Paulu mohuweki lalunda to Korintu bona moguluhe doi nodo au rababehi to Makedonia
8
1 Kaliliuana halalu, kupeinao kuuliangaakau apa au mewali inde i tampo Makedonia. Mahile ahina Pue i jumaa au ara i Makedonia. 2 Molambihe pekelo hai kapari au mantimi mpuu. Agaiana i lalu kaparinda iti, matanahe. Hai nauri meahi-ahi mpuu tuwonda, mahile ahinda mogulu doi rapopotulungi ranganda. 3 Kuita noumba kamaroana lalunda mokira doi petulungi. Mokirahe doi iti i sukana pesauruanda, hai melumbu wori hangko i pesauruanda. Barahe ara au mopari-pari, 4 agaiana raperapi mpuu irikami bona peisahe motulungi to Sarani i wanua Yerusale.a 5 Kabulana lalunda meliu hangko i apa au kiharunga. Bara pea doi au rakira. Mengkoru i Pue Ala, hai mengkoru worihe irikami moula peundeana Pue Ala. 6 Ido hai motudungkai Titu lao irikamu lawi iami au mampepongka bago ide, bona modureikau mogulu doi petulungimi i halalumi to Sarani au meahi-ahi tuwonda. Mewali ide-ide kitudu mbuli lao irikamu bona mopaliliu bago iti i olomi.7 Halalu, i paka-pakana ikamu tepaiwongkomokau: tepaiwongkokau i pepoinalaimi, i paturo au tou, i kapandemi mepaturo, i kaniisana metulungi, hai i kamahilena kamaahimi irikami. Idomi halalu hai kuperapi hangangaa tepaiwongko worikau i lalu pobagomi motulungi rangami au meahi-ahi tuwonda.
8 Au kuuliangaakau ide bara nodo parenta. Tunggaiaku bona kupopaisaakau noumba kamahilena ahinda to Makedonia mokira doi petulunginda i ranganda. Hai hangko inditi, peisa kuita noumba kamahilena ahimi. 9 Barakau kuparentai halalu, lawi niisa mpuu kamahilena ahina Amputa Yesu Kerisitu irikita. Ia pebuku, agaiana anti kamahilena ahiNa irikita, Ia mewali nodo hadua tauna au meahi-ahi tuwona bona anti katuwoNa au meahi-ahi, ikita peisa mewali pebuku. Ia mopaiwoi tuwoNa mewali manusia bona ikita peisa molambi katuwo maroa. 10 Mewali, idemi lolitangku irikamu halalu: agina nipahopo bagomi au nipepongka pare liu, lawi ikamumi au nguru-nguruna motunggai mogulu doi au peisa rapakatu i rangami au ara i lalu kamakuranda. 11 Mewali tunggaiami au nipeinao nibabehi hangkoia, hangangaa nipaliliu duuna hopo. Agaiana hangangaa mokirakau i sukana pesauruami hadua-hadua. 12 Lawi ane mampeinaoke motulungi ranganta hai mokirake popenombata moula apa au ara irikita, popenombata iti nadoko Pue Ala. Bara Naperapi irikita apa au meliu hangko i pesauruanta.
13 Bara tunggaiaku motimbingi tuwomi hai mampoporasi tauna ntanina. Tunggaiaku bona himbela katuwonta; bara ara kamakuranta. 14 Ide-ide, anti kahandakana polambiami, hangangaa mopahandaikau kamakuranda halalunta hampepepoinalai i Yerusale. Hai ane rapana ara kamakurami deade, ihira hangangaa mopahandai worihe apa kamakurami. Ane iti au nibabehi, ina mombekadipurakau hadua hai hadua alana bara ara kamakurami. 15 Lawi ara teuki i lalu Sura Malelaha au manguli:
“Tauna au mogulu ngkaia,
bara ara pelabiana.
Hai tauna au mogulu haodi pea,
bara wori ara kamakurana.”*
Paulu motudu Titu hai rodua rangana lao i Korintu mourusi pogulu doi
16 Kuuli ngkaia kamaroana i Pue Ala, lawi Ia au mampopokale laluna Titu pane madota motulungikau. Tunggaiana Titu iti, himbela wori hai tunggaiaki. 17 Titu bara pea naunde mopabukei pamperapiki, agaiana hangko i laluna mpuu napeinao lao motulungikau. 18 Kitudu wori hadua halalunta lao irikamu hihimbela hai Titu. Ia ratoia i ope-ope jumaa anti pobagona mobambari Ngkora Marasa. 19 Ia rapilei worimi ope-ope jumaa inde bona mamporangaingkai i polumaongki ane laongkai moanti doi petulungimi i halalunta hampepepoinalai au ara i lalu kamakuranda. Lawi tunggaiana polumaongki ide bona hangana Pue rapomahile, hai bona tongawa kamahilena ahinta i halalunta hampepepoinalai.
20 Tunggaiaki motudu halalunta ide lao hihimbela hai Titu bona dati ara au moraingkai i pogulu doi petulungimi au ngkaia. 21 Ido hai kitudo amimi hema au meula i polumaongki ide bona tongawa kamanotona babehiangki, bara pea i peitana Pue, agaiana i peitanda wori tauna.
22 Ara mani hadua tauna au kitudu lao irikamu hihimbela hai ihira. Kiisa kamadotana medurei i lalu bagona Pue, lawi kisabikimi babehiana i lalu paka-pakana bago. Hai ide-ide, napeinao mpuu motulungikau, lawi naisa tunggaiami motulungi halalunta hampepepoinalai. 23 Ane arahe tauna au mekune kana i Titu, niuli iami rangangku au hampopobago au kutudu lao motulungikau. Hai ane arahe au mampekune kana i rangana au rodua, ihirami tauna au ratudu jumaa inde bona laohe motulungikau i bagomi. Tauna ide mampomahile hangana Kerisitu. 24 Mewali, kuperapi bona nidoko maroahe, hai nitudungiahe ahimi bona ope-ope jumaa moisa kamaahimi hai katouna lolitangki au motoiakau.