Doi petulungi i to Sarani au meahi-ahi tuwonda i Yerusale
16
1 Kaliliuana halalu, ina mololitana kana i doi au nigulu bona nipopotulungihe halalunta hampepepoinalai au meahi-ahi tuwonda i wanua Yerusale.a Kuperapi bona nibabehi iti moula apa au kuhawaamohe to Sarani au ara i tampo Galatia. 2 Inee nipegia kahawengku, agaiana minggu-mingguna i alo kaisa, nipatanimi doi iti i soumi moula polambiami hadua-hadua, hai niwoli doi iti maroa-roa duungku hawe. 3 Ane hawena deade, nipileihe bahangkia rangami au nipoinalai bona kuweihe sura hai kutuduhe lao i Yerusale moanti doi petulungimi. 4 Hai ane paraluu, laoto worina hihimbela hai ihira.Paulu moliwo lao i Korintu
5 Arato tunggaiaku mosondakikau ane roomona mosondakihe to Makedonia, lawi kupeinao hampai lao irihira. 6 Peundeaku bona mahaena haodi hihimbela hai ikamu. Maroa ane maidana irikamu duuna liu tempo makuli, hai roo indo peisana nipopeangka mopaliliu polumaongku lao i tampo ntanina. 7 Bara kuunde ane lao sangka peakau kusondaki. Ane napokana Pue, kupeinao bona mahaena haodi hihimbela hai ikamu. 8 Agaiana ide-ide, hangangaa maidana hampai inde i Epesu duuna hawe Alo Mahile Pendauluna Inao Malelaha,b 9 lawi kehapirihe bosa tauna au moewana, mobundu mani mpuu pobagongku inde.
Timotiu hai Apolo
10 Ane hawe Timotiu, kuharunga nidoko maroa hai niadai, lawi ia mampopolumao bagona Pue, nodo iko. 11 Mewali, inee ara au bara mohaile. Nipopelingka maroa i pesulena mai iriko, lawi kupegia inde hihimbelahe hai halalunta hampepepoinalai.
12 Kaliliuana, ane halalunta Apolo, bosami belana kuuliangaa, “Arahe halalunta au ina melingka lao i Korintu. Agina lao woriko hihimbela hai ihira.” Agaiana ide-ide bara mani naunde lao. Ararai katepakana, hangko laorikau nasondaki.
Kahopoana sura
13 Mainga-ingakau. Nipakaroho pepoinalaimi! Nipakaroho lalumi! Mantahakau i pepoinalaimi! 14 Apa pea au nibabehi, nibabehi hangko i lalumi au buke ahi.
15 Halalu, niisami Setepanu hantambi au nguru-nguruna mewali to Sarani i propinsi Akaya. Ihira mohuhu katuwonda i Pue bona motulungihe halalunda hampepepoinalai. Mewali, kuperapi halalu 16 bona niula paturonda hai paturonda ope-ope ranganda au mampopolumao liliu bagona Pue.
17 Matana lalungku lawi hawemohe Setepanu, Fortunatus hai Akaikus. Barakau tepaka motulungina, agaiana ihira kuimbamohe pahurumi. 18 Halalunta iti mopamatanahe lalungku, nodo karapamatanana lalumi. Ido hai kuperapi bona nibilahe tauna au nodo ihira.
19 Ope-ope jumaa au ara i propinsi Asia mopakatuhe tabeanda irikamu. Akwila hai Priskila hihimbela hai ope-ope to Sarani au maminggu i sounda mopakatuhe tabeanda i lalu hangana Pue. 20 Ngkaia tabea hangko i ope-ope halalumi inde. Ane mohidupakau i paminggu, mombetabe-tabe mpuukau hangko i lalumi.
21 Kahopoa sura ide kuuki sadudua, ngkaia tabea hangko iriko Paulu.
22 Tauna au bara mampokaahi Pue Yesu, hararamohe i Pue Ala.
Maranata! MaimoKo, Pue!
23 Pue Yesu mowatikau!
24 Kupokaahikau ope-ope i lalu hangana Kerisitu Yesu.
Hangko iriko
PAULU