Yesu mopatongawa wataNa i topeguruNa au pitu
21
1 Roo indo, hambela mbuli Yesu mopatongawa wataNa i topeguruNa, i wiwi Rano Tiberias.a Node tuntukana: 2 Hambela tempo bahangkiahe topeguruna Yesu mogulu i wiwi rano, iami Simo Peturu, Tomas au rauli Toporopa, Natanael hangko i boea Kana i tampo Galilea, rodua anana Sebedeus, hai rodua topeguruna Yesu au ntanina. 3 Nauli Simo Peturu i rangana, “Ina laona modala.”Rahanai rangana, “Meula woringkai.” Lao mpuumohe mesawi i duanga hai modalamohe. Agaiana i lalu hambengia iti, bara huba hambaa au kana dalanda.
4 Hungku mabaami, Yesu meangka i wiwi rano, agaiana bara raisa kaYesuna. 5 Nawotuihe Yesu, nauli, “Halalu, ba arami rasimi?”
Rahanai, “Bara huba hambaa.”
6 Nauliangaahe, “Nitende dalami ntanda i koanana duangami, batena ina morasikau.” Ratende mpuumi dalanda ntanda i koana, hai barapi rabuku radii, lawi ngkaia ntepuu bau au ara i laluna.
7 Hangko inditi, topeguruna Yesu au Napokakaia mouliangaa Peturu, “Olou Pue!” Kanahadina Peturu lolitana, mebadumi (lawi ia bara mebadu), hai mengkanawo i owai monangu lao i lorena. 8 Topeguruna Yesu au ntanina i duanga liliuhe, hai modiihe dala au buke bau lao i wiwi rano, lawi baratohe karao hangko i lore, ba arato pea pae hangatu mete. 9 Pendaulunda hangko i duanga, moitamohe api inditi, hai i wongko api iti ara ikane hai ara wori roti i holana Yesu.
10 Nauliangaahe Yesu, “Nianti mai bahangkia baana bau au hangko nidala.” 11 Simo Peturu mengkahe i duanga hai modii dala lao i lore. Dala iti buke bau au mahile: hangatu lima pulona hai talu baana. Nauri nodo kangkaiana, dala iti bara wori mahepa.
12 Nauli Yesu, “Maikau molabi.” Bara ara hadua topeguruNa au bai mekune Iria, “HemaKo?” lawi manotomi i lalunda kaIanato Pue Yesu. 13 Yesu moala roti hai ikane, hai Naweihe topeguruNa. 14 Itimi kataluna belana Pue Yesu mopatongawa wataNa i topeguruNa mepongka i katuwoNa hule.
Yesu mololita i Peturu
15 Karoonda maande, Yesu mololita i Simo Peturu, nauli, “Simo anana Yona, ba nupokaahiNa meliu hangko i pepokaahinda rangamu iti Iriko?”b
Nauli Peturu, “Io, Pue. Nuisato kakupokaahiMu.”
Nauli Yesu, “Ane nodo, nukadipurahe dimbaKu.”
16 Roo indo, mekune mbulimi Yesu karombelana i Peturu, “Simo, anana Yona, ba nupokaahiNa?”
Nauli Peturu, “Io, Pue. Nuisato kakupokaahiMu.”
Nauli Yesu, “Ane nodo, nukadipurahe dimbaKu.”
17 Hangko inditi, mekune mbulimi Yesu kataluna belana, “Simo, anana Yona, ba nupokaahiNa?”
Masusami laluna Peturu, lawi talumi belana Yesu mekune ba nupokaahiNa. Mewali, nauli Peturu, “Pue, Nuisa hinangkana. Nuisa kakupokaahiMu.”
Nauli Yesu, “Ane nodo, nukadipurahe dimbaKu. 18 Tou mpuu lolitaNgku ide: i tempomu mani mangura, mowewe saduduako pekomu, hai laoko iumba pea peundeamu. Agaiana ane saemoko hangalo, ina mohuhuko taiemu rataka tauna ntanina hai raantiko lao i paidaa au bara nuunde.” 19 Hai lolitaNa iti, Yesu mopakanoto noumba Peturu ina rapapate bona hangana Pue Ala rapomahile. Roo indo, nauli mbuli Yesu i Peturu, “Meulamoko Iriko!”
Yesu mampololita kana i topeguruNa au hadua
20 Hangko inditi, membalilimi Peturu, moita hadua topeguruna Yesu au napokakaia meula i taleunda. (TopeguruNa iti iami au mohuda i holana Yesu tanganda maande kaindi hai mekune Iria, “Pue, hemari au ina mampobaluKo?”) 21 Kanaitana Peturu rangana iti, mekunemi i Yesu, “Pue, apa au ina mewali i rangangku ide?”
22 Nauli Yesu, “Ane Kuunde bona ia tuwo liliu duuNgku hawe i karombelana, bara paraluu nuisa! Agaiana oio meula peamoko Iriko.”
23 Hangko inditi, tebambarimi i topeulana Yesu, kadana ina mate topeguruNa iti. Agaiana au nauli Yesu bara nodo, noderi, “Ane Kuunde bona ia tuwo liliu duuNgku hawe i karombelana, bara paraluu nuisa!”
24 TopeguruNa Yesu itimi au mopahawe hinangka au raita mata, hai au mouki ope-ope iti i lalu sura ide. Hai kiisa posabina iti tou.
Kahopoa lolita
25 Ngkaia mani au nababehi Yesu, agaiana ane hinangkana au Nababehi iti rauki i lalu sura, kira-kira humalele dunia ide bara handa rapambolii sura iti.