10
1 Halalungku hampepepoinalai! Kupeinao mpuu bona to Yahudi tehoremahe hangko i huku dosanda. Ido hai kupekakaea liliuhe i Pue Ala. 2 Kuisa kamarohona poulanda ada penomba i Pue Ala lawi kusabikimi. Agaiana barahe moisa rara au manoto au napasilolonga Pue Ala. 3 Barahe mengkoru i Kerisitu bona mewalihe manoto i peitana Pue Ala. Raunde mpuu moula raranda haduduanda, mampeinaohe mopakanoto watanda i poulanda Aturana Musa. 4 Katouana Kerisitu mopabukeimi Atura iti bona Napakanotoke i peitana Pue Ala anti pepoinalainta Iria.Hema-hema au mepoinalai i Yesu, tehoremahe hangko i huku dosanda
5 Hangkoia ara lolitana nabi Musa au manguli node:
“Hema pea au mampeinao mewali manoto
anti peulanda i Aturana Pue Ala
molambihe katuwo maroa
asala mampeulaihe ope-ope Atura iti.”*
6-7 Agaiana ara wori lolitana Musa au manguli: ikita mewali manoto i peitana Pue Ala anti pepoinalainta. Nauli node,
“Inee nuuli i lalumu:
‘Hema au ina mengkahe lao i suruga?
Hema au ina mendaulu lao i paidaa tomate?’ ”
Lawi barake paraluu mengkahe i suruga mohaoki katuwo maroa, lawi Kerisitu mendaulumi mai irikita hai bara worike paraluu mendaulu i paidaa tomate mohaoki katuwo maroa, lawi Kerisitu tuwo hulemi hangko i kapate.
8 Nauli mbuli Musa node,
“Ngkorana Pue hungku ntepuu irikamu.
Ngkora iti peisa nuhowara hai nupailalu.”*
Itimi ngkora au kipahawe i ope-ope tauna iti, iami bambari pepoinalai. 9 Ane nipangaku i lolitami, “Yesu iami Pue,” hai ane nipoinalai i lalumi Pue Ala mopatuwo hule Yesu hangko i kapate, batena ina tehoremakau hangko i huku dosami. 10 Anti pepoinalainta i Yesu hangko i lalunta, ido hai Naimbamoke Pue Ala manoto i peitaNa. Hai anti katapangakunami Yesu i lolitanta, ido hai tehoremamoke hangko i huku dosanta. 11 I lalu Sura Malelaha, ara teuki node:
“Hema pea au mepoinalai Iria,
peharunganda ina tepabukei.”
12 Ngkora iti batena kanahe ope-ope tauna, lawi bara ara posisalana to Yahudi hai tauna ntanina. Hadua pea Ampunda ope-ope tauna iami Pue Ala, hai mahile ahiNa i ope-ope tauna au meraroa Iria. 13 Lawi i lalu Sura Malelaha, teuki node:
“Hema pea au meraroa i Pue,
batena tehoremahe hangko i huku dosanda.”*
14 Agaiana noumba kapeisanda meraroa Iria ane bara manihe mepoinalai Iria? Noumbami kamepoinalainda ane bara manihe mohadi bambri kana Iria? Noumba karahadina ane bara mani ara au mopahaweahe. 15 Hai noumbami kapeiasanda mobambari kana Iria ane barahe ratudu? Nodo au teuki i lalu Sura Malelaha node:
“Maroa mpuu kahawenda tauna au mopahawe bambari maroa!”*
16 Arami tauna au ratudu moanti bambari maroa, agaiana barahe ope-ope tauna mampoinalai bambari maroa iti. Ara lolitana nabi Yesaya hangkoia au manguli,
“Pue, arahe pae au mepoinalai i bambari au kiantiahe?”*
17 Mewali, hangangaa mohadihe hampai bambari maroa, hangko peisarihe mepoinalai. Hai bambari maroa iti iami bambari kana i Kerisitu.
18 Mewali, inee tapehangu bambari maroa iti bara mani rahadi to Isaraeli. Manoto rahadimi! I lalu Sura Malelaha teuki node:
“Bambari iti tehawukami i humalele dunia,
hai ngkora iti rapahawemi i ope-ope tauna iumba pea kaaranda.”*
19 Inee wori tapehangu to Isaraeli barahe moisa tunggaiana Pue Ala. Raisami! Lawi arami lolitana Pue Ala au napahawe nabi Musa hangkoia node:
“Ikamu to Isaraeli,
ina Kupamahinakau
moita ahiNgku
i tauna au barahe to Isaraeli.
Ina kupahumpuinaomi
moita pekadipuraNgku
i tauna au baraNa raisa hangkoia.”*
20 Hai bara langa-langa Yesaya mopahawe Ngkorana Pue Ala node:
Nauli Pue Ala,
“Tauna au baraNa rahaoki,
ihirari au molambiNa.
Hai tauna au baraNa rakakio,
Kupopaisaamohe kahemaNgku.”*
21 Agaiana kana i to Isaraeli, Pue Ala manguli node,
“Kehapiri hangaloa Kuona taieNgku modokohe,
batena rasapuakaNa hai matua liliu lalunda.”*