<<    <     Suro     9     >    >> 
Saulu menoso hai mepoinalai i Yesu
9
1 I tempo iti, koi ntepuu inaona Saulu, hai napeinao peami mampopalanga hai mopapate tauna au mepoinalai i Pue Yesu. Ido hai laomi i Tadulako Mpenomba Mahile 2 merapi sura kuasa au peisa naanti lao i tadulako sou penombaa i wanua Damsik. Tunggaiana ane arahe nahumba tobalilo ba towawine au mampeulai paturona Yesu, ina nahakahe hai naantihe i Yerusale.
3 Mewali, i lalu polumaona lao i Damsik, hungkumi i wanua, unga pea ara pewangka hangko i langi motoleliki Saulu. 4 Madungkami Saulu hai mohadi hambua wotu au manguliangaa, “Saulu, Saulu, moapa hai nupopeahi-ahiNa?”
5 Nauli Saulu, “Tua, hemaKo?”
Mehana au mololita iti, Nauli, “Ikomi Yesu, au nupopeahi-ahi! 6 Mearomoko hai laomoko i wanua. Indolou ina rapahawea peako apa au hangangaa nubabehi.”
7 Tempo iti, tauna au hihimbelahe hai Saulu barahe peisa mololita, lawi langahe. Ihira mohadi worihe wotu iti, agaiana bara raita kahemana au mololita.
8 Hangko inditi, meangkami Saulu. Nabungkahi matana, agaiana barapi meita. Mewali, ranini pearai lao i wanua Damsik.9 Talu alona kamahaena, Saulu bara meita, bara wori maande hai maenu.
10 I tempo iti, i wanua Damsik, ara hadua tauna au mepoinalai i Yesu, hangana Ananias. Ia moita hambua pampetudungia, hai i lalu pampetudungia iti, Pue Yesu mekakio, Nauli, “Ananias!”
Mehana Ananias, nauli, “Idetona Pue.”
11 Nauli Pue, “Laomoko ide-ide i souna Yudasi i rara au rahanga Rara Manoto. Nuhaoki i sou iti hadua tauna hangko i wanua Tarsus au rahanga Saulu. Tauna iti ide-ide tangana mekakae, 12 hai i lalu pampetudungiaNgku iria, naitako lao nupombelambia hai nupetobo bona meita hulemi.”
13 Nahanai Ananias, “Io, Pue. Agaiana, bosa tauna mololita kana i babehiana Saulu iti. Ia rumihi pampopeahi-ahina tauna au mepoinalai Irio i wanua Yerusale. 14 Ia hawe inde, lawi iria ara sura kuasa hangko i kapala tadulako mpenomba bona mohakahe ope-ope tauna au mepoinalai Irio Pue.”
15 Agaiana, Nauli mbuli Pue Yesu i Ananias, “Hangangaa laoko! Lawi Saulu iti, Kupileimi mewali topobagoNgku. Ia ina mopahawe hangaNgku i to Yahudi hai i tauna ntanina hawe-hawe wori i datu. 16 Hai ina Kutudungia wori hinangka kapari au hangangaa nahalea anti pobagona Iriko.”
17 Mewali, lao mpuumi Ananias i sou au natunggai Pue Yesu inona, hai moonami taiena i Saulu, nauli, “Saulu, halalungku! Pue Yesu au nuita i rara i tempomu mai inde, Iami au motuduna mai mosondakiko bona meita huleko hai bona nakuasaiko Inao Malelaha.”18 I tempo iti peawomi, ara au nodo ruke manawo hangko i matana Saulu, hai unga pea meita, pane meangkami hai rariumi.19 Roo nodo, maandemi, hai maroho hulemi watana.
Saulu mepaturo i Damsik hai i Yerusale
Bahangkia alona kamahaena, Saulu maida i wanua Damsik hihimbela hai topepoinalai i Yesu.
20 I wanua Damsik, ia lao i sou-sou penombaa. Inditi mopahawemi bambari kana i Yesu iami Anana Pue Ala.21 Tingkara mpuuhe tauna au mohadi lolitana Saulu, rauli, “Noumbari dide? Hangkoia ia mopapate tauna au mepoinalaihe i Yesu i Yerusale. Hai tunggaiana mai inde bona mohaka worihe tauna inde hai naantihe i kapala-kapala tadulako mpenomba i Yerusale.”22 Agaiana kamaroho-rohoari Saulu mepaturo, ido hai rapowuli to Yahudi i Damsik, lawi ope-ope paturona iti mopakanoto kaYesuna Datu Topehompo.
