Pobagonda surona Pue Ala
4
1 Ane ikami, agina niuli peamongkai hawi, lawi hawinangkai Kerisitu, au Naharungangkai moanti bambari hangko i Pue Ala au bara mani raisa tauna i dunia. 2 Au rahaoki hangko i tauna au raparenta ba hawi nodo ikami, hangangaa moula liliuhe hawana ampunda. 3 Mewali, ane arakau au mampeinao mokakabosaina ba mosalai pobagongku, bara kupailalu. Nodo wori ane arahe tauna ntanina au mosalai pobagongku, bara ina kupailalu. Bara wori kupakanoto pobagongku maroa ba bara. 4 Kuisa kabulana lalungku, agaiana bara iti au mopamanotona. Pue rai au ina moparesa lalungku manoto ba bara. 5 Ido hai kuuli, ineekau mosalai pobagonda hangka rangami. Nipegiami kahawena hule Pue. Iami au ina mobungkahi ope-ope au tewuniangi mani i lalu kamakaindi. Ia au ina mopatongawa ope-ope tunggaianda tauna au tewuniangi mani. I tempo itimi, hadua-hadua tauna ina molambi petoia hangko i Pue Ala moula kahintotoana.Paulu mokambaroahe to Korintu lawi mampemahilehe
6 Halalu, apa au kupololita inona, mokanai Apolo hai watangku haduduangku. Ikami rodua kupopandiri bona kupaturokau moula parenta au manguli, “Ineekau moliungi apa au teuki.” Tunggaiaku bona datikau ara au mampemahile anti peulami i hadua tadulakomi. Ineekau motoia hadua tadulakomi hai mopapakoikau tohaduana. 7 Ba niuli maroa lalumi hangko i rangami? Apa pae au ara irikamu au bara nidoko hangko i Pue Ala? Moapari hai mampemahilekau ane ope-ope au ara irikamu au nawei peakau Pue Ala? 8 Ba nipehangu barapi ara kamakurami? Ba nipehangu handami kamarohona pepoinalaimi i Pue? Ba niuli moparentamokau nodo datu, hai ikami surona Pue Yesu barapongkai niparaluu? Kemaroa mpuu halalu ane mewalikau datu bona moparenta woringkai hihimbela hai ikamu.
9 Agaiana, moula pelambiaku, ikami surona Pue Yesu napopewalimongkai Pue Ala tauna au meahi-ahi tuwona hangko i ope-ope tauna. Ikami rapahimbela hai tauna au ina rahuku mate i lindonda tauna bosa. Tepaiwoi tuwongki i lindonda manusia hai malaeka. 10 Ikami raimbangkai tontuli lawi mopahawengkai bambari kana i Kerisitu, agaiana niuli ikamu to Sarani au mapandekau! Ikami, maledengkai, agaiana niuli ikamu maroho pepoinalaimi! Ikamu raadaikau tauna i dunia, agaiana ikami, rakakabosaingkai! 11 Duuna ide-ide, bara handa paandeki, bara handa paenungki, bara handa hampiki. Rapopeahi-ahi liliungkai. Bara ara paidaangki au maroa. 12 Mobago mantimingkai haduduangki. Ane arahe au motunda-tundangkai, kihurungihe hai pewati. Ane arahe au mampopeahi-ahingkai, kitodiha pea. 13 Ane arahe au motatarahungkai, kihanaihe hai lolita au maalusu. Duuna ide-ide raimbangkai nodo pupu hai dai dunia.
14 Halalu! Tunggaiaku mouki sura ide barakau kupakaea. Lolitangku ide, mopaturokau, lawi kuimbakau anangku au kupokaahi. 15 Lawi kehapi isabunami guru au moninikau i peulami i Kerisitu, iko pea au nipouma, lawi iko au nguru-nguruna mobambari Ngkora Marasa irikamu, alana mepoinalaikau i Kerisitu Yesu. 16 Ido hai kuperapi ntepuu halalu, bona nipeulai babehiangku. 17 Mewali, kutudumi Timotiu lao mampohidupaakau. Timotiu iti mampopolumao liliu bagona Pue, hai kuimbami anangku au kupokaahi. Ane hawe irikamu, ia ina mampopaingaakau noumba peulangku i Kerisitu hintoto hai paturo au kupahawe i ope-ope to Sarani i boea-boeana.
18 Arakau au mampemahile, lawi nipehangu barakau ina lao kupohidupaa. 19 Agaiana ina lao mpuuna mosondakikau. Ane napokana Pue, barapi mahae ina hawena irikamu. I tempo iti, ina kuita apa au rababehi tauna au mampemahile iti, bara i lolitanda pea, agaiana hai kuasa au hangko i Pue Ala. 20 Lawi ane Pue Ala mewali Datunta, hangangaa moulake peundeaNa, bara pea i lolitanta agaiana i babehianta lawi ara kuasa au tahumba hangko Iria. 21 Mewali, umba au niunde: Hawena mokambaroakau hai lolita au makasara ba mopaturokau hai lolita au maalusu, au buke pepokaahi.