Watanta au wou
5
1 Lawi taisa, ane bambaruta i dunia ide ragero,a Pue Ala ina mopasilolonga haogu sou i suruga au tapaidai,b hambua paidaa au bara mokahopoa, au bara nababehi tauna. 2 Tanganta mani tuwo i dunia ide, mantodihake lawi mampeinaoke molambi paidaa au wou i suruga. 3 Paidaa iti iami wata au wou. Tapeinao mopahuru watanta ide hai wata au wou iti datike nodo tanoana au bara mowata. 4 Lawi tanganta mani tuwo i dunia ide, mantodihake lawi mantimi haleanta. Agaiana bara taunde mopalehi watanta ide. Bara taunde mate, agaiana taunde bona watanta ide liliu rapahuru hai wata au bara mokahopoa. 5 Pue Ala haduduaNa au mopasilolongaake hinangkana iti, hai Ia moweike Inao Malelaha mewali tanda kaina Naweinta wata au wou i suruga.6 Ido hai maroho lalunta hai taisa, tanganta mani tuwo i dunia ide, karao manike hangko i paidaanta hihimbela hai Pue Yesu hangalo. 7 Meulake i Pue anti pepoinalainta, kehapiri bara mani taita. 8 Ido hai maroho liliu lalunta. Kehapirike mate, taporasi lawi ane mogaake hai watanta ide, tanoananta ina hihimbela hai Pue. 9 Mewali tapeinao mobabehi apa au maroa, au mopakatana laluna Pue, i tempota mani tuwo i dunia ide ba i tempona hihimbelamoke hai Pue. 10 Lawi hambela tempo, ikita ope-ope hangangaa molindo Kerisitu bona Naparesa babehianta, hai ikita ope-ope ina molambi hurungina hintoto hai apa au tababehi tanganta mani tuwo i dunia ide.
Mepoinalai i Kerisitu mopaara kahintuwu hai Pue Ala
11 Mewali, langangkai mobabehi apa pea au bara naunde Pue, lawi kiisa Ia ina moparesa babehianda ope-ope tauna. Ido hai kipari-pari moanti tauna mepoinalai i Pue Yesu. Pue Ala moisa lalungki. Peundeaki halalu bona barapi ara au bata-bata lalumi irikami. Kipeinao bona ope-opekau moisa kabulana lalungki. 12 Inee nipehangu kipeinao motoia watangki haduduangki. Kipopaisaakau babehiangki au maroa au peisa nipomahile bona ara rarami mohanaihe tauna au moewangkai. Lawi tauna iti mampomahilehe kamapandenda hai lantinda i dunia ide, agaiana kadake lalunda. 13 Barato moapa ane rauliangangkai magila anti pobagongki i Pue Ala, lawi kiunde mpuu mobago i Pue Ala hangko lalungki. Agaiana ane manoto pekiringki, iti mewali lawi kiunde mpuu motulungikau. 14 Anti kamaahina Kerisitu irikami, ido hai kipari-pari mampopolumao bagongki mopahawe Ngkora Marasa. Lawi kiisa, Kerisitu mate mohuru dosa ope-ope tauna, iti lempona mate hahamoke. 15 Lawi tunggaiana Kerisitu mate mohuru dosa ope-ope tauna bona ikita au tuwo manike i dunia ide barapoke moula peundeata haduduanta, agaiana moulamoke peundeana Kerisitu, au matemi mohuru dosanta hai au rapatuwo hulemi.
16 Mewali, ido hai barapongkai mampeita tauna moula apa au raita i raoa. Hangkoia kiuli, Kerisitu manusia biasa pea, agaiana ide-ide barapi nodo pekiringki. 17 Mewali, hema au mohintuwu hai Kerisitu, ia mewalimi manusia au wou. Katuwona au hangkoia liumi; ia molambimi katuwo au wou. 18 Hinangka iti napopolumao Pue Ala, melempo i Kerisitu, bona Napopohintuwu huleke hai wataNa haduduaNa, hai Ia moweingkai bago mopahawe bambari iti i tauna ntanina bona peisa worihe mohintuwu hai Pue Ala. 19 Idemi bambari au kipahawe: melempo i Kerisitu, Pue Ala mopahintuwu tauna hai wataNa haduduaNa, hai barapi Napailalu salanda. Ikami ide, Naweingkai bago moanti bambari iti i tauna ntanina bona peisa worihe mohintuwu hai Pue Ala.
20 Ikami ide sarungkoronangkai Kerisitu. Napokamba humengkai Pue Ala mopahawe lolitaNa irikamu. Moula peundeana Kerisitu, kiperapi mpuu irikamu bona mohintuwukau hai Pue Ala. 21 Kerisitu, bara madosa, agaiana napahimbela Pue Ala tauna madosa hai Napahaleangi dosanta. Tunggaiana Pue Ala bona ikita au mohintuwu hai Kerisitu raimbamoke manoto i peitaNa.