<<    <     2 Korintu     12     >    >> 
Paulu mopahawe apa au natudungia Pue
12
1 Bara ara bunduna motoiake watanta haduduanta. Agaiana nauri nodo, kutoia liliu watangku haduduangku. Ina mampololitana apa au napopaitaa hai rapatongawaana Pue. 2 Moisana hadua to Sarani au hampulo hai iba parena au liu, raangka i paidaana Pue Ala i suruga. Bara kuisa ba tou-tou mpuu watana au raangka ba mangipi pea. Pue Ala pea au moisa. 3 Kuisato tauna iti. Ba tou-tou mpuu watana raangka ba mangipi pea, bara kuisa, agaiana Pue Ala pea au moisa 4 unga pea raangka i paidaana Pue Ala au rahanga Paradesi. Indora tauna iti mohadi apa pea au bara rabuku rapololita manusia hai bara mpuu rakira rapololita tauna. 5 Tauna iti au ina kupomahile bara kana watangku sadudua. Ane mampomahilena watangku batena pea kamaledengku au kupomahile. 6 Rapana mampomahilena watangku, barana tontuli, lawi ina mampololita peana au katou-touana. Agaiana kurempeki lalungku dati ara tauna au motoiana melumbu hangko i apa au raitami kubabehi hai apa au rahadimi hangko i bambari au kupahawe.a
7 Mewali, anti karumihina kamaroana hinangka au napatongawa Pue Ala, Ia moweina haki au morumpa watangku bona datina mampemahile. Haki ide peisa rapandiri nodo dui i watangku ba nodo hadua hawina Datu Tokadake au hawe iriko bona mampopeahi-ahina. 8 Talumi belana mekakaena i Pue, kuuli: “O Pue, kuperapi bona Nuingihia wongkoia haki au mopamalede watangku ide.” 9 Agaiana Nahanaina: “Bara Kuingihi, agaiana ina Kutulungiko hangko i kabulana laluNgku, iti handami. Lawi hangko i kamaledemu, kuasaNgku ina Kupatongawa i lalu katuwomu.” Ido hai matanana mampomahile kamaledengku, lawi i tempoku malede, Kerisitu mopakaroho watangku hai kuasaNa. 10 Mewali, kupokatana mpuu ane maledena, hai matanana ane rakakabosaina ba rapopeahi-ahina, ba molambina kasusa hai kapari anti peulangku i Kerisitu. Lawi ane maledena, ina marohona anti kanatulungingku Pue.
Paulu mamposusa lalu to Korintu
11 Ane inona mololitamona nodo tontuli, ikamu au mampopewalina node. Katouana ikamuri au hangangaa motoiana. Lawi kehapina malede, barato worina tepaiwoi hangko i suro ntanina au mampemapande gagahe iti. 12 Tangangku hihimbela hai ikamu, mobabehina tanda-tanda au mopatongawa kaikona surona Pue Yesu. Mobago liliuna i lalu kapari, mobabehina tanda kuasa hai tanda au metingkarai, anti karoho au kuhumba hangko i Pue Ala. 13 Halalu, ba niuli bara handa pobagongku i olomi! Pobagongku irikamu himbela hai pobagongku i tauna au i jumaa ntanina. Au mampoposisala iami ane i jumaa ntanina, merapina sarongku, agaiana irikamu halalu barana merapi sarongku. Ba paraluu kuperapi ampu irikamu anti kamasalangku iti?
14 Nipehadingi maroa! Ina laona mosondakikau i kataluna belana. Hai barana merapi apa-apa irikamu. Au kuhaoki, bara anu-anumi, agaiana lalumiri bona nipokaahina. Lawi barari anangkoi au mampasaokia paandena tosaenda; agaiana tosaeri au mampasaokia paandena ananda. 15 Mewali, matanana mopake hinangkana au ara iriko hawe-hawe i watangku motulungikau. Ane nodo kamahilena ahingku irikamu halalu, moapari pane makura mani ahimi iriko?
16 Niisa halalu barakau hambela kupakapari. Agaiana arahe tauna au mokakabosaina, rauli kuakalangikau. Rauli molambina rasi hangko irikamu anti podongkoku. 17 Bara tou! Arahe pae tauna au kutudu lao moakalangikau bona molambina rasi? Bara ara! 18 Hangkoia kuperapi bona Titu lao mosondakikau, hai ara wori hadua halalunta au kutudu mamporangai. Ba naakalangikau Titu i tempo iti? Niisato halalu, Titu hai iko hampepekiri peangkai, himbela poantiki.
19 Ineeri nipehangu kiuki ope-ope ide bona mouli pea notongki. Halalu au kipokaahi! Mololitangkai irikamu anti pohintuwuki hai Kerisitu. Pue Ala au mosabikike! Ope-ope au kipahawe, ope-ope au kibabehi, kipahawe hai kibabehi bona maroho pepoinalaimi. 20 Au kupokalanga ane laokau kusondaki kulambikau bara nodo au kupeinao hai hawena irikamu bara nodo au niharunga. Langana ane arakau au mohiho hai mombekahinai, mombekarumpui hadua hai hadua, mengkaiwongko, mombekakabosai, mombepodongkoa, mampemahile, hai au mehawu-hawu 21 Au kupokalanga: i kahawengku irikamu, Pue Ala Ampuku ina mopakaeana i lindomi, hai ina moteriana lawi bosa tauna i olomi bara manihe menoso hangko i babehianda au kedai, hangko i pebualosinda hai i potambi-tambi dele hai babehianda au merikai hai au bara hintoto rababehi.