23 Bahangkia alona hangko inditi, mogombomohe to Yahudi bona mopapate Saulu. 24 Tunggaianda ina mokampaihe ope-ope baba bente wanua, maroa mabaa maroa kaindi bona ane moliu Saulu, ina rapapate. Agaiana kewari i Saulu apa tunggaianda iti.
25 Ido hai hambela tempo i tanga kaindi, bahangkiahe rangana, laohe moala Saulu raanti i bente wanua au motoleliki Damsik. Inditi raulumi Saulu i lalu hambua karanji hangko i wongko bente wanua toa i tampo, liliu melangka.
26 Hawemi i Yerusale, napeinao mpuu Saulu mohimada hai tauna au mepoinalai i Yesu, agaiana tauna iti langahe iria, lawi bara manihe mampoinalai peulana mpuumi i Yesu. 27 Agaiana laomi Baranaba mampohimada Saulu, hai naporangai lao i suronahe Pue Yesu. Baranaba motuntuahe noumba Saulu moita Pue Yesu i polumaona lao i wanua Damsik, hai noumba Pue mololita iria. Napahawea worihe kapebaina Saulu mopahawe bambari kana i Pue Yesu i Damsik. 28 Mewali, maidami Saulu inditi hai halalu hampepepoinalaina iamohe surona Pue Yesu. Hihimbelahe mopahawe bambari kana Pue Yesu i humalele Yerusale hai bara ara kalangana. 29 Ia mololita hai mampombehehea to Yahudi au mobasa Yunanihe. Ido hai to Yahudi iti, rapeinao mopapate Saulu. 30 Mewali, karaisana halalu hampepepoinalaina tunggaianda tauna iti, ia raporangaimi hawe i wanua Kaisarea. Hangko i Kaisarea, rapopeangkami lao i wanua Tarsus.
31 Mewali i tempo iti, tauna au mepoinalai i Pue Yesu barapohe rapopeahi-ahi i tampo Yudea, Galilea hai Samaria. Tetambaimi topepoinalai i Yesu, hai kamaroho-rohoami pepoinalainda, lawi mengkoru mpuuhe i Pue Ala, hai Inao Malelaha mopakaroho lalunda.
Peturu mopakaoha Eneas
32 I tempo au himbela, lumaomi Peturu iumba-umba pea mosondaki topepoinalai i Pue Yesu. I polumaona iti, ia mehupe i wanua Lida. 33 Inditi ia molambi hadua tobalilo, hangana Eneas. Eneas iti, ualumi parena palu, barapi mearo-aro hangko i paturuana. 34 Nauli Peturu, “Eneas, Yesu Kerisitu mopakaohako! Meangkamoko, hai nulolomi alemu.” Unga pea Eneas meangka. 35 Ope-ope tauna i wanua Lida hai i tampo Saron moita kamaohanami Eneas, hai mepoinalaimohe i Pue Yesu.
Peturu mopatuwo hule Dorkas
36 Bara karao hangko i wanua Lida, ara hambua wanua au rahanga Yope. Inditi, ara hadua towawine au mepoinalai i Yesu, rahanga Tabita. (I lalu basa Yunani hangana Dorkas, lempona lagiwa.) Tauna iti maroa babehiana, lawi ia motulungi liliuhe tauna au meahi-ahi. 37 I tempo iti, ia mahai liliu mate. Roo radoi, rapowatami i lincu au i wongko. 38 Lawi wanua Yope bara karao hangko i wanua Lida, ido hai topepoinalai i Yope mohadihe kaarana Peturu i wanua Lida. Ratudumi rodua tauna lao i Peturu merapi bona hoholiga mai i Yope. 39 Mewali, meangka mpuumi Peturu lao hihimbela hai ihira. Kahawenda i Yope, liliu raanti lao i karapowataana Dorkas. Ope-ope tobemba au towawine meangkahe motoleliki Peturu. Moteriamohe hai ratudungiami Peturu badu hai hampi au nadauahe Dorkas i tempona mani tuwo. 40 Agaiana ope-ope tauna au ara i lincu iti napopelohohe Peturu, hai molingkudumi mekakae. Roo mekakae, melindomi i tomate iti, hai nauli, “Tabita, mearomoko!” Unga pea tebungkahi matana. Kamoitana Peturu, liliu mohuda. 41 Nakingkimi Peturu taiena hai napopeangka. Roo indo, nakakio hulemohe ope-ope tauna au mepoinalai i Yesu hai tobemba iti, nauliangaahe, “Idemi halalumi, ia tuwo hulemi.” 42 Au mewali iti rapololita i humalele wanua Yope, alana bosa tauna mepoinalai i Pue Yesu. 43 Roo indo, Peturu maida i Yope bahangkia alona kamahaena. Ia maida i souna Simo, hadua topobabehi parewa au hangko i koli.