Paulu mopahawe Ngkora Marasa, bara hangko i kamapandena haduduana, agaiana hangko i kuasana Inao Malelaha
2
1 Halalu, kahawengku i boeami hangkoia, kupahaweamokau bambari au hangko i Pue Ala. I tempo iti, barana mopake basa au mapangka ba lolita au moula kamapandeku sadudua. 2 Lawi kupakanotomi i lalungku: mepongka i kahawengku irikamu, barana ina mampololita au ntanina, batena pea Yesu Datu Topehompo au mate rapaku i kau mombehape. 3 Hawena irikamu, maledena, hai moradana anti kalangangku. 4 Bambari au kupahaweakau, bara kupahawe hangko i kamapandeku sadudua. Bara kamapandeku mololita au mopakanotoakau katouna bambari iti. Agaiana kuasanari Inao Malelaha, ido hai pane niisa katouna bambari au kuanti. 5 Mewali, mepoinalaimokau i bambari au kuanti, bara anti kapande manusia, agaiana anti kuasanari Pue Ala.Inao Malelaha mampopaisaake paturo au hangko i Pue Ala
6 Nauri nodo, ane mololitangkai i tauna au marohomi pepoinalainda i Kerisitu, mampololita mpuungkai kapande. Agaiana au kipahawe iti, bara nodo kapande au hangko i dunia ide ba kapandenda tadulako au kamakuasanda ina tuna. 7 Au kipahaweakau, iami kapande au hangko i Pue Ala. Mopahawengkai tunggaiana Pue Ala moweike katuwo au meawa i alo au ina mai. TunggaiaNa iti, bara mani raisa tauna hangkoia. Agaiana hangko damani dunia ide rapopewali, Pue Ala mopakanoto amimi kaina Naweinta katuwo au meawa iti. 8 Tadulako i dunia ide, barahe moisa tunggaiana Pue Ala. Lawi ane keraisa, kebarahe mopaku Amputa au meawa tuwoNa i kau mombehape. 9 Agaiana ara teuki i lalu Sura Malelaha node:
“I tauna au mampokaahi Pue Ala,
Napasilolongaamohe au maroa mpuu,
au bara mani raita ba rahadi tauna,
hai au bara mani hambela mesupa i pekiri manusia.”*
10 Agaiana ikita, moisamoke tunggaiana Pue Ala, lawi tunggaia iti napopaisaamoke Pue Ala hai kuasana Inao Malelaha. Hai i Inao Malelaha bara ara au tewuniangi, lawi Ia moparesa hinangkana hawe-hawe i tunggaiana Pue Ala au bara mani raisa tauna. 11 Lawi au moisa laluna hadua tauna, iami inaona tauna iti haduduana. Nodo wori, au moisa laluna Pue Ala, batena Inaona Pue Ala. 12 Hai ikita, barake molambi inao hangko i dunia ide, agaiana molambike Inaona Pue Ala bona taisa hinangkana au nawei mberoke Pue Ala.
13 Mewali, ane mopahawengkai Ngkora Marasa, barakau kipahawea hangko i kamapandeki mololita. Agaiana kipakanoto bambari iti hai lolita hangko i Inao Malelaha i tauna au molambihe Inao Malelaha. 14 Tauna au bara moisa Pue Ala, barahe mampoinalai paturo au hangko i Inaona Pue Ala, lawi rauli, “Paturo iti, lolita tontuli.” Bara rabuku tauna iti modoko paturo au hangko i Inaona Pue Ala, lawi paturo iti hangangaa napakanoto Inao Malelaha i lalunta. 15 Ikita au molambi Inao Malelaha, manoto lalunta moparesa hinangkana: maroa ba bara. Agaiana tauna au bara moisa Pue Ala, barahe peisa moparesa lalunta. 16 Lawi teukimi i lalu Sura Malelaha:
“Hema pae au moisa pekirina Pue Ala?
Hema pae au peisa mopaturo Ia?”*
Agaiana ikita ide naweike Pue Ala pekiri au himbela hai Kerisitu.