Tuntukana Pobagonda
Surona Pue Yesu
Pepongkaa lolita
I Tuntukana Pobagonda Surona Pue Yesu ide, Lukasi mopaliliu lolitana au napahawe i surana (Ngkora Marasa au nauki Lukasi). I lalu sura ide, Lukasi mampololita pobagonda topeguruna Pue Yesu mopahawe Ngkora Marasa. Anti peninina Inao Malelaha, bambari iti rapahawe “i Yerusale, i humalele tampo Yudea hai Samaria, hawe-hawe i humalele dunia” (1:8). I popahawenda Ngkora Marasa, bosa tauna mepoinalai i Pue Yesu. Au napakanoto worimi Lukasi: (1) bara ara tunggaianda to Sarani mopaara kamagerona kadatua Roma; hai (2) apa au rapoinalai to Yahudi, tepabukeimi i lalu agamanda to Sarani.
Au napaioru Lukasi i lalu sura ide iami pobagona Inao Malelaha. I Alo Pentakosta, Inao Malelaha mendaulumi hai kuasaNa i ope-ope tauna au mepoinalai i Yesu i wanua Yerusale. Tabasa i sura ide, noumba rarana Inao Malelaha monini liliu to Sarani hai mopakaroho pepoinalainda.
I lalu sura ide, lempona Ngkora Marasa rapakanotoake. Ane tabasa sura ide, tongawami kamakuasana Ngkora Marasa iti i lalu katuwonda ope-ope tauna au mepoinalai i Pue Yesu.
Ihi sura
1. Rara mopahawe Ngkora Marasa rapasilolonga (1:1-26)
a. Pue Yesu mopahawe hawaNa hai dandiNa au kahopoana (1:1-14)
b. Pahuruna Yudasi rapilei (1:15-26)
2. Ngkora Marasa rabambari i Yerusale (2:1–8:3)
3. Ngkora Marasa rabambari i Yudea hai Samaria (8:4–12:25)
4. Pobagona Paulu mopahawe Ngkora Marasa (13:1–28:31)
a. Polumaona au nguru-nguruna (13:1–14:28)
b. Pogombo i Yerusale (15:1-35)
c. Polumaona au kadua (15:36–18:22)
d. Polumaona au katalu (18:23–21:16)
e. Paulu ratarunggu i Yerusale, Kaisarea, hai Roma (21:17–28:31)