To Isaraeli hai Ngkora Marasa
(9:1–11:36)
Masusa laluna Paulu, lawi kabosanda to Yahudi barahe mepoinalai i Yesu
9
1 Apa au kuuli ide hangko i lalungku mpuu. Barana modongko. Kerisitu moisa lalungku. Hai notona lalungku ide nasabiki Inao Malelaha. 2 Mapari mpuu pehadingku hai masusa mpuu lalungku, lawi hangka to Yahudingku barahe mepoinalai i Yesu. 3 Ane kepeisa, aginami iko au rapaharara hai ragaakina hangko i Kerisitu, asala halalungku to Yahudi rakabahahe hangko i huku dosanda. 4 Hangkoia to Isaraeli molambihe ngkaia pewati hangko i Pue Ala, lawi napileimohe Pue Ala hai Napopewalimohe nodo anaNa haduduaNa. Pue Ala mopatongawaahe kuasaNa, hai anti podandiNa i to Yahudi hangkoia, ara pohintuwunda hai Ia. Ia moweihe AturaNa hai Napaturoahe ada mpenomba, hai Ngkaia mani dandina Pue Ala au Naweihe. 5 Ihira iamohe pemuleanda toiorunda au napileimohe Pue Ala hangkoia. Hai Kerisitu au rapoanaka nodo manusia mesupa wori hangko i pemuleanda. KuasaNa melumbu hangko i hinangkana; Iami Pue Ala au hintoto tatoia hawe i hae-haena. Amin!Pemuleana Burahima barahe ope napilei Pue Ala molambi pewati
6 Ide-ide, kabosanda to Isaraeli, barahe taunana Pue Ala. Agaiana ineeri tapehangu dandina Pue Ala i to Isaraeli bara tepabukei. Bara tou lolita iti! Lawi i olonda pemuleanda to Isaraeli au napilei Pue Ala hangkoia, barahe ope mewali taunaNa. 7 Hai i olonda pemuleana Burahima, barahe ope naimba Pue Ala anana Burahima. Lawi Pue Ala modandimi i Burahima, Nauli, “Batena pea pemuleana Isaki au ina raimba pemuleamu.”* 8 Lempona bara ope-ope pemuleana Burahima au mewali anana Pue Ala, batena pea au rapoanaka moula dandina Pue Ala. 9 Anana Burahima au rahanga Isaki rapoanaka moula dandina Pue Ala i Burahima. Pue Ala mouliangaa Burahima node, “Ina maiNa i tempo au tepakanoto, hai Sara towawinemu ina moana hadua tobalilo.”
10 Hai bara pea iti, hangko i tuntukana Esau hai Yako, taisa noumba Pue Ala mopilei tauna mewali kiraNa. Esau hai Yako iti, toporopa ananahe Ribeka. Umanda Isaki, toiorunta. 11 Hangko damanihe rodua anangkoi iti mesupa hai raisa mobabehi apa pea au maroa ba au kadake, Napileimohe Pue Ala dati rauli Napileihe anti babehianda agaiana Napileihe moula peundeaNa haduduaNa. 12 Ido hai hangko damani Ribeka moana, Nauliangaami Pue Ala node, “Anamu au towutu ina mengkoru i adina.”* 13 I lalu Sura Malelaha, tabasa lolitana Pue Ala au teuki node, “Yako hai pemuleana, ihirari au Kupilei. Esau hai pemuleana, barahe Kupilei.”*
Pue Ala au mobotusi hema au ina molambi pewati, hai pobotusiNa iti batena manoto
14 Agaiana inee tapehangu Pue Ala bara manoto ane Ia mopilei au hadua hai mosapuaka au hadua! Bara tou lolita iti! 15 Nikatuinao lolitana Pue Ala i nabi Musa hangkoia au manguli,
“Ikomi au mobotusi
hema au ina Kutudungia kamaahina laluNgku
hai kamaroana laluNgku.”
