Kapande hangko i Inao Malelaha
12
1 Kaliliuana halalu, ina mololitana kana i kapande au tahumba hangko i Inao Malelaha. Tunggaiaku bona niisa mpuu apa au tou. 2 Nikatuinao halalu, hangkoia hangko bara manikau moisa Pue Ala, tedii lalumi menomba i anitu au bara peisa mololita, au rababehihe hangko i watu ba kau. 3 Ido hai kupopaisaakau, hadua tauna au mololita anti peninina Inao Malelaha, bara ina manguli, “Hararami Yesu!” Nodo wori bara ara hadua tauna au manguli, “Yesu iami Pue!” ane bara nanini Inao Malelaha.4 Inao Malelaha moweike paka-pakana kapande mampopolumao bagona Pue Ala. Ikita hadua-hadua molambike kapande au montani-ntani, agaiana hinangka kapande iti, naweike Inao Malelaha. 5 Ngkaia pakana bago au tapobago i Pue, agaiana Pue au tapobagoa, hadua pea. 6 Ngkaia pakana rara au napake Pue Ala motudungiake kuasaNa i lalu katuwonta, agaiana Pue Ala au hadua pea, Iami au mampobago paka-pakana i lalu katuwonta.
7 Hadua-haduake rawei kapande hangko i Inao Malelaha bona tapake motulungi halalunta hampepepoinalai. 8 I hadua tauna, Nawei Inao Malelaha kapande mepaturo. I tohaduana, Nawei kapande mopakanoto lempona Ngkorana Pue Ala. 9 I tauna ntanina, Nawei pepoinalai au maroho. Hai i tohaduana, Inao Malelaha mowei kuasa mepakaoha. 10 I tohaduana, Nawei kapande mobabehi tanda kuasa; i tohaduana, Nawei kapande mopahawe lolita hangko i Pue Ala. I hadua wori, Nawei kapande mampopontani apa au hangko i Inao Malelaha hai apa au bara hangko i Inao Malelaha. I tauna ntanina, Nawei kapande mololita i lalu basa au hangko i Inao Malelaha. Hai i hadua wori, Nawei kapande mopalimba lempona basa iti bona raisa hangka rangana. 11 Agaiana ope-ope iti nakiraiake Inao Malelaha au hadua pea. Iami au moweike kapande au montani-ntani moula peundeaNa haduduaNa.
Bosake, agaiana hawata-wata peake anti pepoinalainta i Yesu
12 Ikita au mepoinalai i Kerisitu peisa rapandiri nodo wata tauna. Ane wata tauna hambua pea, agaiana ngkaia ngaana. Nauri ngkaia ngaana, ope-ope ngaa iti mewali pea hambua wata. 13 Nodo wori ikita. Ikita ope-ope mewali nodo hambua wata, lawi rariuke ope-ope hai Inao Malelaha au hadua pea. Ikita ope-ope molambi Inao Malelaha au himbela, maroa to Yahudi ba au bara to Yahudi, maroa au hawi tuwonda ba au bara hawi.
14 Lawi i watanta, ara biti, ara taie, hai ngkaia pakana au ntanina. Bara hangkira peake. 15 Ane rapana, biti manguli, “Iko, barana taie, ido hai barana hangkira hangko i wata.” Tou pae ia bara hangkira hangko i wata? 16 Ane talinga manguli, “Iko, barana mata, ido hai barana hangkira hangko i wata,” tou pae ia bara hangkira hangko i wata? 17 Ane rapana, ope-ope ngaana watanta mewali haha mata, noumbami kamehadinta? Ane ope-ope mewali haha talinga, noumbami kapeisanta meenga? 18 Pue mamboli hinangka ngaana watanta i paidaana, hintoto hai peundeaNa. 19 Ane rapana Napahampaka pea ngaana, noumbami kapeisana rauli wata? 20 Mewali, ngkaia ngaana watanta, agaiana hambua pea wata.
21 Mata bara peisa mouliangaa taie, “Barako kuparaluu!” Hai waa bara peisa mouliangaa biti, “Barako kuparaluu!” 22 Katouana ngaana watanta au raimba malede, itiri au paraluu ntepuu. 23 Kirana watanta au raimba bara mobundu, kira itiri au paraluu tapoperae. Kirana watanta au bara hintoto ratotoki tauna, itiri au paraluu takadipura maroa. 24 Agaiana kirana watanta au maroa raita tauna, bara paraluu tapoperae. Pue Ala mokadipura kirana watanta bona hangkira au bara gaga rabila, iti au hangangaa takadipura ntepuu. 25 Nodo wori ikita au mepoinalai i Pue Yesu, ikita ope-ope rapandiri nodo kira-kirana wata au hambua pea, hai hangangaa mombekamatake hadua hai hadua bona dati ara posisalanta. 26 Ane ara hadua ranganta au mahai, hangangaa mantodiha sambelake. Ane ara hadua ranganta au ratoia, ikita ope-ope ina matana sambela worike.
27 Ikamu ope-ope wataNamokau Kerisitu, hai hadua-haduakau iami hangkira hangko i wata iti. 28 Hai irikita au mepoinalai, Pue Ala mopakanotomi bona hadua-hadua ara bagona, kaisa arahe au mewali suroNa, kadua arahe au mopahawe NgkoraNa, hai katalu arahe au mepaturo. Ara worihe au Nawei kuasa mobabehi tanda kuasa. Arahe au Nawei kuasa mepakaoha, arahe au molambi kapande motulungi hangka ranganda, arahe au mewali tadulako, arahe au molambi kapande mololita i lalu basa au hangko i Inao Malelaha. 29 Bara ope-ope tauna mewali suroNa, ba topopahawe NgkoraNa ba guru. Bara ope-ope tauna peisa mobabehi tanda kuasa 30 ba mepakaoha. Bara ope-ope tauna molambi kapande mololita i lalu basa au hangko i Inao Malelaha ba mopalimba basa iti bona raisa tauna ntanina. 31 Mewali, hangangaa nipari-pari mpuu bona molambikau kapande hangko i Inao Malelaha au meliu kamaroana. Agaiana ara au melumbu ntepuu kamaroana, itimi au ina kupahaweakau.