Surana Suro Paulu au nguru-nguruna i to Sarani i wanua
Korintu
1
1-2 Sura ide hangko iriko Paulu hai hangko i halalu hampepepoinalainta Sostenes, kipakatu irikamu jumaa au ara i wanua Korintu au nakakiokau Pue Ala mewali taunaNa. Iami au mopamalelahakau anti pohintuwumi hai Kerisitu Yesu hihimbela hai ope-ope tauna au maida iumba-umba pea au mepoinalai i Yesu Kerisitu, Pue au rapenombai hai au tapenombai. Iko, naangkana Pue Ala mewali surona Yesu Kerisitu moula peundeaNa. 3 Kuharunga Pue Ala Umanta hai Pue Yesu Kerisitu mowatikau hai moweikau roa ngkatuwo.Paulu manguli ngkaia kamaroana i Pue Ala
4 Halalu, barana mengkangkaroo manguli ngkaia kamaroana i Pue Ala anti kaikamuna, lawi Ia moweikau pewati hangko i kabulana laluNa anti pohintuwumi hai Kerisitu Yesu. 5 Anti pohintuwumi hai Kerisitu, Naweimokau hinangkana pewati au mobundu i katuwomi: Napopaisaamokau paturo au tou, hai Naweimokau kapande mopahawe paturo iti. 6 Ope-ope iti mopakanoto kamarohona pepoinalaimi i bambari kana i Kerisitu au kipahaweakau, 7 duuna barapi ara kamakurana pewati au nilambi. Nilambimi paka-pakana kamapande hangko i Inao Malelaha, tangami mampegia kahawena hule Amputa Yesu Kerisitu. 8 Ia ina mopakaroho pepoinalaimi duuna i kahopoa dunia bona ane Nakahaweikau Amputa Yesu Kerisitu i kahaweNa hule, barapi ara kamasalami. 9 Pue Ala mokakiokau bona mohintuwukau hai AnaNa, Yesu Kerisitu Amputa, hai Ia mopabukei liliu dandiNa irikita.
Paulu mokambaroahe to Korintu lawi barahe mohintuwu
10 Halalu, hangko i kuasa au naweina Amputa Yesu Kerisitu, kuperapi bona mohintuwukau ope-ope. Ineekau mopaara posisala. Hangangaa mohintuwukau hai hampepekirikau. 11 Halalungku, tunggaiaku manguli nodo, lawi arahe halalunta hasou-souna Kloe au mopahawe iriko kaarana posisisalami. 12 Mololitana nodo lawi arakau au mampeinao mampopontani hadua hai hadua. Arakau au manguli, “Iko meula i Paulu.” Arakau au manguli, “Iko meula i Apolo.” Au ntanina wori manguli, “Iko meula i Peturu.”a Ara mbuli au manguli: “Iko meula i Kerisitu.” 13 Maroa pae ane ikamu au meula i Kerisitu mosisala nodo? Ba iko au mate rapaku i kau mohuru dosami? Ba rariukau bona mewalikau topegurungku? Bara! 14 Kuuli ngkaia kamaroana lawi barakau ara au kuriu, batenda pea Krispus hai Gayu, 15 bona datihe ara au manguli kuriukau mewali topegurungku. 16 (Oo, Setepanu wori hantambi, iko mpuu au moriuhe. Agaiana i raoa hangko irihira, barapi kukatuinao tauna ntanina au kuriu.) 17 Barana Naangka Kerisitu mewali suroNa bona moriuna tauna, agaiana Naangkana bona moantina Ngkora Marasa. Ane mopahawena Ngkora Marasa, barana mololita hangko i kamapandeku datihe ara tauna au mampoinalai i Kerisitu anti kamapandeku mololita, agaiana mepoinalaihe anti kuasa kapatena Kerisitu, bona kapatena Yesu i kau mombehape, bara mbero-mbero.
Hangko i Ngkora Marasa taisa kuasana hai kamanotona laluna Pue Ala
18 Mopahawengkai bambari au manguli Kerisitu mohuru dosa manusia i karapapateNa i kau mombehape. Ane tauna au monontohi naraka mohadi bambari iti, rauli, “Iti lolita tontuli.” Agaiana ane ikita au nahoremake Pue Ala hangko i huku dosanta mohadi bambari iti, tauli, “Itimi kuasana Pue Ala!” 19 I lalu Sura Malelaha, Pue Ala manguli node,
“Ina Kupaope kapande manusia,
hai bara ina Kupake akalanda tauna au mapande.”*
20 Apa bundunda tauna au mapande? Apa bundunda guru agama Yahudi? Apa bundunda tauna au mapande mololita i dunia ide? I peitana Pue Ala, ope-ope kapande manusia Naimba mbero-mbero pea. 21 Lawi hangko i kapande manusia, barake peisa moisa Pue Ala. Anti kamapandena Pue Ala, Nabotusimi bona hema pea au mepoinalai i Ngkora Marasa au kipahawe, tauna iti ina Nahoremahe hangko i dosanda. Agaiana ane kipahawe Ngkora Marasa, tauna au bara mepoinalai manguli, “Iti lolita tontuli.” 22 Ane to Yahudi, barahe mounde mepoinalai ane barahe kipopaitaa tanda kuasa. Hai ane to Yunani, barahe mounde mepoinalai ane barahe kipakanotoa hai kapande manusia. 23 Agaiana ikami, mopahawe peangkai kapatena Kerisitu au rapaku i kau mombehape. Bambari iti rapokakoinao to Yahudi, hai i tauna au barahe to Yahudi, bambari iti raimba pea lolita tontuli. 24 Agaiana i tauna au nakakiomohe Pue Ala, maroa to Yahudi ba au bara to Yahudi, bambari iti, naporara Kerisitu mopatongawa kuasaNa hai kapandena Pue Ala. 25 Ane mopahawengkai kapatena Kerisitu au rapaku i kau mombehape, raimbangkai tontuli. Agaiana katouana, meliu kamapandena Pue Ala hangko i kapande manusia. Moula lolita manusia, tunggaiana Pue Ala iti bara mobundu. Agaiana meliu kuasana Pue Ala hangko i kuasa manusia.
26 Halalu, nikatuinao katuwomi hangkoia, hangko damanikau nakakio Pue Ala mewali taunaNa. I tempo iti, barakau bosa au mapande ba au makuasa ba au mapangka lantimi i peitana manusia, 27 lawi Pue Ala mopilei tauna au bara mapande i peitana manusia bona tomapande ina rapakaea. Naoaka mopileihe au malede bona tauna au maroho ina rapakaea. 28 Naoaka mopileihe au tepaiwoi tuwonda, au rakakabosai hai au bara mobundu i peitana manusia bona manoto kadana mobundu au napomahile manusia. 29 Mewali, ido hai bara ara tauna au peisa mampemahile. Bara ara hadua au peisa manguli, “Anti kamapandeku, ido hai napileina Pue Ala.” 30 Pue Ala pea au mobungkahiake rara pane mohintuwuke hai Kerisitu Yesu. Anti pohintuwuta hai Kerisitu Yesu, taisami kamapandena Pue Ala: Napamanotomoke Kerisitu i peitana Pue Ala, au mopamalelahamoke, hai au mohompomi dosanta. 31 Mewali, nodo au teuki i lalu Sura Malelaha:
“Hema au naunde mampololita kamatanana laluna,
hangangaa napololita kamatanana iti anti kamaroana Pue iria.”*