Paulu i lindona Festus
25
1 Talumi alona moparenta i propinsi iti, Festus padu hangko i wanua Kaisarea lao i Yerusale. 2 Kahawena inditi, kapala-kapala tadulako mpenomba hai tadulakonda to Yahudi laomohe i Festus mopahawe pesalainda kana i Paulu. 3 Merapihe i Festus bona i kamaroana laluna ia motudu tauna moanti Paulu lao i Yerusale. Moleri akalanda pea bona Paulu rapapate i tanga rara. 4 Agaiana nahanaihe Festus, “Paulu hangangaa ratarunggu i Kaisarea hai iko ina polo mesuletona inditi. 5 Aginami tadulakomi lao hihimbela hai iko i Kaisarea bona kupehadingi lolitami, ane ara mpuu babehiana au masala.”6 Festus maida haminggu labi i Yerusale, hangko mesuleri lao i Kaisarea. Kahalona, nagulumohe ope-ope tadulako, hai napohawaahe bona Paulu raanti mai i poteruhuanda. 7 Kahawena Paulu inditi, aramohe to Yahudi au hangko i Yerusale meangka motoleliki Paulu, hai rasalai. Ngkaia pakana pepakanawo au kadake au raraia, agaiana popahawenda iti bara peisa rapakanoto. 8 Roo indo, Paulu mopahawe notona, nauli, “Bara mpuu huba haodi kamasalangku! Barana moliungi aturanda to Yahudi ba mopakedai Souna Pue Ala ba moewa Datu Mahile Kaisar i Roma!”
9 Anti kanapeinaona Festus moala lalunda to Yahudi, ido hai nauli i Paulu, “Arako madota lao i Yerusale bona kara-karamu kupohuda-hudaa indolou?”
10 Nahanai Paulu, “Ide-ide, meangkana i lindona sarungkorona Kaisar, datunda to Roma. Indemi hangangaa rabotusi kara-karangku. Nuisa mpuu, Tua Gubernur, kadana ara salangku i to Yahudi. 11 Ane tou mpuu ara salangku au hintotona rahukua mate, bara moapa rapapatena. Agaiana ane bara tou popahawenda to Yahudi, bara ara hadua tauna au peisa mohuhuna i lalu taienda. Hangangaa kupahawe kara-karangku i Kaisar!”
12 Kanahadina Festus lolitana Paulu, mololitami i hangka tadulakona. Roo indo, mouliangaa Paulu, “Anti pamperapimu mopahawe kara-karamu i pebotusiana Kaisar, batena ina lao mpuuko i wanua Roma molindo Kaisar.”
Paulu i lindona Agripa hai Bernike
13 Bahangkia alona hangko inditi, laomohe Datu Agripa hai Bernike adina i wanua Kaisarea mampombelambia Festus anti karaangkana mewali gubernur. 14 Bahangkiami alonda i Kaisarea, Festus mopahawe kara-karana Paulu i Datu Agripa, nauli, “Ara inde hadua tauna au ratarunggu i tempo poparentana Feliks. 15 I tempoku ara i Yerusale, kapala-kapala tadulako mpenomba hai totosaenda to Yahudi mopahawehe perainda i tauna ide, hai merapihe bona Paulu rahuku. 16 Agaiana kuhanaihe node: moula aturanda to Roma, tauna au rasalai bara mani peisa rahuhu i iwalina, ane bara mani rapohuda-hudaa kara-karana hai rapopombelindo hai tauna au mosalai. Ia hangangaa rawei wori tempo mopahawe notona.
17 Hangko inditi, bahangkia tadulakonda to Yahudi meulahe mai iriko hangko i Yerusale. Kahalona, kupohawaamohe tauna moanti mai Paulu bona rapohuda-hudaa kara-karana. 18 Ope-ope topesalai iti aramohe i lindoku mopahawehe pesalainda. Kupehangu ara babehia kadake au rasalaia. Agaiana pesalainda iti, bara nodo au kupekiri. 19 Au kulambi, posisisalana pea pampekirinda i agamanda. Mampombehanaingihe hadua tauna au rahanga Yesu. Yesu iti mate, agaiana nauli Paulu, tuwo hule. 20 Mewali, wulina mobotusi kara-karana iti. Ido hai kupekune i Paulu, kuuliangaa: ‘Madotako lao i Yerusale bona kara-karamu rapohuda-hudaa indolou?’ 21 Agaiana naperapi bona kara-karana rapahawe i Datu Mahile Kaisar. Hai naperapi wori bona rakampai duuna kara-karana nabotusi Kaisar. Ido hai kutudumi bona Paulu rataha liliu duuna raanti lao i Kaisar.”
22 Hangko inditi, Datu Agripa mouliangaa Festus, “Kupeinao wori mohadi lolitana.”
Nahanai Festus, “Kahalo rai, nuhadi pololitana.”
23 Kahalona, hawe mpuumohe Datu Agripa hai Bernike adina, radupa hai ngkaia pakana pebila. Mesuamohe i lalu sou poteruhua hihimbela hai tadulako surodado hai totosae i wanua. Festus mampohawaamohe tauna bona Paulu raanti mai molindohe. 24 Hangko inditi, Festus mololita nauli, “Datu Agripa, uma-uma hai ope-ope au teruhu inde! Tauna ide rasalai ope-ope to Yahudi, maroa i Yerusale, maroa inde. Monganga-ngangahe merapi iriko bona tauna ide rahuku mate. 25 Nauri bara ara salana au kuhumba au hintoto rapapatea. Agaiana anti kanaperapina Paulu bona kara-karana rapahawe i Kaisar i wanua Roma, ido hai kupakanotomi bona Paulu raanti i Datu Mahile Kaisar. 26 Agaiana bara mani ara kanotoana apa au ina kuuki i lalu surangku lao i Kaisar. Mewali, ido hai kuanti mai irikamu, lumbunami i Tua Datu Agripa au kubila. Tunggaiaku bona karoona poparesa ide, arami au peisa kuuki. 27 Lawi moula pelambiaku, bara hintoto tauna raanti lao i pebotusia Kaisar ane bara mani manoto apa au rasalaia.”