2
1 Mewali, nauli lalungku: ineekau hampai lao kusondaki, lawi bara kuunde mopakapari mbuli lalumi, nodo au mewali i tempomi kusondaki hangkoia. 2 Lawi ane kupakasusa lalumi, hema mani pae au ina mopalindona? 3 Ido pongkana pane kupakatumi hambua sura irikamu hangkoia bona ane hawena deade, barapi nipakasusa lalungku. Lawi katouana, ikamuri au hangangaa mopakatana lalungku. Hai kuisa, ane matanana, ikamu wori ina matana. 4 I tempona kuuki sura iti hangkoia, mapari pehadingku hai karao inaongku; tudomi owai matangku. Sura iti bara kuuki bona mopakasusa lalumi, agaiana sura iti kuuki bona niisa noumba kamahilena ahingku irikamu.Paulu merapi bona to Korintu moampungi ranganda au masala
5 Hangkoia ara hadua tauna i olomi au masala. Anti babehiana, mapari lalungku, hai ane Ia mopakasusa lalungku, apa mani lalumi. Agaiana bona inee gaga makasara lolitangku iria, kuuli pea ia mopakasusa lalunda bahangkia tauna i olomi. 6 Pehuku tauna bosa iria, handami. Mewali, kuuliangaakau, handami pehukumi iria. 7 Ide-ide hangangaa niampungi. Nipalindo laluna dati gaga masusa pekirina duuna barapi ara peharungana. 8 Ido hai kuperapi bona nitudungia kamaahimi iria. 9 I lalu surangku hangkoia, kutudukau nihuku. Tunggaiaku mouki sura iti bona kupetandakakau ba nipeulai mpuu ope-ope hawangku. Hai nipeulai mpuumi hawangku iti, 10 agaiana ide-ide kuuliangaakau, ineemi woia nihuku liliu. Ane niampungimi, hangangaa kuampungi worimi. Ane arato mpuu salana iriko, kuampungimi. Kerisitu moisa lalungku! Lawi peundeaku bona mohintuwukau hadua hai hadua. 11 Ido hai kuuli agina taampungi woia bona dati ara katepakana Datu Tokadake mokeloke. Lawi taisa, Datu Tokadake iti mapande moakalangi tauna bona manawohe i dosa.
Paulu wiora laluna i Troas
12 Kaliliuana halalu, hangkoia i kapadungku hangko i wanua Epesu, laona mobambari Ngkora Marasa kana i Kerisitu i wanua Troas. Kahawengku i Troas, Pue mobungkahiana rara bona mobagona inditi. 13 Agaiana nauri nodo, bara tinda lalungku, lawi bara manina mampohidupaa Titu au moanti bambari kana irikamu halalu. Ido hai mepalakanamona i halalungku inditi bona maina inde mohaoki Titu i Makedonia.
Paulu mampololita pobagona mobambari Ngkora Marasa
14 Agaiana kuuli ngkaia kamaroana i Pue Ala, lawi anti pohintuwuta hai Kerisitu, menangike, hai Ia mewali tadulakonta au monini liliuke. Iumba pea kalaoangki, mopahawengkai Ngkora Marasa i ope-ope tauna bona peisahe moisa Pue Ala. Ngkora Marasa iti peisa rapandiri nodo lana mawongi. 15-16 I peitana Pue Ala, ikami nodo dupa au rahuwe, au mawongi raenga ope-ope tauna. I tauna au mampoinalai Ngkora Marasa, ikami nodo dupa au mawongi, lawi kipahaweahe bambari au moantihe i katuwo maroa au bara mokahopoa. Agaiana i tauna au mosapuaka Ngkora Marasa, ikami nodongkai enga tomate au bangka, lawi kipahaweahe kaina nahukunda Pue Ala i lalu naraka.
Hema au peisa mampopolumao bago ide? Hangko i rohona haduduana, bara ara. 17 Agaiana ikami, barangkai nodo tauna au mohaoki peahe doi hangko i popahawenda Ngkorana Pue. Mopahawengkai Ngkorana Pue hangko i kabulana lalungki anti pohintuwuki hai Kerisitu moula tunggaiana Pue Ala au motudungkai mampopolumao bagoNa. Iami au mampetirongkai.