I lewuto Malta
28
1 Hawemongkai i lorena, hangko kiisari lewuto iti rahanga Malta. 2 Maroa mpuu lalunda ampu boea irikami. Radoko maroangkai, rapatuwoangkai api kipamindui, lawi mepongkami keuda hai makuli. 3 Laomi Paulu mogulu daa-daangkau hai nawoli i tumu api. Kanawolina peami, unga pea mai mesuwu hambaa ile hangko i lalu daa-daangkau, lawi mamu nahonga api. Ile iti liliu motilo taiena Paulu. 4 Karaitana ampu boea ile iti mengkalitoe i taiena Paulu, raulimi, “Manoto tauna iti topepapate! Peita, nauri bara molambi rugi i tahi, agaiana Anitu Topebotusi bara mampogiangaa tuwo!” 5 Agaiana barato napomahai Paulu. Ile iti nawalentaha pea i lalu api. 6 Rauli ampu boea iti, mawae pea deade taiena hai unga pea madungka mate. Mahaemi rapepegia, agaiana barato moapa-apa. Mewali tebalikimi pekirinda, rauli, “Ia hadua anitu!”7 Bara karao hangko inditi, ara halimbo bonde, bondena Publius, gubernur i lewuto iti. Anti kamaroana laluna, nakakiomongkai lao i souna, hai napotorarengkai i lalu talu alona.
Hangko i Malta lao i Roma
11 Handamongkai talu wulana i lewuto Malta, meangka mbulimongkai mesawi i kapala tahi au hangko i Aleksandria. Kapala tahi iti mahaemi mengkaroo i lewuto iti mampegia kaliuna tempo makuli. Hangana kapala tahi iti, Towalia Moropa. 12 Mehupemongkai i wanua Sirakusa, hai maidangkai talu alona inditi. 13 Hangko indo, kipaliliumi polumaongki menana i wiwi ntahi hawe i wanua Regium. Kahalona, himburu au maroa mewui hangko i Lau, hai i karongalona hawemongkai i wanua Putioli i tampo Italia. 14 Inditi mampohidupaangkai bahangkia halalu hampepepoinalaingki. Rakakiongkai lao i sounda hai rapotorarengkai i lalu haminggu. Hangko inditi, molumaomongkai lao i Roma. 15 I tanga rara maningkai, halalu hampepepoinalaingki au i Roma mohadihe kaina hawengki. Ido hai maimohe mepohidupaa i Pobalu-balua au rahanga Apius hai i Sou Pehupea Talu. I pohidupangki iti, Paulu motoiami Pue Ala, hai rapamatana laluna.
Paulu i Roma
16 Kahawengki i Roma, Paulu barapi ratarunggu. Ia rapaliu maida sadudua i sou, agaiana nakampai liliu hadua surodado.
17 Liumi talu alona, Paulu mokakio totosaenda to Yahudi bona mai rapohidupaa. Kahawenda, mololitami Paulu irihira nauli, “Halalu-halalu, barato wongkoia masala i hangka to Yahudinta hai bara worina moliungi adanda toiorunta. Agaiana nauri nodo, batengku rahaka i Yerusale hai rahuhuna i topoparenta to Roma. 18 Kara-karangku raparesa topoparenta to Roma, hai rapeinao pea mokabahana, lawi manotomi kadana ara salangku au hintotona rapapatea. 19 Agaiana arahe to Yahudi hangko i Yudea au moewa liliuna. Ido hai kuperapi bona raweina tempo mohawira kara-karangku i Datu Mahile Kaisar. Nauri nodo, bara ara au kusalaiahe halalunta to Yahudi.
21 Rahanai to Yahudi iti, rauli, “Bara ara sura au kihumba hangko i Yudea au mampololita kana irio. Hai bara wori ara hadua tauna hangko inditi au mai moanti bambari ba mampololita dakemu. 22 Kipeinao mohadi kana paturo au nupoinalai iti. Lawi kihadi iumba-umba pea tauna mosapuaka paturo au nupoinalai iti.”
23 Roo indo, rapakanotomi alo poteruhuanda hai Paulu. Hawe mpuumi alo au rapakanoto, bosa tauna teruhu i paidaana Paulu. Mepongka madondo hawe kalumba, napakanotoahe Paulu kana i poparentana Pue Ala, hai nabasaahe Aturana Musa hai Suranda Nabi-nabi, bona manoto irihira kahemana Yesu bona mepoinalaihe Iria. 24 Arahe au mampoinalai lolitana, hai ara worihe au bara mampoinalai. 25 Anti posisalana pelambianda, ido hai magaramohe hangko i poteruhuanda iti. Agaiana hangko damanihe mogaa-gaa, nauliangaahe Paulu node, “Hintoto mpuu apa au nauli Inao Malelaha au napahawe nabi Yesaya i toiorunta hangkoia, node: 26 Nauli Pue Ala:
‘Laohe nuuliangaa to Yahudi node:
Mehaditohe, agaiana bara raisa lempona.
Meitatohe, agaiana bara raisa apa au mewali.
27 Lawi tuhumi lalunda,
talinganda rasisingi, matanda rampidika.
Lawi lohehe mototoki hai matanda,
lohehe mohadi hai talinganda,
lohehe mopakanoto lalunda.
Kahopoana, barahe ina mesule Iriko,
hai barahe ina Kuwei katuwo maroa.’ ”*
28 Roo indo, nauli mbuli Paulu irihira, “Halalu bona niisa, ara Ngkora Marasa au mopakanoto rarana Pue Ala mohorema tauna hangko i huku dosanda. Ngkora Marasa iti rapahaweamohe tauna au bara to Yahudi. Ihirami au ina modoko bambari iti!” 29 [Karoona Paulu mololita nodo, padumohe to Yahudi hai mombehahanaihe.]