Paulu lao i Roma
27
1 Roo indo, rapakanotomi ina mosumombangkai lao i tampo Italia. Paulu hai bahangkia tauna ntanina au ratarunggu rahuhumi i Yulius, tadulakonda surodado to Roma au rapatokami mobago i Kaisar. 2 Kapala tahi au kipesawii iami kapala tahi mahile au hangko i wanua Adramitium au masilolongami monontohi bahangkia wanua au i wiwi ntahi i propinsi Asia. Meangka mpuumongkai hai hadua rangangki au meula irikami iami Aristarkus, au hangko i wanua Tesalonika i tampo Makedonia. 3 Kahalona, mehupengkai i wanua Sidon. Maroa mpuu laluna Yulius i Paulu, ido hai Paulu nawei katepaka mosondaki rangana i lalu wanua bona apa au naparaluu peisa rawei. 4 Hangko inditi, kipaliliumi polumaongki. Anti karumihina pewui himburu, ido hai menana peangkai lewuto Siprus ntanda i Mata alo datingkai narumpa ntepuu himburu. 5 Roo indo, mosumombamongkai i tahi au nalindo propinsi Kilikia hai propinsi Pampilia duungki hawe i wanua Mira i propinsi Likia. 6 I Mira, tadulakonda surodado molambi haogu kapala tahi au hangko i wanua Aleksandria au monontohi tampo Italia. Ido hai napopelimbangkai i kapala tahi iti.7 I lalu bahangkia alona, kapala tahingki maole mpuu polumaona, ido hai kebarangkai peisa mohungkuki wanua Knidus. Anti karumihina himburu, kapala tahingki menana pea i lewuto Kreta moliu i wuntu Salmone bona datingkai narumpa ntepuu himburu. 8 Mapari mpuu posumombaki menana lewuto Kreta iti. Kahopoana, hawemongkai i hambua paidaa au rahanga Sondaka Merae, au hungku i boea Lasea.
9 Anti kamahaena posumombaki, liumi alo mahile popuasaanda to Yahudi, hai ina hawe tempo makuli. I tempo iti, ope-ope kapala tahi mengkaroo lawi barapohe peisa mosumomba. Ido hai napopaingaahe Paulu, nauli, 10 “Halalu, moula pelambiaku, ina marugike ane tapaliliu polumaonta; ina marugi ntepuuke. Bara pea kapala tahi hai antiata au marugi, agaiana ikita ina mate worike.” 11 Agaiana tadulako surodado iti bara mampoinalai lolitana Paulu, lawi rumihi pampoinalaina lolitanda topoguli hai ampu kapala tahi. 12 Mewali, anti kadana maroa sondaka iti i tempo makuli, ido hai bosa tauna merapi bona kipaliliu posumombaki, bona hawengkai i wanua Feniks. Tunggaianda bona mampegiangkai kaliuna tempo makuli inditi. Feniks iti iami sondaka i Kreta au maroa rapengkaroongi i tempo makuli, lawi terero hangko i himburu.a
Himburu kebuu i tahi
13 I tempo iti, pewui himburu hangko i Lau maroa. Mewali, moula pelambianda topobago i kapala tahingki, peisangkai mopaliliu posumombaki. Ido hai pantio kapala tahib iti raoremi, hai molumaomi kapalangki menana i lewuto Kreta. 14 Bara mahae hangko indo, hawemi himburu kebuu hangko i lewuto iti. Himburu iti rahanga himburu Mata alo. 15 Anti kadana nabuku kapala tahi molindo himburu, ido hai kapala tahi iti kipogiangaa pearai napotio himburu. 16 Bara mahae hangko indo, kapalangki nawuimi himburu ntanda i Lau lewuto au kokoi au rahanga Kauda. I poliungki i lewuto iti, tererongkai haodi hangko i himburu. I tempo iti, kipari-parimi modii hambua duanga au kokoi au biasana rataka i taleu kapala tahi, au rahanga sekoci. 17 Duanga au kokoi iti, kiangkami i wongko kapala tahi. Roo indo, kapala tahingki rawewe hai koloro bona bara mapengka. Langamohe topobago i kapala tahi lawi rapekiri ina tehorengkai i kahehea tahi au hungku i tampo Libia. Ido hai hombana rapopendaulumi hai kapalangki rapogiangaami monanto-nanto.
18 Anti kanarumpaki angi, ido hai kahalona mepongkamohe motende antia kapala i tahi bona kapalangki mangaa. 19 Nodo wori kahalona, parewa kapala ratendemi i tahi. 20 Bahangkia alona, barangkai moita alo ba betue, hai angi bara maora. Mewali masusami lalungki, hai kipehangu ina marugimongkai.
