Paturona Paulu au kahopoana
13
1 Masilolongamona ina lao mosondakikau i kataluna belana. Nikatuinao apa au teuki i lalu Sura Malelaha au manguli, “Ane ara hadua tauna au rasalai, hangangaa ara rodua ba talu tauna au mosabiki katouna kamasalana bona manoto kara-karana.”* 2 Tangangku hihimbela hai ikamu i karombelana, kuweihe lolita i tauna i olomi au mobabehi dosa. Mewali, ide-ide, kehapirina karao hangko irikamu, kuhuleki mbuli lolitangku irikamu tauna au madosa hai i ope-ope tauna ntanina. Ane hawena deade hai ane bara manihe mampenosoi babehianda, ina makasara lolitangku; barahe ara hadua au ina tekabaha hangko i pehuku. 3 Arakau au merapi bona kupopaitaakau tanda au mopatongawa kaikona surona Kerisitu. Nipegia peami! Ane hawena irikamu ina niita mpuu kuasana Kerisitu au napatongawa i olomi melempo iriko Paulu. 4 Hangkoia Kerisitu rapaku i kau mombehape anti kamaledena nodo manusia. Agaiana anti kuasana Pue Ala, Ia tuwo hulemi. Ikami malede woringkai nodo Kerisitu. Agaiana anti kuasana Pue Ala, molambingkai katuwo au wou hihimbela hai Kerisitu. Mewali ane hawena deade, ina niita mpuu kuasa au naweingkai Pue Ala iti.5 Halalu, nipetandaka hampai watami, ba tou-tou mpuu tuwomokau i lalu pepoinalaimi i Kerisitu. Batena niisa kaarana Yesu i lalumi ba tauli ane pepoinalaimi mbero-mbero. 6 Kuharunga mpuu halalu tongawa irikamu katouna pepoinalaingki i Kerisitu. 7 Mekakaengkai i Pue Ala bona Natulungikau datikau mobabehi sala. Barakau kipekakaea bona mampetudungiangkai kamapandeki mobago agaiana bona mobabehikau apa au hintoto hai peundeana Pue Ala. Nauri ara manihe tauna au mosapuaka kuasangki, bara moapa, asala ikamu mobabehi liliukau apa au maroa. 8 Barangkai bai moewa paturo au tou, agaiana moula peangkai paturo iti. 9 Matanangkai ane niitangkai malede, asala ikamu maroho pepoinalaimi. Mekakaengkai bona manoto lalumi i peitana Pue. 10 Ido hai kuukiakau sura ide i tempoku mani karao hangko irikamu bona ane hawena deade, barapi mahara lolitangku irikamu au kupahawe hai kuasa au naweina Pue. Lawi kuasa iti barana Nawei bona mopakanawona pepoinalaimi, ngkalinari Naweina bona kupakaroho pepoinalaimi.
Tabea
11 Kahopoana halalu, hangangaa matana-tanakau. Nipakaroho peulami i Pue! Nipeulai paturongku! Hangangaa hampepekirikau hai tuwo mohintuwukau. Pue Ala ina mamporangaikau, mampopaitaakau ahiNa, hai moweikau roa ngkatuwo.
12 Ane mohihidupakau, mombetabe-tabekau hangko i lalumi. Ope-ope to Sarani inde mopakatuhe tabeanda irikamu.
13 Kiharunga Pue Yesu Kerisitu mowatikau, Pue Ala mampokaahikau, hai Inao Malelaha mamporangaikau ope-ope.
Hangko iriko
PAULU