Suro 1

Tuntukana Pobagonda

Surona Pue Yesu

1 Teopilu au kubila: i lalu surangku au nguru-nguruna, kuukimi ope-ope au nababehi Yesu hai hinangka pepaturoNa, mepongka i pepongkana pobagoNa, 2-3 duuna hawe i alo pengkaoreNa lao i suruga. Karoona rapapate hai tuwo hule, Yesu mopatongawa wataNa i suroNa. I lalu iba pulona alona, bosa belana mampetudungia wataNa bona tongawa katuwo huleNami. I tempo iti, ihira ara hihimbela hai Ia, hai Napahaweahe kana i poparentana Pue Ala. Hangko damani mengkaore lao i suruga, Naweihe hawaNa hai kuasaNa Inao Malelaha i suroNa au Napileimi. 4 Hambela tempo, tangaNa hihimbela hai ihira, Nawei worihe hawa ide, Nauli, “Ineekau hampai padu hangko i Yerusale. Nipegia hampai inde duuna UmaNgku moweikau apa au Nadandi hai au Kuuliangaakau hangkoia. 5 Lawi Yohane meriu hai owai. Agaiana bahangkia mani alona, ikamu ina rariu hai Inao Malelaha.”

Yesu mengkaore lao i suruga

6 I tempona surona Yesu hihimbelahe hai Ia, mekunemohe, rauli, “Pue, ba i tempo idemi Nuaro hule poparentanda to Isaraeli, ba bamani?”

7 Nahanai Yesu, “UmaNgku pea au mopakanoto ba impira ina mewali ope-ope tunggaiaNa au Nababehi hai kuasaNa. Bara paraluu niisa ikamu.8 Agaiana ina nilambi kuasa ane mendaulu mai Inao Malelaha irikamu. Hai ikamu, ina mewalikau sabiNgku i Yerusale, i humalele tampo Yudea hai Samaria, hawe-hawe i humalele dunia.”

9 Karoona mololita nodo, teangkami Yesu lao i suruga. Rapengoami duuna barapi raita lawi nabalungkuhi gawu.

10 Tanganda mani mengoa mototoki pengkaoreNa, unga peahe moita rodua tobalilo au mehampi bula, meangka i olonda.

11 Rauli tauna au rodua iti, “Ee to Galilea! Moapari hai mengoa liliukau? Yesu au niita teangka lao i suruga ina mai hule hangko i suruga nodo au niita inona.”

Pahuruna Yudasi

12 Roo indo, mesulemohe topeguruNa hangko i Bulu Saitun lao i Yerusale. Bulu Saitun iti, hakilo kakaraona hangko i Yerusale. 13 Kahawenda i Yerusale, liliuhe lao i sou paidaanda, mengkahehe i lincu au i wongko. Suronahe Pue Yesu iti iami: Peturu, Yohane, Yakobu hai Andaria; Pilipu hai Tomas; Bartolomeus hai Matiu; Yakobu anana Alfeus, Simo to Selot hai Yudasi anana Yakobu. 14 Hampepekiri liliuhe, moteruhuhe mekakae sambela. Inditi ara wori hihimbela hai ihira, bahangkiahe towawine, tepesua Maria inana Yesu. Inditi ara worihe halaluna Yesu.

15 Hambela tempo, tauna au teruhu ba aratohe pae hangatu rompulo. I tempo iti, meangkami Peturu mololita i olonda halalu hampepepoinalaina, nauli, 16 “Halalu-halalu, apa au teuki i lalu Sura Malelaha hangangaa mewali. Hangkoia ara lolitana Inao Malelaha au napahawe Datu Daudi kana i Yudasi au moanti tauna mohaka Yesu. 17 Yudasi iti, napopewalimi Pue Yesu topeguruNa, hai ia mobago hihimbela hai ikami.”

18 (Yudasi iti au moholo tampo au napotalumba hai doi hurungina babehiana au kadake. Inditimi, ia manawo hai mate, pane mabeto taina hai mabubu ope-ope ihi laluna. 19 Ope-ope to Yerusale moisa apa au mewali iti. Ido hai tampo iti rahanga Hakal-Dama. I lalu basa Aram, basanda to Yahudi tempo iti, lempona: ‘Tampo Wahe’.)

20 Napaliliu Peturu lolitana, nauli, “I lalu sura Petoia, teuki node:

‘Pogiangaamide paidaana boa.

Inee ara hadua au mampaidai.’

Hai ara wori au teuki node:

‘Agina pohudaana naala tauna ntanina.’ ”

21-22 Hangko inditi, napaliliu Peturu lolitana, nauli, “Halalu-halalu, ido hai hangangaa ara hadua ranganta au tapilei bona ia hai ikita hihimbelake mewali sabi kana i katuwona hule Pue Yesu. Tauna au tapilei iti, hangangaa hadua au biasami hihimbela hai ikita i tempona Pue Yesu ara i olonta, mepongka hangko i periuna Yohane hawe i pengkaorena Amputa lao i suruga.”

23 Hangko inditi, ara rodua tobalilo au ratudungiahe. Hangana au hadua, Yusupu au rauli Barsabas (ia iti rahanga wori Yustus), hai hadua au rahanga Matias. 24-25 Roo indo, mekakaemohe, rauli, “Pue, Nuisa ope-ope lalunda tauna. Yudasi, au mewali suroMu hangkoia, ide-ide manawomi, hai molambimi hurungina hintoto hai babehiana. Ido hai kiperapi, Nutudungia wongkamia kahemana hangko i tauna au rodua ide au Nupilei amimi mopahuru Yudasi.” 26 Roomohe mekakae, motendemohe dadu hai au kana dadu, iami Matias. Ia raangka mewali surona Pue Yesu bona handahe hampulo hai rodua nodo au nguru-nguruna.