudi iti, tauna au bara to Yahudi molambihe bakuna tanoananda. 28 Mewali, laomona hampai i Yerusale moanti doi petulungi au tegulumi. Roorai indo, hangko laorina i tampo Spanyol moliuna i boeami. 29 Hai kuisa, ane hawena irikamu, ngkaia pewati hangko i Kerisitu ina kuantiakau.
30 Halalu! Mohintuwumoke hai Amputa Yesu Kerisitu, hai mombepokaahimoke anti pokalena Inao Malelaha i lalunta. Ido hai kuperapi bona mekakaekau i Pue Ala, nipekakaea wongkoia i lalu pobagongku. 31 Mekakaekau i Pue Ala bona Nakampaina hangko i tauna au barahe mepoinalai i Pue ane laona deade i tampo Yudea. Mekakae worikau bona taunana Pue Ala au i Yerusale ina modoko maroahe doi petulungi au kuanti ide. 32 Kahopoana, ane napokana Pue Ala, ina hawena i boeami i lalu katana lalu, hai ina tepalindona i olomi. 33 Kuharunga Pue Ala au moweike roa ngkatuwo ina mamporangaikau ope-ope. Amin!