8
1 Saulu wori mampokana karapapatena Setepanu iti.Saulu mampopeahi-ahi tauna au mepoinalai i Yesu
Mepongka alo iti, ope-ope topepoinalai i Pue Yesu au ara i Yerusale rapopeahi-ahi mpuumohe, alana mahawuhe i humalele tampo Yudea hai Samaria. Batenda pearai surona Pue Yesu au barahe melangka. 2 Bahangkia tauna au mengkoru i Pue Ala mangala watana Setepanu. Anti kawioranda, rateriahi hai ratawu.
3 Hai i tempo iti, Saulu mampopeahi-ahi liliu tauna au mepoinalaihe i Pue Yesu. Ope-ope sounda nasuaki, hai ope-ope tauna au mepoinalai i Yesu, maroa tobalilo maroa towawine, nahakahe hai naantihe lao ratarunggu.
Pilipu i Samaria
4 Mewali, topepoinalai au mahawuhe iti, mopahawehe Ngkorana Pue iumba pea kalaoanda. 5 Nodo wori Pilipu,a laomi i hambua boea i tampo Samaria mopahaweahe kaYesuna Datu Topehompo. 6 Matanahe ampu boea mohadi lolitana Pilipu hai moita tanda kuasa au nababehi, 7 lawi ia mampopeloho seta hangko i bosa tauna au napesuangi, alana meloho mpuuhe seta iti hai monganga-ngangahe. Bosa wori tauna au palu hai au wara bitinda napakaoha Pilipu. 8 Rumihi mpuu kamatananda ampu boea moita apa au mewali iti.
9 I lalu wanua iti, ara hadua tobalilo au rahanga Simo. Simo iti, hadua topobalimata au mahaemi mampopaita isana au metingkarai i to Samaria. Nauli kaiana tauna au mahile kuasana. 10 Mentaka mpuu lalunda ope-ope ampu boea iria, maroa tuana ba tauna bosa, rauli, “I Simo ara kuasana Pue Ala au rauli Kuasa Mahile.” 11 Mewali ope-ope ampu boea meulahe iria, lawi bosa belana tingkarahe moita isana. 12 Agaiana kahawena Pilipu i boeanda, ia mopahawe bambari kana i poparentana Pue Ala, hai napaturoahe kaYesuna Datu Topehompo alanda bosa tobalilo hai towawine mepoinalai i Yesu hai rariuhe. 13 Hangko inditi, mepoinalaimi Simo hai rariu. Karoona rariu, meula liliumi i Pilipu, lawi tingkara laluna moita tanda kuasa au nababehi Pilipu.
14 Roo indo, surona Pue Yesu au ara i Yerusale mohadimohe bambari kana i to Samaria au modokomohe Ngkorana Pue Ala. Ido hai mampohawaamohe Peturu hai Yohane lao i Samaria. 15 Kahawenda Peturu hai Yohane, mampekakaengaamohe to Samaria au mepoinalaimohe i Pue Yesu bona molambihe Inao Malelaha. 16 Tempo iti, Inao Malelaha bara mani mendaulu irihira, lawi hangko rariuhe i lalu hangana Pue Yesu.b 17 Mewali Peturu hai Yohane mampekakaengaahe hai moangka taienda i wongko waanda to Samaria iti. Hai modokomohe Inao Malelaha.
18 Simo topobalimata moita hema pea au ratobo Peturu hai Yohane molambihe Inao Malelaha. Ido hai laomi moanti doi i Peturu hai Yohane, 19 nauliangaahe, “Niwei wongkoia kuasami iti bona hema pea au kutobo ina modokohe Inao Malelaha.”
20 Agaiana nauli Peturu iria, “Marugimoko hai marugi wori doimu! Nupehangu pae, kabulana laluna Pue Ala peisa raholo hai doi? 21 Barako hintoto mobago hihimbela hai ikami, lawi bara manoto lalumu i Pue Ala. 22 Menosomoko hangko i tunggaiamu au kadake iti, hai mekakaeko i Pue bona Naampungiko hangko i tunggaiana lalumu au kadake. 23 Lawi kuita mahina mani lalumu, hai teheako i dakemu.”
24 Nauli Simo i Peturu hai Yohane, “Nipekakaea wongkoia i Pue bona datina narumpa rugi au nuuli iti!”
25 Karoonda Peturu hai Yohane mepaturo hai mopahawe Ngkorana Pue, mesulemohe lao i Yerusale. I polumaonda, rabambari wori Ngkorana Pue i boea-boea ntanina i tampo Samaria.
Pilipu hai to Etiopia
26 Ara hadua malaekana Pue au mopahawe lolita ide i Pilipu, nauli, “Laoko ntanda i Lau i rara au hangko i Yerusale monontohi Gasa.” (Rara iti makura rapolumaongi.) 27-28 Lao mpuumi Pilipu monontohi rara au natudungia Pue. I tempo iti, ara wori hadua to Etiopia au moliu i rara iti mesule lao i boeana. Tauna iti, mapangka lantina lawi ia au mokingki hinangka ihi souna datu towawine i tampo Etiopia. (Datu towawine iti rahanga Kandake.) Karoona to Etiopia iti menomba i Pue Ala i Yerusale, ia mesawimi i kareta au nadii dara hai mesule lao i boeana. Tangana mohuda i lalu karetana, ia mobasa hambua sura au nauki nabi Yesaya hangkoia. 29 I tempo iti, Inaona Pue Ala mouliangaa Pilipu, “Lao nuhungkuki olou kareta.” 30 Mewali melangka mpuumi Pilipu lao i kareta iti. Kahawena indo, nahadi tauna iti mobasa Surana Nabi Yesaya. Napekune Pilipu, “Tua, nuisa pae lempona iti au nubasa?”
31 Nahanai tauna iti, nauli, “Noumba kakuisana, barana ara au mamponotoa.” Roo indo, to Etiopia iti mowawahami Pilipu mengkahe i lalu karetana bona mohudahe hihimbela. 32 Idemi lolita au nabasa hangko i Surana Nabi Yesaya,
“Ia nodo hambaa dimba au raanti lao rasambale.
Ia nodo hambaa ana dimba au ragundi wuluna agaiana bara mobee-bee;
mandii-ndii pea.
33 Ia rakakabosai hai rahuku;
bara hintoto karahukuNa.
Bara ara hadua tauna au peisa mololita kana i pemuleaNa,
lawi Ia rapapate.”*
34 Hangko inditi, mekunemi to Etiopia i Pilipu, nauli, “Uliangaana hema au natunggai nabi iti, watana haduduana ba tauna ntanina?”
37 [Nahanai Pilipu, “Ane tou-tou mpuu nupoinalaimi, peisamoko kuriu.”
Nauli to Etiopia iti, “Kupoinalai mpuu Yesu Kerisitu iami Anana Pue Ala.”]
