Pobagona Paulu
6
1 Mewali, ikami ide, hampopobagongkai mopahawe NgkoraNa Pue Ala i tauna. Ido hai kiperapi mpuu halalu bona inee nikakahakei kamaroana laluna Pue Ala au nidokomi. 2 I lalu Sura Malelaha Pue Ala mongkora node:“I tempo au Kupakanoto, Kupehadingimi pekakaemu,
I alo pehorema, Kutulungimoko.”*
Halalu, kuuliangaakau, ide-idemi tempo au napakanoto Pue Ala motulungikau. Temponami ina Nahoremakau hangko i huku dosami.
3 Mobagomongkai maroa-roa dati ara tauna au kipakanawo, bona bara ara tauna au mopapakoi bagongki mobambari Ngkorana Pue Ala. 4 I paka-pakana, kibabehi liliu apa au maroa bona tongawa kaikamina topobagona Pue Ala au manoto. Mantahangkai i lalu mampopengaa kasusa hai kapari. 5 Rapapahaingkai, ratarunggungkai, radulungkai, hai mobago mantimingkai. Bosa belana barapongkai leta, bosa wori belana bara ara paandeki. 6 I paka-pakana, kipakanoto kaikamina topobagona Pue Ala, lawi malelaha babehiangki, mopahawengkai Ngkorana Pue Ala i kanoto-notoana, sabarangkai, maroa lalungki i ope-ope tauna, nakuasaingkai Inao Malelaha, hai mampokaahingkai hangka rangangki hangko i kabulana lalungki. 7 Kipakanoto kaikamina topobagona Pue Ala, lawi mopahawengkai paturo au tou. Kipopolumao bagongki hangko i kuasa au kihumba hangko i Pue Ala. Kibabehi liliu apa au manoto. Babehiangki au manoto peisa rapandiri nodo piho hai laba, lawi ane manoto babehiangki, kibuku moewa iwalingki, hai kibuku mantaha. 8 Kehapiringkai rakakabosai ba ratoia, rasalai ba rabila, mampopolumao liliungkai bagona Pue Ala. Arahe au manguli modongkongkai, agaiana mampololitangkai apa au tou. 9 Barangkai rahaile hanggaa tauna agaiana hanggaa tauna mopakahile hangangki. Mapari katuwongki. Raawunga peamongkai rapapate, agaiana tuwoto maningkai! Rapapahaimongkai, agaiana bara mani woringkai rapapate. 10 Masusa lalungki, agaiana matana liliu woringkai. Tuwongki meahi-ahi, agaiana moantingkai pewati i tauna bosa. I peitana manusia, ngkaia kamakurangki, agaiana katouana hinangkana ara irikami.
11 Halalungku to Korintu! Lolitangki manoto, hai bara ara au kiwuniangi irikamu. Niita mpuumi kamaahina lalungki irikamu. 12 Kitudungiamokau lalungki agaiana ikamuri au bara kiita lalumi 13 I lolitangku ide, nodona mopaturo anangku haduduangku: nibungkahia wongkamia lalumi!
Paulu mampopaingaahe bona ineehe mampohintuwua tauna au bara mepoinalai i Pue
14 Ineekau mampohintuwua tauna au barahe mepoinalai i Pue Yesu. Ba niuli himbela pea tauna au moulahe peundeana Pue Ala hai tauna au mosapuakahe Pue Ala? Peisa pae au mabaa mohintuwu hai au makaindi? 15 Peisa pae Kerisitu mohintuwu hai Datu Tokadake? Peisa pae hadua tauna au mepoinalai mohintuwu hai hadua tauna au bara mepoinalai? 16 Peisa pae Souna Pue Ala rapopogulu hai sou penombaa i anitu? Ikita ide rapandiri nodo souna Pue Ala, lawi Pue Ala au tuwo maida i lalunta. Nodo au teuki i Ngkorana Pue:
“Ina maidaNa i olonda
hai ina Kuporangaihe.
Ina mewaliNa Pue Ala au rapenombai,
hai ihira ina mewalihe taunaNgku.”*
17 “Mewali, hangangaa nikabaha peulami i babehianda tauna au baraNa raisa.
Ineehe nipohintuwua!
Nipakarao watami hangko i ope-ope babehia au kadake.”*
18 “Iko nipouma, hai ikamu, Kupoana.”
Nodomi pangulina Pue Ala Au Makuasa.*