21 Anti kadanapi naita inaonda maande, meangkami Paulu i olonda, nauliangaahe, “Halalu-halalu, ane kenipoinalai lolitangku bona ineeke padu hangko i Kreta, kebarake marugi node. 22 Agaiana ide-ide kuuliangaakau, nipakaroho lalumi! Barake ara hadua au ina mate. Batena kapala tahi ide au ina marugi. 23 Lawi inona kaindi, Pue Ala au kupenombai hai au mokadipurana, motudumi malaekaNa mai iriko. 24 Nauli malaeka iti node: ‘Paulu, ineeko langa. Lawi batemu ina lao molindo Datu Mahile Kaisar. Hai anti kamaahina Pue Ala irio, ope-ope tauna au hihimbelakau i lalu kapala tahi ina tehorema worihe.’ 25 Idomi hai hangangaa nipakaroho lalumi. Lawi kupoinalai mpuu pewalina apa au Nauliangaana Pue Ala. 26 Nauri nodo, ina tehoreke hampai i hambua lewuto.”
27 I wengi kahampulo hai iba alona, kapalangki napopotio himburu kebuu i tahi Adria. Laembengi iti, raisa topobago i kapala kadangkipi karao hangko i lore. 28 Ido hai moulumohe watu popehoka i tahi bona raisa kakaladuna. Kakaladuna iti, ba arato pae rompulo dupana. Roo indo, raulu mbuli alana raisa hampulo pearai hai lima dupana kakaladuna. 29 Rapokalanga topobago i kapala morumpangkai pae watu rangka. Ido hai raulumi iba mbuana pantio i owai i taleu bona kapalangki tetaha. Kiundemi polo mabaa. 30 Hangko inditi, topobago i kapala mampeinaohe melangka ngkandii hangko i kapala. Mengka-mengkahe mampopendaulu bahangkia pantio ntanda i lindo, mole mampopendaulurihe duanga kokoi. 31 Agaiana Paulu moita apa au rababehi iti, ido hai mouliangaa tadulako hai surodadonahe, “Ane topobago iti mopalehihe kapala tahi, bara mpuukau ina tuwo!” 32 Mewali surodado iti mobotukimi popeulu duanganda au kokoi, alana duanga iti manawo hai rapalikangaa maili.
33 Ina mewingkahami, nauliangaahe Paulu, “Hangangaa maandekau ope-ope! Hampulomi hai iba alona, mampepegia peakau apa au ina mewali irikamu. Mengkaohomokau barapokau maande-ande. 34 Ido hai kuuliangaakau, hangangaa maandekau hampai bona maroho buumi. Lawi baratokau ina moapa-apa.” 35 Karoona Paulu mololita nodo, moalami paande, hai mekakae i Pue Ala i lindonda ope-ope tauna. Paande iti nakira-kiraahe, hai ia haduduana mepongkami maande. 36 Karahadina tauna iti lolitana, maroho hulemi lalunda, pane maande worimohe. 37 Ope-ope tauna au ara i kapala tahi iti, kabosanda rongatu pitu pulona hai ini. 38 Karoonda maande, motendemohe pare antia kapala i tahi. Tunggaianda bona kapala tahi mangaa haodi.
Kapala tahi morumpa wungi
39 Mabaami, topobago i kapala tahi moitamohe lorena, agaiana bara raisa hangana. Moita worimohe suo tahi au bara mowatu-watu i wiwina. Ido hai ara tunggaianda bona ane peisa, mesorehe indo. 40 Ope-ope koloro popotoe pantio au motaha kapala tahi rabotukimi, hai pantio iti rapogiangaa i lalu tahi. Nodo wori, koloro au motaka kamudi kapala tahi rakakahimi bona kapala tahi iti peisa rapopolengko. Homba kapala au kokoi rabinihi bona manoto polumaongki lao i wiwina. 41 Agaiana morumparingkai wungi au humoa, hai lindo kapalangki tetaha inditi, alana barapi peisa mokale. Ntanda i taleuna marupu narumpa balumba au mahile.
42 Tempo iti, arami tunggaianda surodado mopapate ope-ope tauna au rataha bona datihe ara au monangu lao i lore hai melangka. 43 Agaiana nakontohe tadulakonda, lawi naunde bona Paulu inee rapopoapa. Ido hai motudumohe tauna au raisa monangu melumpa ioru i tahi hai monangu lao i lorena. 44 Roo indo, motudu worihe tauna au bara raisa monangu bona moalahe pata ba kapengka kapala rapotinanto lao i lorena. Ido hai hawe hahangkai i lorena.