Arahe to Isaraeli au napentara Pue Ala bona mewali kiraNa; au ntanina matua lalunda
11
1 Mewali kupekune, natendemohe pae Pue Ala to Isaraeli au mewali taunaNa hangkoia? Manoto bara. Lawi ide iko, to Isaraeli worina, pemuleanana Burahima hangko i tina Benami. 2 Pue Ala bara motende tauna au Napileimi hangko i nguru-nguruna. Nikatuinao tuntukana nabi Elia au teuki i lalu Sura Malelaha. Elia mosalai to Isaraeli i Pue Ala, nauli,3 “Pue, mopapatemohe nabiMu,
hai mopakarugi worihe watu pohuwea popenombaki Irio.
Batena pearai iko au tuwo,
agaiana rahaoki pea worina rapapate!”*
4 Nahanai Pue Ala, “Inee nupehangu oio pearai au moulaNa. Ara manihe pitu sabuna tauna au Kupentara mewali kiraNgku au bara manihe hambela menomba i anitu Baal.” 5 Apa au mewali i tempona nabi Elia hangkoia, nodo wori au mewali i tempo ide, kabosanda to Isaraeli barahe mepoinalai i Yesu, agaiana ara manihe hanggaa au mepoinalai, lawi ihira iti napileimohe Pue Ala mewali kiraNa anti kabulana laluNa. 6 Napileihe bara anti kamaroana babehianda. Lawi ane rapana, Napileihe bona mohurungi babehianda au maroa, lempona kabulana laluna Pue Ala barapi buke.
7 Mewali taisa, to Isaraeli mampeinaohe manoto i peitana Pue Ala moula raranda haduduanda, agaiana bara rahumba. Arahe bahangkia au molambi kanoto lawi Napileimohe Pue Ala. Au ntanina mengkabatuhe i pekakiona Pue, 8 nodo au teuki i lalu Sura Malelaha,
“Napatuhumi Pue Ala lalunda.
Matanda Natuko
datihe moita rara au manoto.
Talinganda nasisingi
datihe mohadi bambari au tou
duuna ide-ide.”*
9 Nodo wori, ara lolitana Datu Daudi hangkoia kana i hangka to Yahudina au mewali iwalina. Nauli Daudi, Kuperapi bona paande posusa
au rapasilolonga,
mewali nodo hea
hai tarobo au morugii watanda.
10 Pogiangaa matanda mewali bilo
datihe meita
hai Nupabungku-bungkuhe i hae-haena.*
Bosa to Yahudi manawo anti pesapuakanda, hai bosa tauna au barahe to Yahudi molambi katuwo maroa anti pepoinalainda
11 Mewali, bosahe to Yahudi tehube lawi barahe mepoinalai. Agaiana inee tapehangu anti katehubenda iti, manawohe hawe i hae-haena. Bara iti tunggaiana Pue Ala. Anti peewanda to Yahudi, tepakahe tauna au barahe to Yahudi mepoinalai i Pue Yesu duuna tehoremahe hangko i huku dosanda. TunggaiaNa bona i kahopoana, to Yahudi ina mokahinaihe tauna au barahe to Yahudi duuna rapeinao moula pandirinda. 12 Anti pesapuakanda to Yahudi hai kadanda mepoinalai i aturana Pue Ala, tauna au barahe to Yahudi molambihe pewati hangko i Pue Ala. Mewali, apa mani ane to Yahudi menoso hai mesule hulehe i Pue Ala, mahile mpuu pewati au ina rahumba tauna au barahe to Yahudi iti hangko i Pue Ala.
13 Au natunggai lolitangku iami halalungku au barakau to Yahudi. Ide iko, suronana Pue Yesu au Natudu mobambari Ngkora Marasa irikamu au barakau to Yahudi. Bagongku ide kuwoli liliu i tanoanangku. 14 Hangko i pobagongku ide, kuharunga kaina aranda hangka to Yahudingku moita tauna au barahe to Yahudi mepoinalai i Pue Yesu duuna mahina lalunda hai mampeinao worihe mepoinalai Iria bona tehoremahe hangko i dosanda. 15 Lawi i kanatendenda Pue Ala to Yahudi, tebungkahimi rara i ope-ope tauna i dunia bona mohintuwuhe hai Pue Ala anti pepoinalainda. Mewali, ina meliu porasina ihi dunia ane Pue Ala modoko hulehe to Yahudi. Iti himbela pea nodo tomate au tuwo hule.