16 Mewali, ane Pue Ala mampeinao motudungia ahiNa i hadua tauna, bara peundeana manusia au mopakanoto iti, bara wori rapakanoto anti babehiana manusia. Pue Ala peari au mopakanoto. 17 Nikatuinao wori lolitana Pue Ala i Pirao, datunda to Masiri hangkoia, au manguli, “Kupopewaliko datu agaiana hampaka pea tunggaiaKu iami bona hangko i pesapuakamu, Kupatongawa kuasaNgku, alana hangaNgku rapomahile i humalele dunia.” 18 Mewali, taisa mpuu: Pue Ala motudungia ahiNa i hadua tauna, hai mopamatua laluna tohaduana. Ia mobabehi nodo moula peundeaNa haduduaNa.
19 Mewali, ina ara tauna au manguli, “Ane nodo, moapari hai Pue Ala mosalai babehianta au kadake, lawi babehianta iti moulato popakanotoNa haduduaNa?” 20 Inee tauli nodo, halalu! Hemake pae manusia hai pebaike mosalai Pue Ala? Hintoto pae ane haogu kori mouliangaa topobabehi, “Moapari hai nubabehina node?” 21 Topobabehi kori iti peisa moula peundeana haduduana. Hangko i hangkamumua tampo polo, ia peisa mobabehi roogu kori; haogu au nabati hai haogu au napake alo-alona.
22 Nodo wori Pue Ala makuasa mobabehi apa peundeaNa irikita tauna. Katouana, ara tauna kadake au hintoto mpuu napokarumpu Pue Ala bona tongawa kuasaNa. Hintoto mpuuhe rahuku hawe i hae-haena, agaiana nauri nodo, sabara mani Pue Ala i tauna iti. 23 Anti kasabaraNa, ido hai tongawa kamahilena tuwoNa i tauna au Napokaahi hai au Napatani amihe molambi kiranda i lalu peawana tuwoNa. 24 Ikita idemi au Napilei molambi pewati iti, hai bara pea to Yahudi, agaiana ara wori au bara to Yahudi.
25 I lalu sura nabi Hosea, Pue Ala manguli node,
“Tauna au barahe taunaNgku
hai au bara moisa ahiNgku,
ina Kukakiohe mewali taunaNgku
hai ina Kupopaitaahe ahiNgku.”*
26 “Hangkoia Pue Ala mouliangaahe tauna au ara i hambua tampo:
‘Barakau kiraNgku.’
Agaiana hambela tempo,
Pue Ala au tuwo ina mouliangaahe,
‘AnaNgkumokau!’ ”*
27 Hai Yesaya mololita kana i to Yahudi node:
“Nauri to Isaraeli kabosanda
nodo kangkaiana wungi i wiwi ntahi.
Agaiana kehapiri nodo, haodi peahe au ina molambi katuwo maroa.
28 Lawi barapi mahae
Pue ina mobotusi kara-karanda
ope-ope tauna i dunia.”*
29 Ara wori lolita au nauki nabi Yesaya node:
“Ane Pue Ala au makuasa bara mampentara bahangkia pemulea,
ketuna mpuumoke,
nodo ampu boea Sodomo hai Gomora hangkoia.”*
To Yahudi barahe mau mepoinalai i Yesu, ido hai barahe mewali kirana Pue Ala
30 Mewali node: tauna au barahe to Yahudi barahe mohaoki rara bona mewalihe manoto i peitana Pue Ala. Agaiana arahe hantanga au mewali manoto i peitaNa. Pue Ala mopakanotohe i peitaNa anti pepoinalainda. 31 Agaiana to Isaraeli, mahaemohe mopari-pari bona mewalihe manoto i peitana Pue Ala i pampeulainda Aturana Musa, agaiana bara rahumba au rahaoki iti lawi bara rabuku mampeulai atura iti. 32 Noumba hai nodori? Lawi meharunga peahe i babehianda haduduanda, barahe meharunga i Pue Ala. Tehubehe i watu katehubea; lempona, barahe mepoinalai i Datu Topehompo. 33 Katehubeanda iti tepahawe i lalu Sura Malelaha hangkoia. Datu Topehompo rapandiri nodo haogu watu. Nodo au teuki i Sura malelaha node:
“Peita:
Kuwoli haogu watu i Bulu Sion,
Bosa tauna tehube i watu iti,
alanda tepalumba.
Agaiana hema-hema au mepoinalai Iria,
peharunganda ina tepabukei.”*