Surana Suro Paulu au nguru-nguruna i to Sarani i wanua
Korintu
Pepongkaa lolita
Korintu iami wanua au mahile i tampo Akaya. Hangkoia tauna au maida i Korintu kabosanda bara manihe moisa Pue Yesu. Nguru-nguruna Paulu au mobambari Ngkora Marasa i Korintu, hai ia maida inditi hampare hantanga (Suro 18:1-11). I kapaduna Paulu lao mobambari Ngkora Marasa i boea ntanina, hawemi hadua topobambari Ngkora marasa au mapande mololita, hangana Apolo (Suro 18:24–19:1). Apolo iti mopaliliu bagona Paulu mopaguru hai mokadipura to Sarani i Korintu (1Kor. 3:6).
Bara mahae hangko indo, to Sarani i Korintu mouki hambua sura au rapakatu i Paulu. I lalu suranda, ngkaia pampekunenda. Ido hai i lalu sura ide, Paulu mohanai pampekunenda iti (7:1, 25; 8:1; 12:1; 16:1, 12). Ara wori bambari au nahadi Paulu au manguli kadana maroa babehianda to Sarani i Korintu (1:10-11; 5:1; 11:18; 15:12). Ido hai Paulu mokambaroahe bona datihe mombembehehe hai mobabehi sala (kirana 1-6). I lalu sura ide, Paulu mopaturo worihe kana i ada posamboko (kirana 7), paande au rapopenomba i anitu (kirana 8-10), ada petolombu (11:2-16), ada maande roti hai maenu anggoro (11:17-34), kapande hangko i Inao Malelaha (kirana 12, 14), hai katuwonda hule tauna au mate (kirana 15). I kirana 13, Paulu mopakanotoake apa au paraluu ntepuu iami hangangaa mombepokaahike.
Ihi sura
1. Tabea: Paulu manguli ngkaia kamaroana i Pue Ala (1:1-9)
2. Paulu mokambaroahe to Korintu (1:10–6:20)
a. Barahe mohintuwu, hai arahe au mosapuaka kuasaNa (1:10–4:21)
b. Ara hadua tobalilo au mampotambia towawinena umana (5:1-13)
c. Arahe au mosalai halalunda hampepepoinalai i topoparenta (6:1-11)
d. Arahe au mobabehi sala (6:12-20)
3. Paulu mepaturo kana i ada posamboko (7:1-40)
4. Paulu mepaturo kana i paande au rapopenomba i anitu (8:1–11:1)
5. Paulu mepaturo kana i ada petolombu i paminggua (11:2-16)
6. Paulu mepaturo kana i ada maande roti hai maenu anggoro i pokatuinaonda kapatena Pue Yesu (11:17-34)
7. Paulu mepaturo kana i kapande au hangko i Inao Malelaha (12:1–14:40)
8. Paulu mepaturo kana i katuwonda hule to Sarani au mate (15:1-58)
9. Paulu mampololita kana i doi au ragulu bona rapakatuahe tauna au meahi-ahi tuwonda i wanua Yerusale (16:1-4)
10. Pamperapina Paulu au kahopoana hai tabea (16:5-24)