Surana Suro Paulu au karombelana i to Sarani i wanua
Korintu
Pepongkaa lolita
Paulu au nguru-nguruna mobambari Ngkora Marasa i wanua Korintu (Suro 18:1-17). Tangana Paulu lao mobago i boea ntanina, arahe to Korintu au mosapuaka kuasana, rauli ia bara surona Pue Yesu. Mewali, Paulu motudu Titu lao mosondakihe. Titu mopahaweahe lolitana Paulu au mokambaroa tauna i olonda au mosapuaka kuasana. I pesulena Titu hangko i Korintu, ia mouliangaa Paulu: “Bosa tauna i olonda menosohe hangko i pesapuakanda. Agaiana ara manihe au matua lalunda au mosapuaka kuasamu.”
Kanahadina Paulu bambari iti, naukimi sura ide. I lalu sura ide, napololita pobagona mobambari Ngkora Marasa (2:14–6:10), hai napahaweahe kamahilena ahina irihira (6:11-13; 7:2-4, 13-16). Matana laluna lawi bosahe au menoso hangko i pesapuakanda (7:5-13). Roo indo, naperapi bona to Korintu moguluhe doi bona ane ia hawe deade, doi iti peisa naanti lao i wanua Yerusale hai naweihe to Sarani au meahi-ahi tuwonda (8:1–9:15). Hangko indo, Paulu mokambaroahe tauna au mosapuaka mani kuasana (10:1–13:10).
Ihi sura
1. Pepongkana lolita (1:1-11)
2. Paulu mopakanoto apa pongkana pane tebaliki tunggaiana mosondaki to Korintu (1:12–2:13)
3. Paulu mampololita pobagona mobambari Ngkora Marasa (2:14–6:13)
4. Paulu mopahawe bahangkia pakana paturo irihira (6:14–7:16)
5. Paulu merapi bona moguluhe doi au peisa rapakatu i to Sarani au meahi-ahi tuwonda i wanua Yerusale (8:1–9:15)
6. Paulu mouli notona hai mokambaroahe au mosapuaka mani kuasana (10:1–13:10)
7. Lolita kahopoana (13:11-13)