2 Korintu 3

To Korintu rapandiri nodo hambua sura au nauki Kerisitu

1 Agaiana ineeri nipehangu mampopetoia mbulimongkai! Barangkai nodo bahangkia guru agama au hawe irikamu. Kahawenda i boeami, ihira mampetudungiahe sura petoia hangko i ranganda bona nidokohe. Hai ane paduhe hangko i boeami, merapi worimohe sura petoia hangko irikamu. Ikami bara paraluu sura au nodo. 2 Ikamumi sura mpetoia au kianti hai au teuki i lalungki. Anti katebalikina lalumi, ope-ope tauna au moita katuwomi moisa kamaroana pobagongki mobambari Ngkora Marasa irikamu. 3 Nipetudungia i ope-ope tauna wua pobagongki moanti bambari kana i Kerisitu irikamu. Ikamu nodo hambua sura au nauki Kerisitu. Sura iti bara Nauki hai tinta ba i watu poukia. Lawi Kerisitu mouki lolitaNa i lalumi anti kuasana Inaona Pue Ala, au tuwo.

4 Mololitangkai nodo, lawi meharungangkai i Pue Ala anti pohintuwuki hai Kerisitu, au mopileimongkai mewali topobagoNa. 5 Bara kiuli kibuku mpuu mampopolumao bagona Pue. Bara kibuku hangko i kapandeki haduduangki; Pue Alami au moweingkai kapande. 6 Ia moweingkai kapande mewali topobagoNa au mopaguru tauna i dandiNa au wou. Barahe kipaguru bona mampeulaihe atura-atura au teuki bona mewalihe manoto i peitana Pue Ala. Agaiana kipaguruhe bona molambihe katuwo au wou hangko i Inao Malelaha. Lawi ane mampeinaoke mewali manoto i peitana Pue Ala i kamampeulainta atura au teuki, ina molambike kapate, lawi bara buke katapeulaina. Agaiana ane meulake i Pue Ala anti kuasana Inao Malelaha, molambike katuwo maroa au bara mokahopoa.

7 Hangkoia Pue Ala mouki AturaNa i watu poukia au Nawei i nabi Musa. I tempo iti peawana Pue Ala tongawa i lindona Musa au mewangka, ido hai bara rabuku to Isaraeli mototoki lindona Musa. Aturana Pue Ala au teuki i watu iti moanti kapate i manusia, lawi bara tabuku moula atura iti. Agaiana nauri nodo, mahile peawana Pue Ala au raita to Yahudi i lindona Musa. Mewali, ane peawana Pue Ala au mahile tongawa i atura au moanti kapate iti, 8 apa mani pobagona Inao Malelaha. 9 Ane peawana Pue Ala au mahile raita i kaNaweinta atura au moanti kapate, apa mani i kaNaweinta dandi au wou, au moanti tauna mewali manoto i peitana Pue Ala. 10 Mahile mpuu peawana aturana Pue Ala au hae, agaiana ane tapahintoto hai peawana dandiNa au wou, atura au hae iti barapi meawa. 11 Lawi ane dandiNa au hampalai pea iti, mahile peawana, apa mani dandiNa au wou au bara mokahopoa.

12 Mewali, anti peharungangki i dandina Pue Ala au wou, ido hai barangkai langa mopahawe Ngkora Marasa i kanoto-notoana. 13 Bara ara au kiwuniangi. Barangkai nodo nabi Musa hangkoia, au motolombungi lindona bona pewangkana lindona au hampalai pea bara raita to Isaraeli. 14 Agaiana pekirinda tetuko mani, lawi hawe ide-ide natabungi manihe tolombu iti. Ane mobasahe atura au hae, tetuko mani pekirinda. Ane mepoinalaimohe i Kerisitu, hangko tebungkahiri pekirinda. 15 Haweto mani ide-ide, bela-belanda mobasa surana nabi Musa, ara mani au motabungi lalunda hai pekirinda. 16 Agaiana ane mepoinalaimohe i Pue Yesu, tolombu iti ina rawungkehi hangko irihira. 17 Lawi Pue iami Inao Malelaha. Hai ane Inaona Pue maida i lalunta, ina tekabahake hangko i hinangka kuasa au mogaakike hangko i Pue. 18 Mewali, ikita ope-ope au mepoinalai i Pue, barapi ara tolombu au mobalungkuhi lalunta. Taisami kuasana Pue, hai kuasaNa iti mobaliki liliu lalunta. Kamahae-haea, katetetambaia kuasana Pue i katuwonta duunta mewali nodo Ia. Inaona Pue haduduaNa au mampopolumao bago iti i lalunta.