Paulu mouli notona i Datu Agripa
26
1 Roo indo, nauli Agripa i Paulu, “Ide-ide raweimoko tempo mouli notomu.”Paulu moangka taiena, hai mepongkami mopahawe notona, nauli, 2 “Datu Agripa au kubila! Ioru kuuli, morasi mpuuna, lawi peisana mouli notongku i lindona Datu, mohanai ope-ope lolitanda to Yahudi iriko. 3 Apa mani lawi naisa mpuu Datu ada to Yahudi hai paturo au rapombehanaingi. Ido hai kuperapi wongkoia bona sabarako mampehadingi notongku.
4 Ope-ope to Yahudi moisa lolitakana katuwongku hungkaku mani mangura, lawi hangko koi-koipona maidamona i olonda hangka to Yahudingku i Yerusale. 5 Mahaemi raisa to Yahudi babehiangku. Ane raunde, peisahe mopatuntu lolitakana katuwongku. Ide iko tuwona moula paturonda toParisi au rumihi poulanda ope-ope ada agamanda to Yahudi. 6 Ido hai raparesana inde, anti peharungangku i dandina Pue Ala i toiorunta hangkoia. 7 Dandina iti rapoinalai wori ope-ope halalunta to Yahudi au hampulo hai rontina au menomba liliuhe i Pue Ala. Datu au kubila, hangko i peharungangku iti, ido hai rasalaina to Yahudi. 8 Hai ikamu halalungku to Yahudi, moapari pane bara nipoinalai kamakuasana Pue Ala mopatuwo hule tomate?
9 Hangkoia moewa worina kuasana Yesu to Nasare. 10 Hai iti kubabehi wori i Yerusale. I tempo iti, molambimona sura kuasa hangko i kapala-kapala tadulako mpenomba, hai bosa worihe to Sarani kutarunggu. Kupokana wori ane rahuku matehe. 11 Bosa belanda kupopeahi-ahi i lalu sou penombaa, hai kupari-parihe mosapuaka pepoinalainda i Yesu. Masodo mpuuna moitahe, ido hai hawena i boea-boea au karao mampopeahi-ahihe.”
Paulu mampololita kamewalina to Sarani
12 Napaliliumi Paulu mouli notona, nauli, “Datu au kubila, itimi tunggaiaku lao i wanua Damsik, lawi ratuduna hai raweina kuasa hangko i kapala-kapala tadulako mpenomba. 13 Agaiana tempoku molumao lao i Damsik, pualomi i tanga rara, unga peana moita pewangka hangko i langi au melumbu hangko i pewangka alo. Nawangkahina hai ope-opehe hampopolumaongku. 14 Madungkamongkai ope-ope hai kuhadimi hambua wotu au mololita iriko i lalu basanda to Yahudi, Nauliangaana: ‘Saulu, Saulu, moapa hai nupopeahi-ahiNa? Mapari mpuu lalumu, lawi moewa liliuko peniniNgku.’
15 Mekunena: ‘hemako, Pue?’
MehaNa, nauli, ‘Ikomi Yesu, au nupopeahi-ahi! 16 Meangkamoko! Kupatongawaako wataNgku, lawi ara tunggaiaKu irio: Kupileimoko mewali hawiNgku hai sabiNgku. Oio hangangaa mopahawe i tauna ntanina apa au nuitami i alo ide hai apa au Kupopaitaako i alo-alo au ina mai. 17 Ina Kutuduko lao mobambari NgkoraKu i to Yahudi hai i tauna au barahe to Yahudi, agaiana rakahihiriko. Nauri nodo, batemu ina Kukabaha hangko i kuasanda. 18 Idemi tunggaiaKu motuduko lao irihira bona tebungkahi matanda, hai mopalehihe kamakaindi lao i kamabaana, hai tekabahahe hangko i kuasana Datu Tokadake hai mepoinalaihe i Pue Ala. Mewali, anti pepoinalainda Iriko, teampungimi dosanda, hai mewalimohe taunana Pue Ala.’ ”
Paulu mampololita kana i pobagona
19 “Datu Agripa au kubila, idomi hai kupari-pari mampeulai apa au nauliangaana Pue i lalu pampetudungiaNa iriko. 20 Ido hai kupahawe i ope-ope tauna, hangangaa mampenosoihe dosanda hai mengkoruhe i Pue Ala, hai hangangaa mobabehihe apa au maroa bona tongawa penosonda. Nguru-nguruna bambari iti kupahawe i wanua Damsik, roo indo i Yerusale hai i humalele tampo Yudea, hai i tauna ntanina au barahe to Yahudi. 21 Ido hai rahakana to Yahudi i Souna Pue Ala. Rapeinaona rapapate, 22 agaiana nauri nodo, duuna ide-ide, Nakampaina Pue Ala, Hai peisa manina meangka inde mampololita posabikingku kana i Pue Yesu i ope-ope tauna, maroa i tauna au mapangka lantina, maroa i tauna biasa. Apa au kuuli ide, batena himbela hai apa au rapahawe amimi Musa hai nabi-nabi hangkoia 23 au manguli: Datu Topehompo hangangaa rapopeahi-ahi hai rapapate, hai Iami au nguru-nguruna tuwo hule hangko i kapate. Hai hangko indo, Ia mobambari Ngkora Marasa i ope-ope tauna, maroa to Yahudi maroa au barahe to Yahudi.”
24 Tangana mani Paulu mopahawe notona, mongangami Festus, nauli, “Magilako Paulu! Kapandemu iti au moantiko magila.”
25 Mehana Paulu, nauli, “Gubernur au kubila, bara wongkoia magila. Apa au kuuli ide tou hai hangko i pekiringku au manoto. 26 Naisa wori Datu Agripa pewalina au kuuli inona. Ido hai barana langa mololita nodo i lindona. Kupekiri bara ara au bara mani nahadi Datu Agripa, lawi ope-ope au mewali hangkoia iti bara tewuniangi. 27 Datu Agripa au kubila! Ba nupoinalai apa au rauli nabi-nabi hangkoia? Kuisa kanupoinalaina!”
28 Nahanai Datu Agripa nauli, “Nupehangu pae, holi-holi pewalingku to Sarani.”
29 Nahanai Paulu, “I tempo au hampalai ba i tempo au mahae, mekakaena i Pue Ala bona Datu hai ope-ope tauna au mampehadingi lolitangku alo ide ina mewali nodo iko, agaiana inee peakau hawe ratarunggu.”
30 Kahopoana, meangkamohe Datu Agripa, Gubernur Festus hai Bernike hihimbela hai ranganda, hai padumohe hangko i sou poteruhua. 31 Hawemohe i raoa, mololitahe, rauli, “Tauna iti, bara woia ara salana au hintoto rahukua mate ba ratarunggu.” 32 Roo indo, mololitami Datu Agripa i Festus, nauli, “Moleri, tauna iti peisami rakabaha, ane kebara mohawira kara-karana i Kaisar.”