Paulu motuduhe to Korintu mohuku hadua tauna au mampotambia towawinena umana
5
1 Ara kuhadi au mololita kana i babehianda tauna i olomi au bara hintoto. Ara hadua rangami au mampotambia towawinena umana. Mogalori i olonda tauna au barahe moisa Pue Ala, barahe ara au mobabehi nodo. 2 Agaiana ikamu, nauri ara au mobabehi nodo i olomi, mampemahile manikau! Katouana, hangangaa masusari lalumi, hai tauna iti hangangaa nipopeloho hangko i olomi. 3-4 Nauri karaona hangko irikamu, agaiana lalungku arato hihimbela hai ikamu, mewali ara kuasangku mampohawaakau. Hai kuasa au naweina Pue Yesu Kerisitu, kupakanotomi: tauna au kadake babehiana iti hangangaa rahuku. Ane mogulu-gulukau, niimbana ara hihimbela hai ikamu, hai kuperapi i lalu kuasana Yesu Amputa 5 bona nihuhu peami tauna iti i kuasana Datu Tokadake. Lempona, nitudumi meloho hangko i olomi, hai ineemi nipogaloa. Mewali watana molambi pehuku agaiana tanoanana molambi katuwo maroa i kahawena Pue Yesu.6 I olomi arahe au kadake babehianda, agaiana mampemahile liliukau! Bara pae niisa lolita au manguli, “Ragi au haodi mampopembongke tapu”? Lempona, hadua tauna au madosa peisa mopakanawo bosa tauna i olomi. 7 Ane to Yahudi mobabehi ada Posusa Pasa, ope-ope ragi hangangaa raingihi i olonda hangko i sounda, hai hambaa ana dimba hangangaa rasambale mewali popenomba popohompo dosanda. Nodo ragi raingihi hangko i sounda, ikamu wori hangangaa moingihi tauna au madosa iti hangko i olomi bona malelaha tuwomi, lawi ikamu napamalelahamokau Pue Ala. Hai nodo hambaa dimba rasambale i Posusa Pasa, Kerisitu rapapate worimi bona mohompo dosanta. 8 Mewali, mamposusaimoke Posusa Pasa i lalunta. Hangangaa tatende ragi au hae, lempona babehianta hangkoia au kadake. Hai hangangaa maandeke roti au wou au bara raragii. Lempona hangangaa moulake peundeana Pue Ala hangko i kabulana lalunta.
9 I lalu surangku hangkoia, kuuliangaakau bona ineekau mampogaloa tauna au mobabehi sala i babehia towawine hai tobalilo. 10 Agaiana bara tunggaiaku bona ineemohe nipogaloa ope-ope tauna i dunia ide au barahe moisa Pue Ala, au mobabehi sala, au mehioro, au modongko, ba au menomba i anitu. Bara ihira au kutunggai. Lawi ane keihira au kutunggai, lempona hangangaa padukau hangko i dunia ide. 11 Tunggaiaku iami: ineekau mampogaloa tauna au mouli peamohe katoSaraninda agaiana mobabehi liliuhe sala, mehiorohe, menombahe i anitu, metunda-tundahe, malanguhe, hai modongkohe. Mogalorikau maande sambela hai tauna au nodo, inee! 12-13 Ane tauna au barahe to Sarani, bara ara kuasangku mohukuhe. Pue Ala pea au mohukuhe. Agaiana ikamu hangangaa mohukukau halalumi hampepepoinalai au mobabehi liliuhe sala. Lawi ara au teuki i lalu Sura Malelaha node, “Popeloho tauna au kadake babehiana hangko i olomi!” Lempona, ineehe nipogaloa tauna nodo.