Ineekau mosalai halalumi hampepepoinalai i lindonda topebotusi au bara mepoinalai i Pue Yesu
6
1 Moapari hai niunde mosalai halalumi hampepepoinalai i lindona topebotusi au bara mepoinalai i Pue Yesu? Moapari hai bara nipahawe kara-karami i halalumi hampepepoinalai? 2 Bara pae niisa halalu, i alo pebotusi, tauna au mepoinalai i Pue Yesu ina mampohuda-hudaa kara-karanda tauna i dunia. Mewali, ane ikamu ina mewali topebotusi au mampohuda-hudaa kara-karanda tauna i dunia, noumbami pae ane bara nibuku mobotusi kara-karami au koi i tempo ide? 3 Bara pae niisa, i alo pebotusi ikita to Sarani au ina mampohuda-hudaa kara-karanda malaeka. Mewali, hangangaa nibuku mpuu mobotusi kara-karanda tauna i dunia ide. 4 Ane ara posisisalami, moapari pane nipahawe iti i tauna au barahe tepesua i lalu jumaa?5 Tunggaiana lolitangku ide bona maeakau. Halalungku au mepoinalai i Kerisitu, bara pae ara hadua i olomi au manoto laluna au peisa mobotusi kara-karami? 6 Ara kuhadi hadua tauna hangko i olomi au mosalai halaluna hampepepoinalai i lindona topebotusi au bara mepoinalai i Pue Yesu! 7 Ineekau moanti kara-karami i tauna au bara to Sarani. Ane ara posisisalami, mepakaea mpuu, lawi iti mopakanoto kadami mobabehi apa au hintoto i peitana Pue Yesu. Katouana, ane ara au mopakanawokau ba mopakarugikau, aginamokau molambi rugi, pane nipahawe kara-kara iti i hadua topebotusi au bara to Sarani. 8 Agaiana melumbu kakadakena babehiami, lawi mopakanawo hai mopakarugikau rangami, hai iti nibabehi i halalumi hampepepoinalai.
9 Bara pae niisa halalu, tauna au kadake babehianda, barahe ina mewali taunana Pue Ala i lalu poparentaNa. Ineekau ranawo-nawo. Tauna au mobabehi babehia au merikai, au menomba i anitu, au mebualosi, au mobabehi sala nodo tobalilo au mamposamboko hangka tobalilona, 10 au manangka, au mehioro, au malangu-langu, au mepakadake, hai au modongko. Tauna au nodo, barahe mewali taunana Pue Ala i lalu poparentaNa. 11 Halalu, arakau au nodo babehiami hangkoia. Agaiana Napamalelahamokau Pue Ala hai Napopewalimokau taunaNa. Napamanotomokau i peitaNa anti pohintuwumi hai Pue Yesu Kerisitu hai anti kuasana Inaona Pue Ala Amputa.
Paturona Paulu kana i babehia merikai i tobalilo hai towawine
12 Arakau au manguli, “Anti kanakabahanta Pue Ala hangko i huku dosanta, ido hai peisake mobabehi apa pea peundeata.” Tou, agaiana iko manguli: ope-ope peisa tababehi, agaiana ara au mobundu hai ara wori au bara mobundu. Peisana mobabehi apa peundeaku, agaiana bara kuunde ane watangku ide nakuasai ba apa pea. 13 Ara wori lolita, “Paande mobundu i tainta, hai tai mobundu rapoihii paande.” Tou lolita iti, agaiana hambela tempo hinangkana iti ina napatuna Pue Ala. Agaiana watanta ide bara napopewali Pue Ala bona mebualosike. Watanta hangangaa tapake mobabehi peundeana Pue. Iami ampuna watanta. 14 Nodo Pue Yesu napatuwo hule Pue Ala hangko i kapate, nodo wori watanta ide ina Napatuwo hule Pue Ala hangko i kapate anti kuasaNa i alo pebotusi.
15 Bara pae niisa halalu, watami iami hangkira hangko i watana Kerisitu. Maroa pae ane watanta au mewalimi kirana Kerisitu tapake mobabehi sala hai towawine au kadake babehiana? Bara! 16 Bara pae niisa, hema au mebualosi hai hadua towawine au kadake babehiana mewali hawata-wata hai towawine iti. Lawi i lalu Sura Malelaha teuki node:
“Tauna au rodua iti mewalihe hawata-wata.”*
17 Agaiana hadua tauna au mohintuwu hai Pue, ia hampepekiri hai Pue.
18 Nipakarao watami hangko i babehia au sala iti. Lawi ope-ope dosa au rababehi mewali i raoa hangko i watanta. Agaiana ane ara au mobabehi sala i babehia tobalilo hai towawine, madosami i watana haduduana. 19 Bara pae niisa halalu, watami iami paidaa Inao Malelaha. Inao Malelaha au maida i lalumi, nihumba hangko i Pue Ala. Mewali watami barapi ikamu ampuna. 20 Lawi ikita ide naholomoke Pue Ala hai pirimoke Nabaiari. Ido hai watanta ide hangangaa tapake mobila Pue Ala.