Ngkora pandiri kana i kau saitun
16 Ane moantike hangkira hangko i wua tuda-tudanta, tahuhu i Pue Ala mewali kabula lalu, lempona ope-ope tuda-tudanta Pue Ala ampuna. Ane uakana Pue Ala ampuna, daana wori Pue Ala ampuna. 17 To Yahudi peisahe rapandiri nodo hangkau kau saitun au rakadipura. Daana au hantanga rahapeki, hai i pohapekiana iti, Pue Ala mampopentaka daa kau saitun au bara tekadipura bona katuwona daa iti marudu hangko i uaka kau au rakadipura. Daa au Napopentaka iti, iami ikamu au barakau to Yahudi.a
18 Agaiana halalu, ineekau mampemahile. Ineekau mokakabosai to Yahudi au rapandiri nodo daa au rahapeki iti. Nikatuinao: ikamu molambi pewati hangko i uaka kau au rakadipura, barari kau iti au molambi pewati hangko irikamu! 19 Manoto ina niuli, “Tou, ara daa au rahapeki hai ratende bona peisangkai rapopentaka i karahipekianda.” 20 Tou mpuu halalu. Agaiana nikatuinao ratendehe lawi barahe mepoinalai. Ikamu rapatuwo, lawi mepoinalaikau. Ineekau mampemahile, aginami mengkaiwoikau hai mainga-ingakau, lawi ane mesapuakakau, batemi Nahapeki. 21 Lawi ane Pue Ala motendemohe to Yahudi au nodomohe daangkau au tuwo i watana hangko i nguru-nguruna, apa mani ikamu au hangko rapopentaka topeakau. 22 Mewali taisa mpuu kamaahina Pue Ala hai taisa wori kamanotona pehukuNa. Manotomi kaNahukunda tauna au mesapuaka, agaiana maahi irikamu ane tuwo liliukau i ahiNa iti. Ane bara, ina Natende worikau!
23 Ane to Yahudi au mesapuaka iti menosohe hangko i pesapuakanda, ihira ina napopentaka hule Pue Ala, lawi makuasa mopataka hulehe i wata kau. 24 Lawi ane ikamu au rapandiri nodo daa hangko i kau au bara rakadipura peisa rapopentaka i wata kau au rakadipura, apa mani daa hangko i kau au rakadipura peisa rapopentaka hule i karahapekianda.
Kamaahina Pue Ala i ope-ope tauna
25 Halalungku hampepepoinalai! Kupeinao mouliangaakau apa tunggaiana Pue Ala au bara raisa tauna hangkoia. Kuuliangaakau ide bona ineekau mampemahile. Bona niisa: ide-ide hanggaa to Yahudi matua lalunda agaiana iti bara mahae, duuna handa kabosanda tauna au barahe to Yahudi au mepoinalai i Yesu hintoto hai tunggaiana Pue Ala. 26 Nodomi rarana to Yahudi ina tehoremahe hangko i huku dosanda, bona tepabukei lolitana Pue Ala au teuki i lalu Sura Malelaha:
“Hambela tempo,
Datu Topehompo ina mesuwu hangko i Bulu Sion,
hai mopakarao ope-ope dake hangko i pemuleana Yako
bona malelaha tuwonda.*
27 Itimi dandiKu irihira.
Hai i tempo iti, ina Kuampungi dosanda.”*
28 Ide-ide to Yahudi mampoiwalihe Pue Ala, lawi barahe mampoinalai Ngkora Marasa. Hangko inditi, morasikau au bara to Yahudi. Agaiana nauri nodo, to Yahudi iti batenda napokaahi liliu Pue Ala, lawi Napileimohe moula dandiNa i toiorunda. 29 Lawi ane Pue Ala mopilei hai mowati tauna, pewatiNa iti bara ina Nadii hule. 30 Hangkoia barakau mengkoru i Pue Ala. Agaiana ide-ide nihumbami ahina Pue Ala anti pesapuakanda to Yahudi. 31 Nodo worihe to Yahudi. Ide-ide mesapuakahe bona ahina Pue Ala hawe irikamu. Agaiana ihira ina molambi wori ahina Pue Ala nodo ikamu. 32 Lawi Pue Ala mopalikangaamohe ope-ope tauna madosa hai mesapuaka bona ara raraNa mopatongawa ahiNa i ope-ope tauna.
Petoia i Pue Ala
33 Maroa mpuu Pue Ala! Kaladu mpuu pekiriNa hai manoto laluNa! Hema au peisa moparesa tunggaiaNa? Hema au peisa moisa ope-ope raraNa?
34 “Hema au moisa pekirina Pue Ala?
Hema au peisa mopaturo Pue Ala?”*
35 “Hema pae au peisa mowei ba apa-apa i Pue Ala?
Ia bara moinda i hema pea!”*
36 Lawi ope-ope au ara, napopewali hai nakuasai Pue Ala bona Ia pea au rapomahile. Tetoiami Pue Ala hawe i hae-haena! Amin!